ගොඩකවෙල අල්පිටිය ප්‍රදේශයේදී පුද්ගලයින් හත් දෙනකුට වෙඩි තබා තුවාල කිරීම සහ ඔවුන් ඝාතනය කිරීමට තැත් කිරීමේ චෝදනා මත රත්නපුර මහාධිකරණයේ පැවති නඩුවක වෝදනාවලින් අභාවප්‍රාප්ත හිටපු රත්නපුර දිස්ත්‍රික් පාර්ලිමේන්තු මන්ත්‍රී රංජිත් ද සොයිසා මහතා ඇතුළු සැකකරුවන් තිදෙනකු නිදොස් කොට නිදහස් කිරීමට මහාධිකරණ විනිසුරු එල්.කේ. මහින්ද මහතා පෙරේදා (28) නියෝග කළේය. ගොඩකවෙල ප්‍රාදේශීය සභාවේ හිටපු සභාපති ප්‍රියන්ත බණ්ඩාර මහතා සහ කහව දඩල්ලගේ නන්ද කුමාර යනද අය නිදොස් කොට නිදහස් කරන ලද තිදෙනා අතර සිටිති.
මේ නඩුව විභාග වන අතරතුර පාර්ලිමේන්තු මන්ත්‍රී රංජිත් ද සොයිසා මහතා මියගිය අතර, ඔහු නැතිව නඩුව විභාගයට ගැනීමට මහාධිකරණ විසුරුවරයා තීරණය කර තිබිණි.
2000 වසරේ ඔක්තෝබර් මස 10 හෝ ඊට ආසන්න දිනයක ගොඩකවෙල අල්පිටිය ප්‍රදේශයේදී ටී.ඒ. උදය ඉරෝෂන්, මහින්දපාල, දිගදුරගේ ශාන්ත, ඒ. සංජීව අමරවංශ, ආරුමුගම් විජේකුමාර්, චන්දන රාජපක්ෂ, එස්.එම්. රත්නායක යන අයට වෙඩි තබා තුවාල කිරීම සහ මිනීමැරීමට තැත් කිරීම පොදු අරමුණ කරගත් නීති විරෝධි රැස්වීමක සාමාජිකයන් වීම යන චෝදනා මත සැකකරුවන්ට එරෙහිව අධි චෝදනා 15ක් යටතේ නඩුපවරා තිබිණි.
මේ නඩුව රත්නපුර මහාධිකරණයේදී කොළඹ මහාධිකරණ විනිසුරුවරයකු වන එල්.කේ. මහින්ද මහතා විසින් විභාග කරන ලදි. සාක්ෂිවල ස්වභාවය අනුව විත්ති වාචක එනම් විත්තිකරුවන්ගෙන් සාක්ෂි කැඳවීමකින් තොරව අපරාධ නඩු විධාන සංග්‍රහයේ 200 වන වගන්තිය අනුව විත්තිකරුවන් නිදොස් කොට නිදහස් කරන ලෙස විත්තිකරුවන් වෙනුවෙන් පෙනී සිටි නීතිඥ චන්දන අතුකෝරල මහතා මහාධිකරණයෙන් ඉල්ලීමක් කර තිබූ අතර, මහාධිකරණ විනිසුරුවරයා ඒ ඉල්ලම සලකා බලමින් විත්තිකරුවන් නිදොස් කොට නිදහස් කළේය.
කහවත්ත නිරෝෂණ පෙරේරා