ඉකුත් ජනාධිපතිවරණ ඡන්ද විමසීම පැවතිදා රිසාඩ් බදියුදීන් හිටපු අමාත්‍යවරයාගේ ඡන්දදායකයන් පිරිසක් පුත්තලමේ සිට මන්නාරමට ඡන්දය ප්‍රකාශ කිරීම සඳහා ප්‍රවාහනය කරමින් තිබූ ලංගම බස් රථයකට තන්තිරිමලේදී වෙඩි තබා එම බස් රථයට අනර්ථයක් සිදු කිරීමේ සිද්ධියට අදාළ නඩුවේ විත්තිකාර සිවිල් ආරක්ෂක බළකා සෙබළුන්ට එරෙහිව අධිකරණය හමුවේ චෝදනා ගොනු කරන ලෙස අනුරාධපුර අතිරේක මහේස්ත්‍රාත් රුද්‍රිකා ද සිල්වා හේවාවසම් මහත්මිය තන්තිරිමලේ පොලිසියට නියෝග කළාය.
සැකකරුවන් වෙනුවෙන් අධිකරණයට කරුණු දක්වමින් නීතිඥ කාලිංග රවින්ද්‍ර මහතා සිය මූලික කරුණු දැක්වීම්වලදී කියා සිටියේ මෙම ප්‍රහාරයේ සැබෑ සැකකරුවන් නිදැල්ලේ සිටියදී කිසිදු සාක්ෂියක් නැතිව සිවිල් ආරක්ෂක සෙබළුන් තිදෙනකු අයුක්තිසහගත ලෙස අත්අඩංගුවට ගෙන ඇති බවයි. දැනට ලැබී ඇති දුරකතන විශ්ලේෂණ වාර්තාවලට අනුව මෙම ප්‍රහාරය සිදු කර ඇත්තේ දේශපාලන ආධාරකරුවන් පිරිසක් බව ද කියා සිටි නීතිඥවරයා එම සැබෑ සැකකරුවන් අත්අඩංගුවට ගැනීම පොලිසිය පැහැරහැර ඇති බවට ද චෝදනා කළේය.
මෙම වෙඩි තැබීමේ සිද්ධිය සම්බන්ධයෙන් සැකපිට අත්අඩංගුවට ගත් සිවිල් ආරක්ෂක බළකායේ සෙබළුන් තිදෙනා මීට පෙර ඇප මත මුදාහැර ඇති අතර බස් රථයට වෙඩි තැබීමට යොදාගත් බවට සැක කෙරෙන ටී-56 වර්ගයේ ස්වංයක්‍රිය ගිනි අවි පහක් රජයේ රස පරීක්ෂකවරයා වෙත යවනු ලැබ තිබේ.
දැනට මෙම ප්‍රහාරයට අදාළව අධිකරණය හමුවේ චෝදනා ලබා සිටින්නේ තන්තිරිමලේ සිවිල් ආරක්ෂක බළකා කඳවුරට අනුයුක්තව සේවය කරන කේ. විජේසේන සහ උපාලි නන්දසේන සහ ඩබ්. කැලුම් චතුරංග යන සිවිල් ආරක්ෂක බළකායේ සෙබළුන් තිදෙනෙකි.
සැකකරුවන් අධිකරණයට ඉදිරිපත් කරමින් තන්තිරිමලේ පොලිසිය මුල් බී වාර්තාව මඟින් සඳහන් කළේ පසුගිය ජනාධිපතිවරණය පැවැති දිනයේ පුත්තලමේ සිට ඡන්දදායකයන් පිරිසක් ඡන්දය ප්‍රකාශ කිරීම සඳහා මන්නාරමට ප්‍රවාහනය කරමින් තිබූ ලංගම බස් රථයකට තන්තිරිමලේදී වෙඩි ප්‍රහාරයක් සහ ගල් ප්‍රහාරයක් එල්ල කර ඇති බවයි. වෙඩි සහ ගල් ප්‍රහාරවලින් ලංගම බස් රථයට හානි සිදුව ඇති බව ද අධිකරණයට කියා සිටි පොලිසිය මෙම සිද්ධිය පිළිබඳ දීර්ඝව විමර්ශනයක් සිදු කර මෙම සැකකරුවන් ඉකුත්දා අත්අඩංගුවට ගත් බව ද කීවේය.
සැකකාර සිවිල් ආරක්ෂක බළකා සෙබළුන් වෙනුවෙන් අධිකරණයට කරුණු දක්වමින් නීතිඥ කාලිංග රවින්ද්‍ර මහතා තවදුරටත් සඳහන් කළේ ජනාධිපතිවරණය පැවතිදා වෙඩි තැබීම සිදුව ඇති දිනයේ මෙම සැකකාර සිවිල් ආරක්ෂක බළකා සෙබළුන් තිදෙනා පැල් රාජකාරිවල (සිවිල් ආරක්ෂක දෙපාර්තමේන්තුව විසින් වගා කළ වගා බිමක් වන සතුන්ගෙන් ආරක්ෂා කිරීමේ රාජකාරිවල) නියැළී සිට ඇති බවයි.
සැකකාර සෙබළුන් පැල් රාජකාරිවල නියැළී ඇත්තේ නිරායුධව බව ද අධිකරණයට අවධාරණය කළ නීතිඥවරයා එලෙස නිරායුධව සිටි සෙබළුන් තිදෙනකු බස් රථයට වෙඩි තබන්නේ කෙසේද? යන්න තන්තිරිමලේ පොලිසියෙන් ප්‍රශ්න කළේය. සැකකරුවන් අත්අඩංගුවට ගෙන ඇත්තේ මෙම අපරාධය සිදු කළ බවට හෝ මෙම අපරාධයට ආධාර අනුබල දුන් බවට කිසිදු සාක්ෂියක් නැතිව සිද්ධියෙන් මාස හයකට පසුව බව ද නීතිඥ කාලිංග රවින්ද්‍ර මහතා අධිකරණයට දැන්වීය. පැමිණිල්ල වෙනුවෙන් තන්තිරිමලේ පොලිසියේ නිලධාරීන් පෙනී සිටි අතර සැකකරුවන් වෙනුවෙන් නීතිඥ කාලිංග රවින්ද්‍ර මහතා පෙනී සිටියේය.
අනුරාධපුර - උපාලි ආනන්ද කරුණාදාස