- ආභරණ මොරටුව අවට උකස් කරලා
- ආයුධ මන්න සමන්තගේ නෑයකුගේ ගෙදර
කොල්ලකන යතුරුපැදිවලින් විවිධ ප්රදේශවල සැරිසරමින් මහමඟ ගමන් ගන්නා අයගේ ගෙලට මන්න පිහි තබා රන් භාණ්ඩ කොල්ල කෑ මන්න කල්ලියේ පැදිකරුගෙන් රැඳවුම් නියෝග මත ප්රශ්න කිරීමේදී රුපියල් කෝටියකට ආසන්න රන් භාණ්ඩ තොගයක් සොයාගත් බව මොරටුව මූලස්ථාන පොලිසිය කියයි.
දැනට සොයාගත් දේපළ අතර විවිධ ප්රමාණවල බරින් යුත් රන්මාල 20කට ආසන්න ප්රමාණයක්, අත් පලඳනා, කරාබු හා කොල්ලකෑම් සඳහා යොදාගත් තියුණු ආයුධ පොලිස් භාරයට ගෙන ඇත. මේ රන්මාලා අතර පවුම් 5 1/2 රන් මාලයක්ද වන බව පොලිසිය සඳහන් කරයි.
මොරගහහේන, කැස්බෑව, පිළියන්දල, බොරලැස්ගමුව, මහරගම, හෝමාගම, කහතුඩුව, කඩුවෙල, තෙබුවන, ඉංගිරිය, අඟුරුවාතොට, බණ්ඩාරගම හා මිල්ලනිය පොලිස් වසම්වල රන් අබරණ කොල්ලකෑම සම්බන්ධයෙන් පොලිසි ගණනාවක් මඟින් සොයන පුද්ගලයන් දෙදෙනා මොරටුව ලක්ෂපතිය ප්රදේශයේ සැරි සරන බවට මොරටුව මූලස්ථාන (ප්ර.පො.ප) නිහාල් ප්රැන්සිස් මහතාට ලද තොරතුරක් අනුව හෙරොයින් මත්කුඩු ග්රෑ. 10යි මි.ග්රෑ. 280ක් සමඟ මොහු අත්අඩංගුවට ගැනීමට මීට දින කීපයකට ඉහතදී හැකි විය. අනතුරුව දින 7ක රැඳවුම් නියෝග ගෙන කළ දීර්ඝ ප්රශ්න කිරීමේදී සැකකරු අනාවරණය කළ තොරතුරු මත, කොල්ලකන ලද රන් භාණ්ඩ රාවතාවත්ත, කටුබැද්ද, සොයිසාපුර, බෙලෙක්කඩේ, මොරටුව ආදි ප්රදේශවල උකස් මධ්යස්ථානවලට උකස් තබා තිබියදී පොලිසිය මඟින් සොයාගෙන ඇත. තියුණු ආයුධ ප්රධාන සැකකරු වන මන්න සමන්තගේ ඥාතියකුගේ ලක්ෂපතියේ නිවෙසක සඟවා තිබියදී සොයාගෙන ඇත.
සැකකරු අත්අඩංගුවට ගන්නා විට ඔහුට සහ අනෙක් පුද්ගලයාට එරෙහිව කොල්ලකෑම් සම්බන්ධයෙන් පාණදුර ගල්කිස්ස සහ නුගේගොඩ පොලිස් කොට්ඨාසවල පොලිසි 13කට පැමිණිලි 40කට අධික ප්රමාණයක් ලැබී ඇතැයි පොලිසිය කියයි. අත්අඩංගුවට ගත් සැකකාර පැදිකරු සමඟ එක්ව කොල්ලකෑම් සිදු කර ඇති පුද්ගලයා කොල්ලකෑම් 117ක් සම්බන්ධයෙන් වසර 15ක කාලයක් සිර දඬුවම් විඳි මන්න සමන්ත නමැත්තා බව මේ වන විට අනාවරණය වී ඇතැයිද ඔහු ලක්ෂපතිය ප්රදේශයේ පදිංචිකරුවකු වන අතර ප්රදේශය හැර පලාගොස් ඇති බවද උසස් පොලිස් නිලධාරියෙක් පැවසීය.
මේ කොල්ලකරුවන් දෙදෙනා ඇතැම් අවස්ථාවල සමහර පුද්ගලයන් දණගස්සවා ගෙලට මන්නා පිහි තබා රන් භාණ්ඩ සහ යතුරුපැදිද කොල්ලකා ඇතැයිද පොලිසිය කියයි. එක් යතුරුපැදියක් කොල්ලකෑමෙන් අනතුරුව එයින් කොල්ලකෑම් කීපයක් සිදු කර තවත් යතුරුපැදියක් කොල්ලකා පෙර යතුරුපැදිය අතහැර පලායෑම කොල්ලකරුවන් විසින් සිදු කර ඇතැයිද පොලිසිය සඳහන් කරයි.
අත්අඩංගුවට ගත් 46 ඇවිරිදි සැකකරු වාද්දුව තල්පිටිය පදිංචිකරුවෙකි. මොහු මොරටුව මහේස්ත්රාත් අධිකරණයට ඉදිරිපත් කිරීමට නියමිතය.
ගල්කිස්ස කොට්ඨාස භාර ජ්යෙෂ්ඨ පොලිස් අධිකාරී ප්රසන්න බ්රාහ්මණ, සහකාර පොලිස් අධිකාරී ඩබ්.ටී. අනුරංග මහත්වරුන්ගේ උපදෙස් මත මොරටුව මූලස්ථාන (ප්ර.පො.ප) නිහාල් ෆ්රැන්සිස් මහතාගේ මෙහෙයවීමෙන්, අපරාධ විමර්ශන අංශයේ ස්ථානාධිපති (පො.ප) අසේල ප්රසාද් සෙනෙවිරත්න මහතා ඇතුළු කණ්ඩායමක් විමර්ශන පවත්වයි.
බණ්ඩාරගම - බිමල් ජයසිංහ, හල්තොට - විනීතා මානෙල් ගමගේ