ශ්‍රී ලංකා – බංග්ලාදේශ දෙවැනි හා අවසන් ටෙස්ට් ක්‍රිකට් තරගය චැටෝග්‍රෑම් අහමඩ් චෞද්රි ජාත්‍යන්තර ක්‍රිකට් ක්‍රීඩාංගණයේදී ශ්‍රී ලංකා වේලාවෙන් අද පෙරවරු 9.30ට ආරම්භ වෙයි. සිල්හෙට්හි පැවති පළමු ටෙස්ට් තරගය ලකුණු 328කින් ජයගත් ශ්‍රී ලංකාව දැනටමත් තරගාවලිය 1-0ක් ලෙස ඉදිරියෙන් සිටින අතර, මෙය අයිසීසී ලෝක ටෙස්ට් ශූරතාවලියේ කොටසක් බැවින් මේ තරගයේ ජයග්‍රහණය දෙපිලටම වැදගත් වේ.
වසර 2022දී ඉන්දියාව හා බංග්ලාදේශය අතර ටෙස්ට් තරගය පැවැත්වීමෙන් අනතුරුව මේ චැටෝග්‍රෑම් අහමඩ් චෞද්රි ජාත්‍යන්තර ක්‍රිකට් ක්‍රීඩාංගණයේදී ටෙස්ට් තරගයක් පැවැත්වෙන පළමු අවස්ථාව මෙය වේ. වසර 2018දී මෙ ක්‍රීඩාංගණයේ පැවති ටෙස්ට් තරගයේදී කුසල් මෙන්ඩිස් ලකුණු 196ක් හා ධනංජය ද සිල්වා ලකුණු 173ක් ලබා ශ්‍රී ලංකා ඉනිම වාර්තාගත ලෙස ලකුණු 713ක් බවට පත් කිරීම ශ්‍රී ලංකා ක්‍රීඩකයන්ගේ මතකයේ රැඳෙනු ඇත. බංග්ලාදේශයද එහි පළමු ඉනිමේ ලකුණු 513ක් ලබාගත් හෙයින් අහමඩ් චෞද්රි ක්‍රිකට් තණතිල්ල පිතිකරුවන්ට පාරාදීසයක් වූවේය.
මේ අතර බංග්ලාදේශ පුහුණුකරු චන්දික හතුරුසිංහ හදිසියේම කණ්ඩායම හැර යද්දී ඔහු සමඟ පසුගිය කාලය පුරා මත ගැටුම් ඇතිකරගෙන සිටි ෂකීබ් අල් හසන් වසරක විරාමයකට පසු නැවත ටෙස්ට් පිටියට පැමිණීම විශේෂත්වයකි. ෂකීබ් සමඟ ඇති විරසකය හේතුවෙන් බංග්ලාදේශ පුහුණුකරු චන්දික හතුරුසිංහ මේ තරගයේදී කණ්ඩායමෙන් ඉවත් වූවේද යන්න බොහෝ දෙනාගේ කතා බහට ලක්වී තිබේ. කෙසේ වුවද සහාය පුහුණුකරු නික් පොතාස් කණ්ඩායමේ වැඩබලන පුහුණුකරු ලෙස කටයුතු කරනු ලබයි.
තුන් ඉරියව් ක්‍රීඩක ෂකීබ් අල් හසන් අවසන් වරට ටෙස්ට් තරගයකට ක්‍රීඩා කළේ 2023 අප්‍රේල් මාසයේදී අයර්ලන්තය හමුවූ අවස්ථාවේදීය. පළමු ටෙස්ට් තරගය සඳහා 15 දෙනා අතර සිටි පිතිකරු තව්හිඩ් හිරිඩෝයි සංචිතයෙන් ඉවත්කොට ෂකීබ් අල් හසන්ට අවස්ථාව ලබා දී තිබේ. වේග පන්දු යවන ක්‍රීඩක මුෂ්ෆික් හසන් ඔහුගේ වම් වළලුකරයේ ආබාධයකට ලක්ව ඉවතට ගිය හෙයින් දකුණත් වේග පන්දු යවන ක්‍රීඩක හසන් මහමුද් සංචිතයට ආදේශ කොට ඇත. බංග්ලාදේශය වෙනුවෙන් එක්දින හා විස්සයි20 තරග 39ක් ක්‍රීඩා කර ඇති හසන් මහමුද් කඩුලු 48ක් දවා ගත්තද, තවමත් ටෙස්ට් තරගයකට සහභාගි වී නැත. මහමුද් පළමු පෙළ තරග 16කදී කඩුලු 49ක් දවාගෙන ඉදිරියෙන් සිටින හෙයින් ඔහුට අද තරගයේදී ටෙස්ට් වරම් හිමිවනු ඇතැයි විශ්වාස කළ හැකිය. ශ්‍රී ලංකා වේග පන්දු යවන කසුන් රාජිත පාදයේ ඇතිවූ ආබාධයක් හේතුවෙන් ශ්‍රී ලංකාවට පැමිණ සිටින අතර, අසිත ප්‍රනාන්දු සංචිතයට එක්කොට ඇත.
ශ්‍රී ලංකාව හා බංග්ලාදේශය වසර 2001 සිට ටෙස්ට් තරග 25ක් පවත්වා එයින් තරග 19ක ජය ශ්‍රී ලංකාව සතුකර ගත්තේය. දෙරට ටෙස්ට් බිමේ හමු වී වසර 16කට පසු බංග්ලාදේශය එකම ටෙස්ට් ජයග්‍රහණය පී. සරා ඕවල් පිටියේදී වාර්තා කිරීමට සමත් විය. තරග 5ක් ජය පරාජයෙන් තොරව නිමාවට පත්ව ඇති අතර, එයින් තුනක්ම චැටෝග්‍රෑම්හිදී නිමාවට පත් වූවේය.
අසිත ප්‍රනාන්දු ඊයේ පුහුණුවීම්වල නිරතව සිටි අයුරු
