මේ වසරේ ඔක්තෝබර් මස බංග්ලාදේශයේදී පැවැත්වෙන කාන්තා විස්සයි20 ලෝක කුසලාන ක්‍රිකට් තරගාවලියට සුදුසුකම් ලබා ගැනීමට ශ්‍රී ලංකා කාන්තා ක්‍රිකට් කණ්ඩායම ඊයේ සමත් විය.
ලෝක කුසලාන තරගාවලියට සුදුසුකම් ලබාගැනීම සඳහා අබුඩාබියේ පැවති මේ තරගාවලියේ දෙවැනි අවසන් පූර්ව තරගයෙන් සත්කාරක එක්සත් අරාබි එමීර් පිල ලකුණු 15කින් පරාජය කරමින් අවසන් තරගයේ ස්ථානයක් වෙන් කරගැනීමත් සමඟ ශ්‍රී ලංකාවට මේ අවස්ථාව උදා විය.
පළමු අවසන් පූර්ව තරගයෙන් අයර්ලන්තය පරදවා කඩුලු 8ක ජයක් හිමි කර ගනිමින් ස්කොට්ලන්තය ද ලෝක කුසලාන තරගාවලියට සුදුසුකම් ලබා ගත්තේය.
විශ්මි ගුණරත්න
සෙයිඩ් ක්‍රිකට් ක්‍රීඩාංගණයේ පැවති මේ තරගයේ පළමුව පන්දුවට පහර දෙමින් ශ්‍රී ලංකා පිල දුන් ලකුණු 150ක ඉලක්කය හමුවේ එමීර් ක්‍රීඩිකාවන්ට ඕවර 20 අවසානයේ කඩුලු 7ක් දැවී රැස් කළ හැකි වූයේ ලකුණු 134ක් පමණි.
නායිකා ඊෂා ඕසා ඉනිමට සාර්ථක ආරම්භයක් දෙමින් පන්දු 44කදී හතරේ පහර 2ක් සහ හයේ පහර 4ක් සමඟ ලකුණු 66ක් රැස් කළ අතර, ඇය සිව්වැනි කඩුල්ල ලෙස දැවී යෑමත් සමඟ තරගය එමීර් පිල අතින් ගිලිහී ගියේය.
කුෂි ෂර්මා ලකුණු 22ක් සහ ශ්‍රී ලාංකික සම්භවයක් සහිත ක්‍රීඩිකාවක වන කවිෂා එගොඩගේ ලකුණු 16ක් ඉනිමට එක් කළහ. එගොඩගේ දවා ගැනීමට නිලක්ෂි ද සිල්වා උඩ පන්දුවක් රැකගත් අතර, ඒ සමඟ නිලක්ෂි ශ්‍රී ලංකා කාන්තා විස්සයි20 පිටියේ වැඩිම උඩපන්දු සංඛ්‍යාවක් (38) රැකගත් ක්‍රීඩිකාව බවට පත්වූවාය. ඇය ඉන් පෙර නායිකා චමරි අතපත්තු සමඟින් උඩ පන්දු 37 බැගින් රැකගෙන තිබිණි. පන්දු යැවීමේදී චමරි අතපත්තු කඩුලු 2ක් බිඳ දැමූ අතර, සුගන්දිකා කුමාරි, ඉනෝෂි ප්‍රියදර්ශනී සහ උදේශිකා ප්‍රබෝධනි කඩුල්ල බැගින් දවා ගත්හ.
පළමුව පන්දුවට පහරදුන් ශ්‍රී ලංකා පිල වෙනුවෙන් විශ්මි ගුණරත්න යළිත් වැඩිම ලකුණුලාභිනිය බවට පත්වූයේ පන්දු 44කදී හතරේ පහර 5ක් සමඟින් ලකුණු 45ක් රැස් කරමිනි. නායිකා චමරි අතපත්තු පන්දු 21කින් ලකුණු 21ක් රැස් කළ අතර, හර්ෂිතා මාධවී ලකුණු 24ක් ඉනිමට එක් කළාය. ඉනිම අග භාගයේදී වේගවත් පිතිහරඹයක නිරත වෙමින් හසිනි පෙරේරා පන්දු 8කින් ලකුණු 15ක්, කවීෂා දිල්හාරි සහ නිලක්ෂි ද සිල්වා පන්දු 10කට බැගින් මුහුණ දෙමින් පිළිවෙළින් ලකුණු 17ක් සහ 18ක් රැස් කරමින් එමීර් පිලට ලකුණු 150ක අභියෝගය ලබා දුන්හ. පන්දු යැවීමේදී ඊෂා ඕසා සහා වෛෂ්ණවේ මහේෂ් කඩුලු 2 බැගින් දවා ගත්හ.
මේ තරගාවලියේ අවසන් මහ තරගය හෙට (7) මෙරට වේලාවෙන් රාත්‍රි 9.00ට ශ්‍රී ලංකාව සහ ස්කොට්ලන්තය අතර සෙයිඩ් ක්‍රිකට් ක්‍රීඩාංගණයේදීම පැවැත්වේ.
ශ්‍රී ලංකා කාන්තා පිල – 149/6 (ඕවර 20) විශ්මි ගුණරත්න 45, හර්ෂිතා මාධවී 24, චමරි අතපත්තු 21, නිලක්ෂි ද සිල්වා 18, කවීෂා දිල්හාරි 17, හසිනි පෙරේරා 15 (ඊෂා ඕසා 27/2, වෛෂ්ණවේ මහේෂ් 33/2)
එමීර් කාන්තා පිල – 134/7 (ඕවර 20) ඊෂා ඕසා 66, කුෂි ෂර්මා 22, කවිෂා එගොඩගේ 16 (චමරි අතපත්තු 28/2)
නිරෝෂාන් ප්‍රියංකර