මැතිවරණ දෙපාර්තමේන්තුව ආබාධිත ඡන්ද දායකයන් වෙත මෙවර හැඳුනුම්පත් ලබාදීමේ වැඩසටහන යටතේ ගාල්ල දිස්ත්‍රික්කය තුළ මේ වන විට එවැනි හැඳුනුම්පත් 300ක් නිකුත් කර ඇතැයි ගාල්ල දිස්ත්‍රික් නියෝජ්‍ය මැතිවරණ කොමසාරිස් ඩබ්ලිව්.එච්.කේ. විජයකුමාර මහතා පැවසීය.
මෙම වැඩසටහන යටතේ ගෙවී ගිය මාස තුන ඇතුළත තම කාර්යාලය විසින් ගාල්ල දිස්ත්‍රික්කයේ ප්‍රාදේශීය ලේකම් කාර්යාලවලට ගොස් නියමිත දත්ත ලබාගෙන මෙම හැඳුනුම්පත් නිකුත් කරන ලද බවත්, මෙම මාසයෙන් පසු එකී කටයුත්ත අවසන් කරන බවත් කී ඒ මහතා, ඉන් පසුවත් තම කාර්යාලයට ඉදිරිපත් කරන ඉල්ලීම් සඳහා දිගටම ක්‍රියා කරන බව ද කීය.
මෙම හැඳුනුම්පත මැතිවරණ සඳහාම නිකුත් කරන බවත්, මෙය ඉදිරිපත් කරමින් ඕනෑම මැතිවරණයකදී ආබාධිත පිරිස් වෙත ලබා දෙන පහසුකම් සියල්ලම ලබා ගත හැකි බවත් ඔහු කියා සිටියේය. වෙනදා එක් එක් මැතිවරණ සඳහා වෙන වෙනම ග්‍රාම සේවා නිලධාරී මඟින් ලිපි ඉදිරිපත් කර අවශ්‍ය අවසර ලබාගත යුතුව තිබුණත් මෙම නව හැඳුනුම්පත හේතුවෙන් කිසිදු අපහසුතාවකින් තොරව ජන්ද දැමීම සිදු කළ හැකි බවද ඔහු පෙන්වා දුන්නේය.
මේ යටතේ ප්‍රවාහනය ඇතුළු සියලුම පහසුකම් මෙන්ම ජන්ද මධ්‍යස්ථානයෙන් යොදන සියලුම පහසුකම් ලැබෙන බවද ඔහු වැඩිදුරටත් සඳහන් කළේය.
ගාල්ල දිසා සමූහ - නන්දසිරි වැලිගමගේ