අලුත්වැඩියාවක් කරමින් සිටි නි‍ෙවසක මිටියක ආධාරයෙන් බිත්තියක් කඩද්දී ඊට බද්ධව තිබූ යාබද බිත්තියක් එක්වරම කඩා වැටී එහි කොටසක් පෙදරේරුවකුගේ හිසෙහි වැදී සිදුවූ අනතුරින් ප්‍රතිකාර සඳහා ඔරුවල දිසා රෝහලට ඇතුළත් කිරීමට රැගෙන යමින් සිටියදී මිය ගොස් ඇතැයි අතුරුගිරිය පොලිසිය පවසයි.
මෙසේ මිය ගොස් ඇත්තේ සියඹලාපේ, දකුණු සියඹලාපේ අංක 802 / 03 / B / 1 හි පදිංචි පාදෙනි කෝරළලාගේ දොන් අජිත් වසන්ත නමැති 58 හැවිරිදි තිදරු පියෙකු බව පොලිසිය කියයි. මෙම පුද්ගලයා තවත් පෙදරේරුවකු සමඟ අතුරුගිරිය ශාන්තාලෝකගම ප්‍රදේශයේ පැරැණි නිවසක වහලයක් ඉදිකිරීම සඳහා ගොස් තිබූ අතර එම වහලය ඉදිකිරීම සඳහා බාධාවක්ව පැවති යාබද බිත්තියක් පෙදරේරුවන් දෙදෙනා මිටියක ආධාරයෙන් මාරුවෙන් මාරුවට කඩා ඉවත් කරමින් සිටියදී එක්වරම ඊට යාබදව තිබූ වෙනත් බිත්තියක් කඩා වැටී ඇති අතර, එහි කොටසක් මෙම පුද්ගලයාගේ හිසෙහි වැදී පසෙකට විසි වී අනතුරක් සිදුව තිබුණි. ඒ අනුව ක්ෂණයකින් ක්‍රියාත්මක වූ නිවෙස් හිමියා සහ පෙදරේරුවා අනතුරට පත් පුද්ගලයා ත්‍රිරෝද රථයකින් ඔරුවල දිසා රෝහලට ඇතුළත් කර ඇති අතර එහිදී රෝගියා පරීක්ෂා කර වෛද්‍යවරුන් පවසා ඇත්තේ ඔහු මිය ගොස් ඇති බවයි.
මත්තේගොඩ- ශාන්ත ප්‍රදීප් කුමාර කුලරත්න