ජලය යැයි කියා පෙට්‍රල්වලින් මුහුණ සේදීමෙන් ඇස්වල ඇති වූ අධික දැවිල්ල හේතුවෙන් ප්‍රතිකාර සඳහා මැණික්හින්න ප්‍රාදේශීය රෝහලට රෝගියකු රැගෙන ගිය පිරිසකට බීමතින් සිටි බව කියන රෝහල් කාර්යමණ්ඩල සාමාජිකයකු සිදු කළ බැණ වැදීමක් මුල්කර ගනිමින් දෙපාර්ශ්වය අතර ඇති වූ ගැටුමකින් තුවාල ලැබූ රෝහලේ දිස්ත්‍රික් වෛද්‍ය නිලධාරිවරයා ඇතුළු 10 දෙනකු ප්‍රතිකාර සඳහා පේරාදෙණිය හා මැණික්හින්න රෝහල්වලට ඇතුළත් කර තිබේ.
ගැටුමෙන් තුවාල ලැබූ දිස්ත්‍රික් වෛද්‍ය නිලධාරිවරයා ඇතුළු රෝහල් කාර්ය මණ්ඩලයේ සිව්දෙනකු මැණික්හින්න රෝහලේ ප්‍රතිකාර ලබන අතර රෝගියා සමඟ පැමිණි ඔහුගේ ඥාතීන් බව කියන 06 දෙනකු පේරාදෙණිය ශික්ෂණ රෝහලටත් ඇතුළත් කර තිබෙන බව මැණික්හින්න පොලිසිය පවසයි.
ප්‍රතිකාර සඳහා පෙරේදා (28) පස්වරු 6.40ට පමණ රෝගියා රැගෙන රෝහලට පැමිණි පිරිස දිගන ප්‍රදේශයේ අවුරුදු උත්සවයකට සහභාගි වෙමින් සිට ඇති අතර එම අවස්ථාවේ රෝහල් කාර්යමණ්ඩලය ද රෝහල් පරිශ්‍රයේ අවුරුදු උත්සවයක් පවත්වා තිබෙන බව පරීක්ෂණ මඟින් අනාවරණය වී තිබේ.
ප්‍රතිකාර ලබාදීම සඳහා රෝගියා රෝහලට රැගෙන ගිය අවස්ථාවේ වෛද්‍යවරයා ඇතුළු රෝහල් කාර්යමණ්ඩලය එකම ටීෂර්ටයකින් සැරසී සිටි බවත් ඔවුන් බීමතින් සිටින බවක් පෙනී ගිය හෙයින් ඒ පිළිබඳ විමසීමේදී රෝහලේ පුටු, යකඩ බට හා ගල් මුගුරුවලින් තමන්ට පහරදුන් බවත් පේරාදෙණිය ශික්ෂණ රෝහලේ ප්‍රතිකාර ලබන රෝගියාගේ ඥාතීහු පවසති.
ඇස්වලට පෙට්‍රල් වැටීම නිසා අධික වේදනාවෙන් පසු වූ තරුණයාට ද එහිදී රෝහල් කාර්ය මණ්ඩල සාමාජිකයන් පහර දුන් බව ඔවුහු පැවසූහ.
සිද්ධිය වූ දින රෝහල් පරිශ්‍රයේ අවුරුදු උත්සවයක් පැවැත්වෙමින් තිබූ බවත් ඉරිදා නිවාඩු දින වුවද තමන් රෝහලේ සේවයට වාර්තා කර සිටි බවත් මැණික්හින්න රෝහලේ කාර්යභාර වෛද්‍ය නිලධාරී ඩබ්.සී.කේ. වීරපාන මහතා පැවසුවේය. ගැටුම ඇතිවන අවස්ථාවේ රෝහලේ වෛද්‍යවරයා ද බීමතින් සිටි බවට ද චෝදනා එල්ල වී තිබේ.
ගැටුමෙන් රෝහල් පරිශ්‍රයේ නවතා තිබූ වාහන පහකට අලාභහානි සිදුව ඇත. එම වාහන අතර රෝගියා රැගෙන ආ ත්‍රිරෝද රථය ද රෝහල ආසන්නයේ නවතා තිබූ පෞද්ගලික මෝටර් රථයක් ද තිබෙන බව පොලිසිය පවසයි.
දෙපාර්ශ්වය අතර ඇති වූ ගැටුම උත්සන්න වීමත් සමඟ පුටු හා යකඩ පොලුවලින් පහරදීම් සිදුවෙද්දී රෝහලේ නේවාසිකව ප්‍රතිකාර ලබමින් සිටි පිරිස් ද රෝහල් පරිශ්‍රයෙන් ඉවතට දිවගොස් තිබෙන බව දැන ගන්නට තිබේ.
සිද්ධිය සම්බන්ධයෙන් මැණික්හින්න පොලිස් ස්ථානාධිපති ප්‍රධාන පොලිස් පරීක්ෂක එම්.ඩී. චන්ද්‍රපාල මහතාගේ මෙහෙයවීමෙන් පරීක්ෂණ පැවැත්වෙයි. පහරදීමට සම්බන්ධ වූ දෙපාර්ශ්වයෙන්ම ප්‍රකාශ සටහන් කර ගැනීමට පොලිසිය පියවර ගෙන තිබේ. සිද්ධිය සම්බන්ධයෙන් මෙතෙක් කිසිවකුත් අත්අඩංගුවට ගෙන නැත.
සිද්ධිය සම්බන්ධයෙන් මහනුවර දිස්ත්‍රික් ප්‍රාදේශීය සෞඛ්‍ය සේවා අධ්‍යක්ෂ සේනක තලගල මහතාගේ මෙහෙයවීමෙන් විශේෂ පරීක්ෂණයක් ආරම්භ කර තිබේ. ඒ මහතාගේ උපදෙස් මත විශේෂ කණ්ඩායමක් එහි ගොස් රෝහල් කාර්යමණ්ඩලයෙන් ප්‍රකාශ සටහන් කරගෙන ඇත.
පරීක්ෂණ මඟින් රෝහල් කාර්ය මණ්ඩල සාමාජිකයන් වගකීම පැහැර ඇති බවට වාර්තා වුවහොත් ඒ සම්බන්ධයෙන් විනය ක්‍රියාමාර්ග ගන්නා බව මධ්‍යම පළාත් සෞඛ්‍ය සේවා අධ්‍යක්ෂ නිහාල් වීරසූරිය මහතා කීය. මෙම ගැටුමෙන් රෝහලේ රෝද පුටු හා දොර ජනෙල් කිහිපයකට අලාභහානි සිදුව ඇත.
අසේල කුරුළුවංශ