ශ්රී ලංකා කාන්තා ක්රිකට් කණ්ඩායම සහ දකුණු අප්රිකානු කාන්තා ක්රිකට් කණ්ඩායම අතර දෙවැනි විස්සයි20 ක්රිකට් තරගය අද (30) පොච්ෆ්ස්ට්රූම්හිදී මෙරට වේලාවෙන් රාත්රී 9.30ට පැවැත්වේ.
දෙපිල අතර පළමු තරගයෙන් දකුණු අප්රිකාව ලකුණු 79ක දැවැන්ත ජයක් වාර්තා කළ අතර, ඒ සමඟ තරග 3කින් සමන්විත විස්සයි20 තරගාවලිය 1-0ක් ලෙස පෙරමුණ ගැනීමට ද ඔවුන්ට හැකිවිණි.
ඒ හේතුවෙන් මේ තරගාවලියේ තවදුරටත් රැඳී සිටීමට නම් ශ්රී ලංකා පිල අද තරගය අනිවාර්යයෙන්ම ජයගත යුතු වී තිබේ. එසේ වුවහොත් ශ්රී ලංකාවට තරගාවලිය 1-1ක් ලෙස සම කර ගනිමින් තෙවැනි තරගයට යා හැකි වන අතර, එසේ නොවුණහොත් දකුණු අප්රිකානු ක්රීඩිකාවෝ වේලාසනින්ම තරගාවලියේ ජය තමන් සතු කර ගනු ඇත.
පළමු තරගයේදී ශ්රී ලංකා ආරම්භක පිතිකාරිනියන් වන නායිකා චමරි අතපත්තු සහ විශ්මි ගුණරත්නට ලකුණු අතරට පිවිසීමට නොහැකි වීම විශාල පාඩුවක් වූ අතර, හර්ෂිතා සමරවික්රම (38) සහ හසිනි පෙරේරා (30) යම් සටනක් දුන්නද කණ්ඩායම ජයග්රහණය කරා ගෙන යෑමට එය ප්රමාණවත් නොවිණි.
එබැවින් අද තරගයේදී ශ්රී ලංකා ඉනිමට සාර්ථක ආරම්භයක් ලැබිය යුතුම වී තිබේ.
දකුණු අප්රිකානු පිතිකාරිනියන් හමුවේ ශ්රී ලංකා පන්දු යවන්නියන්ට ද සාර්ථක වීමට අවස්ථාවක් නොලැබුණු අතර, අද තරගයේදී ඒ සියලු අතපසුවීම් නිවැරදි කර ගැනීමට ශ්රී ලංකා කණ්ඩායමට සිදු වනු ඇත.
එම තරගයේදී ලෝරා වොල්වාඩ්ට් සිය මංගල ශතකය ලෙස ලකුණු 102ක් රැස් කළ අතර, මැරිසාන් කාප් ලකුණු 60ක් රැස් කළාය.