නාවික හමුදාවේ ලුතිනන් කර්නල්වරු දෙදෙනකු සමඟ කළ මත්කුඩු ජාවාරමක් සම්බන්ධයෙන් අත්අඩංගුවට ගැනීමට මුල්ලේරියාව පොලිසිය සොයමින් සිටි පාතාලයේ මත්කුඩු ජාවාරම්කරුවකු වන එල්ලාවලගේ සරත් කුමාර නොහොත් “චිටී” නමැත්තා වෙනත් පුද්ගලයකු නමින් පෙනී සිටිමින් සකස්කළ විදෙස් ගමන් බලපත්‍රයකින් රටින් පලායාමට පෙරේදා (28) සූදානම් වූ අවස්ථාවේ දී කටුනායක බණ්ඩාරනායක ජාත්‍යන්තර ගුවන්තොටුපොළේ ස්ථාපිතකර ඇති මුහුණු හඳුනා ගැනීමේ පද්ධතිය (Automated Facial Recognize System) මගින් හඳුනාගෙන අත්අඩංගුවට ගෙන ඇත.
ඉන්දියාවේ දී සිය අනියම් බිරිය හා ගෝලබාලයින් කිහිපදෙනෙකුගේ සැලසුමකට අනුව ඝාතනය වූ පාතාලයේ ප්‍රබල මත්කුඩු ජාවාරම්කරුවකු වූ අංගොඩ ලොක්කාගේ ප්‍රධාන ගෝලයෙක් ලෙස කලක් කටයුතු කර ඇති මෙම පුද්ගලයා පසු කාලයේ පොලිස් ඔත්තුකරුවකු ලෙස ක්‍රියාකර ඇති බව පොලිස් තොරතුරු සඳහන් කළේය.
මුල්ලේරියාව පොලිසිය පසුගිය 19 වෙනිදා නාවික හමුදා ලුතිනන් කර්නල්වරු දෙදෙනා අත්අඩංගුවට ගනු ලැබුවේ අයිස් මත්ද්‍රව්‍ය ග්‍රෑම් 510ක් සමගිනි. ඒ සම්බන්ධයෙන් කළ දීර්ඝ විමර්ශනයේ දී හෙළිවන්නේ නාවික හමුදා සාමාජිකයන්ට එම අයිස් තොගය ලබා දී ඇත්තේ චිටී නමැති මෙම සැකකරු විසින් බවය.
නො. 214/එස්, දෙලිගහවත්ත, අංගොඩ, මුල්ලේරියාව ලිපිනයේ පදිංචිකරුවකු වන එල්ලාවලගේ සරත් කුමාර නොහොත් චිටී අවුරුදු 47ක් වයසැති අයෙකි. ගුවන්තොටුපොළේ ක්‍රියාත්මක මුහුණ හඳුනා ගැනීමේ පද්ධතිය පාලනය වන්නේ අපරාධ පරීක්ෂණ දෙපාර්තමේන්තුව යටතේය.
කච්චකඩුගේ ප්‍රසන්න සිල්වා නමින් සකස්කළ විදේශ ගමන් බලපත්‍රයකින් චිටී නමැති මෙම පුද්ගලයා ඩුබායි බලා යාමට ගුවන්තොටුපොළට පැමිණ සිටියදී හසුවන්නේ ඔහුගේ මුහුණ අදාළ පද්ධතිය මඟින් හඳුනා ගැනීමත් සමඟ කළ පරික්ෂා කිරීම්වලදීය.
වෙනත් පුද්ගලයකුගේ නමින් සකස් කළ ජාතික හැඳුනුම්පතක් සහ එම නමින් ඇති උප්පැන්න සහතිකයක් යොදාගෙන මෙම විදෙස් ගමන් බලපත්‍රය ඔහු විසින් සකස්කරගෙන ඇත්තේ පසුගිය පෙබරවාරි 06 වැනිදාය. එම ජාතික හැඳුනුම්පත හා විදෙස් ගමන් බලපත්‍රයට අනුව මෙම පුද්ගලයා 1977 අගෝස්තු 12 වැනිදා උපන් අයකු ලෙස සැලකේ. මුහුණු හඳුනා ගැනීමේ පද්ධතිය විසින් ලබාදුන් තොරතුරු ඔස්සේ මෙම සැකකරුව අත්අඩංගුවට ගෙන ඇත්තේ අපරාධ පරීක්ෂණ දෙපාර්තමේන්තුවේ නිලධාරීන්ය.
පොලිසිය සඳහන් කරනු ලබන්නේ නාවික හමුදා නිලධාරීන් දෙදෙනා සම්බන්ධයෙන් කළ විමර්ශනයේ දී මෙම පුද්ගලයා අයිස් මත්ද්‍රව්‍ය කිලෝ 10ක් මෙරටට රැගෙනවිත් බෙදා හැරීමේ ජාවාරමකට ද සම්බන්ධ බවට තොරතුරු හෙළිවී ඇති බවය.
වැල්ලම්පිටිය පොලිස් වසමේ දී 2011 වසරේ දී පුද්ගලයකුට වෙඩිතබා මනුෂ්‍ය ඝාතනයක් කිරීම, ගිනි අවි ළඟ තබා ගැනීම ඇතුළු තවත් අපරාධ රැසකට මොහු සම්බන්ධ බවට තොරතුරු ඇතැයි පොලිස් මූලස්ථානය සඳහන් කරයි.
චිටී නමැති මෙම සැකකරුගේ ඉතිහාසය විමසීමේ දී අනාවරණය වන්නේ ඔහු පාතාලයට වැටෙන්නට පෙර අංගොඩ පැත්තේ පිහිටි වෙල්වල කසිප්පු පෙරා බෙදා හැරීමේ ජාවාරමක නිරතවූවෙක් බවය. එකල අංගොඩ ලොක්කා ද සිට ඇත්තේ මෙම පුද්ගලයාගේ ගෝලයෙක් ලෙස කසිප්පු වාඩියේ බව සඳහන්ය. අංගොඩ ලොක්කා පාසල් ගමන හමාර කිරීමෙන් පසු චිටී නමැති මෙම පුද්ගලයාගේ කසිප්පු වාඩියේ වැඩට ගොස් ඒ හරහා දේශපාලනඥයෙක් සමඟ සම්බන්ධවීමෙන් අනතුරුව පාතාලයේ වැඩ්ඩෙක් ලෙස කරළියට පැමිණ මත්කුඩු ජාවාරම සිදුකර ඇති බවත් පසුව චිටී, අංගොඩ ලොක්කාගේ ගෝලයෙක් බවට පත්ව ඇති බවත් ඒ ගැන තොරතුරු විමසීමේ දී අනාවරණය වේ.
අංගොඩ ලොක්කාගේ පාතාලයේ අපරාධ සියල්ලකම පිටුපස චිටී නමැත්තා සිට ඇති අතර මුදල් බෙදී යාමේ දී ඇතිවුණු ආරවුල්මත ඔහු අංගොඩ ලොක්කාගෙන් කැඩී වෙන්වී ඇතැයි ද පැවසේ. අනතුරුව අංගොඩ ලොක්කාගේ කල්ලිය පිළිබඳව පොලිසියට ඔත්තු සපයන්නෙක් ලෙස ද මොහු කටයුතු කර ඇත.
අංගොඩ ලොක්කාව ඉන්දියාවේ දී ඝාතනය කිරීම සඳහා සැලසුමක් සකස් කර ඇතැයි පැවසෙන්නේ ද චිටී විසිනි. අංගොඩ ලොක්කා අතින් ඝාතනය වූ රත්තරන් නමැත්තාගේ බිරිය ඉන්දියාවට යවා අංගොඩ ලොක්කාගේ අනියම් බිරියක් බවට පත්කර එම ඝාතනය සිදුකර ඇතැයි කියැවෙන්නේ ද චිටී විසිනි.
අංගොඩ ලොක්කාගේ විශ්වාසය ඇය දිනා අංගොඩ ලොක්කා සිය සිරුර වර්ධනය කර ගැනීමට භාවිත කරන ශක්තිජනක පානයක් අධිමාත්‍රාවෙන් ලබා දී ඇති බව කියැවේ. ඒ තුළින් හටගත් අතුරුආබාධයක් ලෙස හෘද රෝගයෙන් අංගොඩ ලොක්කා මියගොස් ඇති බවත් සඳහන්ය. අංගොඩ ලොක්කා මිය ගිය පසු රෝහලේ බිම දමා තිබුණු ඔහුගේ ඡායාරූපය මෙරට ආරක්ෂක අංශ වෙත එකල ලබා දී තිබුණේ ද චීටි ය.
පොලිස් විශේෂ කාර්ය බළකායේ ගෝනහේන කඳවුරේ නිලධාරීන් 2020 වසරේ නොවැම්බර් මස වැලිගම දී අල්ලාගත් හෙරොයින් කිලෝ 112 පිටුපස ද චීටි සිටි බව එකල පොලිසිය සඳහන් කළේය.
ඒ සම්බන්ධයෙන් සහ තවත් අපරාධ රැසක් සම්බන්ධයෙන් චිටීව මෙයට පෙර අවසන් වරට අත්අඩංගුවට ගෙන තිබුණේ 2021 වසරේ අප්‍රේල් 08 වැනිදාය. පොලිස් විශේෂ කාර්ය බළකාය විසින් ඔහුව අත්අඩංගුවට ගෙන තිබුණේ අංගොඩ, දෙල්ගහවත්තේ පිහිටි නිවසේ රැඳී සිටියදීය. එම නිවසේ ඔහු භූගත බංකරයක් පවා සකස් කර තිබී සොයාගත්තේය.
සැකකරු කොළඹ අතිරේක මහේස්ත්‍රාත් තරංගා මහවත්ත මහත්මිය හමුවට ඉදිරිපත් කිරීමෙන් අනතුරුව ලබන 4දා තෙක් රඳවා ප්‍රශ්න කිරීමට මුල්ලේරියාව පොලිසියට ඊයේ (29) අවසර දුන්නාය.
ගයාන් කුමාර වීරසිංහ, නිමන්ති රණසිංහ