කළුතර, උතුරු උග්ගල්බඩ මවුන්ටන් විලේජ්චි පදිංචි පේමත්තුහේවාගේ ප්‍රේමචන්ද්‍ර මහතා මුළු දිවයිනටම බලපාන පරිදි සාමදාන විනිශ්චකාරවරයකු ලෙස කළුතර දිසා අධිකරණයේ අතිරේක දිසා විනිසුරු සම්පත් ගමගේ මහතා ඉදිරියේ පසුගියදා දිවුරුම් දුන්නේය. ගා/ඇ/දිවිතුර ධම්මතිලක විද්‍යාලයෙන් මූලික අධ්‍යාපනය ලැබ ගාල්ල කාර්මික හා තාක්ෂණික විද්‍යාලයේ වෘත්තීය අධ්‍යාපනය හැදෑරූ ප්‍රේමචන්ද්‍ර මහතා 1991 වර්ෂයේ ශ්‍රී ලංකා ගුවන් හමුදාවට බැඳී වසර 22ක සේවා කාලයකින් පසුව 2013 වර්ෂයේ බලලත් නිලධාරීවරයෙක් ලෙස විශ්‍රාම ලැබීය. ඒ මහතා රට දැය වෙනුවෙන් හමුදා ක්‍රියාන්විත සේවයේ යෙදෙමින් අවසන් මානුෂීය මෙහෙයුමට හා තවත් මෙහෙයුම් රැසකට සහභාගී වෙමින් පූර්ණ භූමි පදක්කම – 2003, රිවිරැස මෙහෙයුම පදක්කම ඇතුළු පදක්කම් රැසක් හිමි කරගෙන ඇත.
දැනට ශ්‍රී ලංකන් ගුවන් සමාගමේ ජ්‍යෙෂ්ඨ ආරක්ෂක සහායක නිලධාරීයකු ලෙස සේවයේ යෙදෙන අතර ප්‍රේමචන්ද්‍ර මහතා කාර්මික කළමනාකරණ ඩිප්ලෝමා පාඨමාලා කීපයක් හදාරා ඇත. ඒ මහතා පොදු කටයුතු හා විවිධ සමාජ සේවා කටයුතුවල ද නිරත වන අතර කළුතර උග්ගල්බඩ ත්‍රිවිධ හමුදා විශ්‍රාමික රණවිරු සංගමයේ වත්මන් සභාපතිවරයාද වෙයි. දිලෙන තරු ක්‍රීඩා සමාජයේ ලේකම් ලෙසත් සමාජ මෙහෙවරේ යෙදෙයි.
