- පෙම්වතියගේ නිවෙසට පිරිසක් ගිනි තබති
- වයඹ හිටපු මහ ඇමැති අතුලගෙනුත් ප්‍රශ්න කරයි
කුලියාපිටියේ පදිංචිව සිටි 22 හැවිරිදි විවාහක තරුණයෙක් සිය පෙම්වතියගේ නිවසට ගොස් අතුරුදන්ව සති දෙකක කාලයක් මේ වන විට ගතවී ඇතත් ඔහුව මෙතෙක් සොයා ගැනීමට හැකියාවක් ලැබී නැත. මෙම තරුණයා ජීවතුන් අතර සිටීද? නැතිනම් මරා දමා තිබේදැයි කියාවත් පොලිසියට මෙතෙක් සිතා ගැනීමට නොහැකි බව පොලිස් තොරතුරු සඳහන් කළේය.
මෙම තරුණයාගේ අතුරුදන් කිරීම පිටුපස මීගමුව කුරණ පදිංචි හමුදාවේ පුද්ගලයෙකු‌ගේ සම්බන්ධයක් දුරකතන ජාල විමර්ශනයේ දී අනාවරණය වී තිබේ. එම සෙබළාව අත්අඩංගුවට ගැනීමට ඊයේ විශේෂ පොලිස් කණ්ඩායමක් යොදවා තිබිණි.
තරුණයා අතුරුදන් කිරීම තරුණයාගේ පෙම්වතියගේ පියා වූ සිඟිති නමැත්තා සැලසුම්කර තිබී ඇත්තේ පසුගිය 21 වැනිදාය. එදින එම සැලසුම ක්‍රියාත්මක නොවන්නේ අතුරුදන්ව සිටින සුසිත් ජයවංශ නොහොත් සුසී නමැති තරුණයා එදා ජීප් රථයක නැ‍ඟී පිරිසක් සමඟ පෙම්වතියගේ නිවසට ගොස් ඇති බැවිනි.
“ඥාති කට්ටියක් ඇවිල්ලා. හෙට උදේට හම්බවෙමු.” යැයි කියා 21 වෙනිදා තරුණයාව මගහැර ඇති බවත් 22 වැනිදා උදෑසන 9.30ට පමණ නැවත තරුණයාගේ නිවසට ගිය අවස්ථාවේ සිට තරුණයා අතුරුදන්ව ඇති බවත් පොලිසිය කියයි.
තරුණයා අතුරුදන් කිරීමට මුලින් සැලසුම් කළේ යැයි කියන දිනයේ දී වයඹ පළාත් මහ ඇමැතිවරයාව සිටි අතුල විජේසිංහ මහතාට පෙම්වතියගේ පියා වන සිඟිති නමැත්තා දුරකතන ඇමතුමක් ලබා දී ඇති බව ද පොලිසිය හෙළිකරගෙන තිබිණි.
නීතිඥවරයෙක් වන අතුල විජේසිංහ මහතාගේ නිවසට මෙම තරුණයාව රැගෙන ගිය බවට වූ තොරතුරු පොලිසියට ලැබී තිබිණි. ප්‍රශ්න කිරීම් හමුවේ අතුල විජේසිංහ මහතා පොලිසියට පවසා ඇත්තේ තරුණයාගේ අතුරුදන්වීම ගැන කිසිවක් තමා නොදන්නා බවය. සිය දියණිය තරුණයෙක් අතින් දූෂණය වී දරුවෙක් ලැබීමට සිටින බවත් ඔහු විවාහකයෙක් බවත් පවසමින් තමාගෙන් නීති උපදෙස් පැතූ බව ඔහු පවසයි. එහිදී පෙම්වතියගේ පියා වන සිඟිති නමැත්තා සිය දියණියට වූ අපරාධය ගැන ආවේගයෙන් කතාකළ බවත් එහි දී නීතිඥයෙක් ලෙස තමා ඔහුට උපදෙස් දුන්නේ පොලිසියට ගොස් ඒ ගැන පැමිණිලි කරන ලෙසත් බව අතුල විජේසිංහ මහතා පොලිස් ප්‍රශ්න කිරීම් හමුවේ සඳහන් කර ඇත.
“මම පොලිසි යන්නේ නැහැ. නඩු අහන්නෙත් මමයි දඬුවම් දෙන්නෙත් මමයි” යැයි එහි දී සිඟිති නමැති අය තමාට පැවසූ බව ද අතුල විජේසිංහ මහතා පවසා ඇත. තරුණයා අතුරුදන් වූ දින තමා නිවසේ නොසිටි බවත් සිය දරුවා එංගලන්තයේ සිට පැමිණි බැවින් ඔහු ගෙන ඒමට ගුවන්තොටුපොළට ගොස් සිටි බවත් වැඩිදුරටත් අතුල විජේසිංහ මහතා පවසා ඇත.
පෙම්වතියගේ පියා වන සැකකාර සිඟිති සහ අතුල විජේසිංහ මහතා දේශපාලනික වශයෙන් ඉතා කිට්ටු සම්බන්ධයක් ඇති අය බව පොලිසිය කියයි. සිය දියණියට වූ අපරාධය ගැන අතුල විජේසිංහ මහතාට ඔහු දැනුම් දී ඇත්තේ එබැවිනි. අතුල විජේසිංහ මහතා මෙම අපරාධයට ආධාර හා අනුබල දුන් බව හෝ ඒ ගැන දැන සිටි බවක් මෙතෙක් පැහැදිලිව සාක්ෂි සහිතව අනාවරණය නොවන බව කුලියාපිටිය මූලස්ථාන පොලිස් ස්ථානාධිපති ප්‍රධාන පොලිස් පරීක්ෂක වජිර ඉන්ද්‍රජිත් මහතා සඳහන් කළේය.
තරුණයාව රතු පැහැති ඇල්ටෝ වර්ගයේ මෝටර් රථයක දමාගෙන මාදම්පේ පනිරෙන්ඩාවට රැගෙන ගොස් ඇති බවට තොරතුරුද ලැබී තිබේ. ඒ අනුව පනිරෙන්ඩාව රක්ෂිතය පීරමින් මේ වන විට මෙහෙයුමක් දියත්කර ඇත්තේ තරුණයා ගැන යම් හෝඩුවාවක් සොයාය. පොලිස් නිල සුනඛ අංශයේද සහය ඒ සඳහා ලබාගෙන ඇත.
මේ අතර සිඟිති ඇතුළු පවුලේ සාමාජිකයන් පලාගියේ යැයි අනාවරණය වී ඇති කුඩා වෑන් රථය මාතලේ විල්ගමුවේ මාර්ගයක් අයිනේ දමාගොස් තිබිය දී පෙරේදා (04) සොයාගෙන තිබිණි. මාර්ගය අයිනේ හිමිකරුවෙක් නොමැතිව තිබුණු මෙම වෑන් රථය ගැන පොලිසියට කළ දැනුම්දීමට අනුව සොයාගත් බව පොලිසිය කියයි. මෙම වෑන් රථයේ ඡායාරූප පසුගිය බදාදා පොලිස් මාධ්‍ය කොට්ඨාසය විසින් මාධ්‍යට නිකුත් කරනු ලැබීය. පොලිසිය විශ්වාස කරනු ලබන්නේ ඒ හේතුවෙන් වෑන් රථය අතහැර දමා යන්නට ඇති බවය. මෙම රථය බොහෝවිට 03 වැනිදා රාත්‍රී කාලයේ මෙහි අතහැර යන්නට ඇතැයි සැකකරයි. ඒ බවට තොරතුරු සොයා ආරක්ෂක කැමරා පරීක්ෂා කරමින් සිටින බව පොලිසිය සඳහන් කළේය. එක් පුද්ගලයෙක් පමණක් පැමිණ මෙම වාහනය මෙහි නතරකර ඇති බවට සැකකරන තොරතුරුද ලැබී ඇත. වාහනය අපරාධ ස්ථාන පරීක්ෂණාගාර නිලධාරීන්ද, ඇගිලි සලකුණු අංශයද, පොලිස් නිල සුනඛයින් ද යොදා විමර්ශන පවත්වනු ලැබීය. එහිදී එක් ඇඟිලි සලකුණක් වෑන් රථයේ තිබී හමුවී ඇත.
අතුරුදන් ව සිටින මෙම තරුණයා ජීවතුන් අතර සිටීදැයි සැකසහිත බව පොලිසිය කියයි.
මේ අතර මෙම සිද්ධියට සැකකරුවකුව සිටින සිඟිති නමැත්තාගේ නිවෙසට කිසියම් පිරිසක් පෙරේදා (04) රාත්‍රියේ ගිනි තබා ඇත. ගින්නෙන් නිවෙසට කාමරයකට හා දේපොළවලට සුළු අලාභහානි සිදුව ඇතැයි පොලිසිය පවසයි. එමෙන්ම පොලිසිය කියා සිටින්නේ සුසිත්ගේ අතුරුදන්වීම සම්බන්ධව පොලිසිය සිය උපරිම කැපවීම යොදවමින් සැකකරුවන් 5 දෙනෙකුද අත්අඩංගුවට ගෙන ඇති පසුබිමක මෙවන් කටයුතුවල යෙදෙමින් අතුරුදන්වූ තරුණයා සෙවීමට ඇති කාලය අපතේ නොයවන ලෙසයි. එමෙන්ම අදාළ ගිනි තැබීම සිදුවූයේ කෙසේද? කවුරුන් විසින් කළාද? යන්නද පොලිසිය මේ වනවිටත් පරීක්‍ෂණ ආරම්භකර ඇතැයි උසස් පොලිස් නිලධාරියකු පැවැසීය.
කෙසේ වෙතත් පොලිසිය තම කාර්ය ඉතා කැපවීමෙන් සිදුකරන බව පැවසූ සුසිත් ජයවංශගේ බාල සොයුරු සජිත් ප්‍රියවංශ ඉල්ලා සිටියේ දින 14ක් ඉක්මවා ගොස් ඇතත් තම සොහොයුරා පිළිබඳ කිසිදු තොරතුරක් නොමැති බවයි. තම පියාගේ ඇවෑමෙන් පසු තමාට පියා වූ සොයුරා සෙවීම හේතුවෙන් දින 14ක් පුරාවට හරිහැටි රැකියාවක් පවා කරගත නොහැකිව ඇති බවයි.
තම සොහොයුරාගේ රුව මාධ්‍ය මගින් පුළුල්ව ප්‍රචාරය වී ඇති නිසා කවුරුන් හෝ තොරතුරක් දැනගතහොත් ළඟම ඇති පොලිසිය දැනුම්වත් කරන ලෙසද ඔහු ඉල්ලා සිටියි.
