ලෝකයෙන් මැලේරියා රෝගය තුරන් වන තෙක් මැලේරියා රෝග ආවේක්ෂණය ඉතා ශක්තිමත්ව රට තුළ පවත්වාගෙන යා යුතු බව සෞඛ්ය අමාත්යාංශයේ ලේකම් විශේෂඥ වෛද්ය පාලිත මහීපාල මහතා පැවසීය.
අවුරුදු 30කට පසු ලෝකයේ රටක් මැලේරියාව තුරන් කළේ නම් ඒ ශ්රී ලංකාව බවත් 2016 වර්ෂයේදී මැලේරියාව, බරවා රෝග මෙරටින් තුරන් කළ බවත් ඒ මහතා ප්රකාශ කළේය.
ලෝක මැලේරියා දිනය පසුගියදාට (25) යෙදුණු අතර ඒ නිමිත්තෙන් ජාතික උත්සවය සෞඛ්ය හා කර්මාන්ත ඇමැති වෛද්ය රමේෂ් පතිරණ මහතාගේ පූර්ණ ආශීර්වාදය සහ මඟ පෙන්වීම යටතේ සෞඛ්ය අමාත්යාංශයේ ලේකම් විශේෂඥ වෛද්ය පාලිත මහීපාල මහතාගේ ප්රධානත්වයෙන් කුරුණෑගල මැලේරියා මර්දන ප්රාදේශීය ඒකක පරිශ්රයේදී පැවැත්විණි. ‘‘වඩා සාධාරණ ලෝකයක් සඳහා මැලේරියාවට එරෙහි සටන වේගවත් කිරීම’’ මෙවර ලෝක මැලේරියා මර්දන වැඩසටහනේ තේමාව විය. මේ සඳහා දිස්ත්රික්ක 25ට අදාළව මැලේරියා මර්දන ව්යාපාරයේ ප්රාදේශීය ඒකක 27 නියෝජනය කරමින් සෞඛ්ය වෘත්තිකයෝ සහභාගි වූහ. ලෝක සෞඛ්ය සංවිධානය විසින් ශ්රී ලංකාව මැලේරියාවෙන් තොර රටක් ලෙස 2016 වර්ෂයේදී ඊට අදාළ සහතිකය ලබා දෙන ලදි. 2023 වර්ෂයේදී මෙරටින් මැලේරියා රෝගීන් 62ක් වාර්තා වී ඇති අතර එම රෝගීන්ගෙන් බහුතරයක් අප්රිකානු රටවල සංචාරය කර පැමිණි අය වේ. මෙරට පළමු මැලේරියා මර්දන ඒකකය 1911 වර්ෂයේදී ආරම්භ කළ අතර ජාතික උත්සවය පවත්වන ලද්දේ එම මැලේරියා මර්දන ඒකක පරිශ්රයේ වීම විශේෂත්වයකි.
මෙම අවස්ථාවට වයඹ පළාත් ප්රධාන ලේකම් දීපිකා ගුණරත්න, නියෝජ්ය සෞඛ්ය සේවා අධ්යක්ෂ ජනරාල් එස්.එම්. ආනල්ඩ්, මැලේරියා මර්දන ව්යාපාරයේ අධ්යක්ෂිකා වෛද්ය චම්පා අලුත්වීර, වයඹ පළාත් නියෝජ්ය සෞඛ්ය සේවා අධ්යක්ෂ විශේෂඥ වෛද්ය ඉනෝකා වීරසේන, කුරුණෑගල ප්රාදේශීය සෞඛ්ය සේවා අධ්යක්ෂ වෛද්ය පමිල් අධිකාරි, පුත්තලම ප්රාදේශීය සෞඛ්ය සේවා අධ්යක්ෂ වෛද්ය අමිල මදුරංග මහත්ම මහත්මීහු ද විශේෂඥ වෛද්යවරුන්, වෛද්යවරුන්, හෙද හෙදියන් ඇතුළු සෞඛ්ය වෘත්තිකයෝ පිරිසක් සහභාගි වූහ.
සන්ධ්යා කරුණාරත්න