සහස්යා ඉන්වෙස්ට්මන්ට් සමාගමේ ප්රධාන කාර්යාලය මහාමාර්ග අමාත්යාංශයට අයත් ගොඩනැඟිලි පරිශ්රය තුළ විවෘත කිරීම මෙහෙයුම් කටයුතුවලට වඩාත් පහසුවක් වනු ඇතැයි ප්රවාහන මහාමාර්ග හා ජනමාධ්ය ඇමැති ආචාර්ය බන්දුල ගුණවර්ධන මහතා පැවසීය.
ප්රවාහන හා මහාමාර්ග අමාත්යාංශය යටතේ ක්රියාත්මක අධිවේගී මාර්ග ජාලය කළමනාකරණය කිරීම සඳහා පිහිටුවන ලද සහස්යා ඉන්වෙස්ට්මන්ට් ආයතනයේ ප්රධාන කාර්යාලය බත්තරමුල්ල කොස්වත්ත පිහිටි ‘මඟ නැඟුම මහ මැදුර’ පරිශ්රයෙහි හත්වැනි මහලෙහි ස්ථාපිත කර විවෘත කිරීම ඇමැතිවරයාගේ ප්රධානත්වයෙන් සිදු කෙරුණු අතර එහිදී ඇමැතිවරයා මේ බව පැවසීය.
මාර්ග සංවර්ධන අධිකාරිය සතු අධිවේගී මාර්ග පද්ධතිය සහ එහි වත්කම් ඉදිරියේදී සහස්යා ඉන්වෙස්මන්ට් සමාගම යටතට පත් කිරීමට නියමිත අතර පූර්ණ රාජ්ය ආයතනයක් ලෙස එහි මෙහෙයුම් කටයුතු ක්රියාත්මක වනු ඇත.
මෙහිදී අදහස් දැක්වූ ඇමැතිවරයා මෙසේද පැවසීය.
අපේ රටේ ඉතිහාසයේ ගමන් මඟ වෙනස් කරමින් මාර්ග සංවර්ධන අධිකාරිය දීර්ඝ කාලයක් තිස්සේ මෙරට අධිවේගී මාර්ග පද්ධතිය ඉදිකර නඩත්තු කර පවත්වාගෙන යෑමේ කාර්යභාරය ඉටු කරනු ලැබුවා. නමුත් මතුව තිබෙන තත්ත්වය තුළ මාර්ග සංවර්ධන අධිකාරියේ ශේෂ පත්රය ප්රතිව්යුහගතකරණය සඳහා වන ජාතික වැඩසටහන යටතේ අධිවේගී මාර්ග පද්ධතිය මාර්ග සංවර්ධන අධිකාරියෙන් වෙන්කර 100% රජය සතු ආයතනයක් ලෙස සහස්යා ඉන්වෙස්මන්ට් සමාගම තුළින් වාණිජමය වශයෙන් වඩාත් ඵලදායි සහ කාර්යක්ෂම සේවාවක් ලබාදීම සඳහා මුදල් අමාත්යාංශය ඇතුළු රාජ්ය ප්රතිපත්ති සම්පාදකයන් කටයුතු කර තිබෙනවා.100% රජය සතු, මුදල් අමාත්යාංශය යටතේ ක්ෂණිකව ව්යාපාරික තීන්දු තීරණවලට එළඹීමේ ශක්යතාවයෙන් යුතු සමාගමක් ලෙස සහස්යා ඉන්වෙස්ට්මන්ට් සමාගම ස්ථාපිත කර තිබෙනවා. එහි සභාපතිවරයා ලෙස කටයුතු කරනු ලබන්නේ ප්රවාහන හා මහාමාර්ග අමාත්යාංශයේ ලේකම්වරයායි. එහි ප්රධාන මෙහෙයුම් නිලධාරි ලෙස කටයුතු කරන්නේද මාර්ග සංවර්ධන අධිකාරියේ දශක දෙකකට අධික කාලයක් පළපුරුදු සහිත ජ්යෙෂ්ඨ ඉංජිනේරුවෙක්. මුදල් අමාත්යාංශය සහ අනෙකුත් රාජ්ය ආයතන නියෝජනය වන අධ්යක්ෂ මණ්ඩලයක් ඊට පත්කර තිබෙනවා. පවතින අධිවේගී මාර්ග පද්ධතිය පවත්වාගෙන යෑම, තවදුරටත් සංවර්ධනය සඳහා වන උපායමාර්ගික ක්රමවේද තීරණය කිරීම, පිරිවැය අවම කර ගැනීම සඳහා නවීන තාක්ෂණික ක්රමවේදයන් උපයෝගී කර ගැනීමත් ඒ තුළින් ඵලදායි සහ කාර්යක්ෂම අධිවේගී මාර්ග පද්ධතියක් කරා රට යොමු කිරීම මෙහි ප්රධාන පරමාර්ථයයි.
ඒ වෙනුවෙන් සහස්යා ඉන්වෙස්ට්මන්ට් සමාගමේ ප්රධාන කාර්යාලය මහා මාර්ග අමාත්යාංශයට අයත් ගොඩනැඟිලි පරිශ්රය තුළ විවෘත කිරීම මෙහෙයුම් කටයුතුවලට වඩාත් පහසුවක් වනු ඇති.
අධිවේගී මාර්ග පද්ධතිය වෙනුවෙන් දැනට ගෙවීමට නියමිතව පවතින බිලියන 860කට අධික ණය ප්රමාණය ගෙවා දැමීම සඳහා වාණිජමය වශයෙන් ඵලදායි ලෙස පවතින වත්කම් වඩාත් ප්රශස්ත ලෙස කළමනාකරණයේ දැඩි අවශ්යතාවයක් පවතිනවා. නමුත් සාම්ප්රදායික රාජ්ය ආයතන ව්යුහය තුළ එම අවශ්යතාවය ඉටු කිරීම අපහසු බැවින් වඩාත් ඵලදායි ලෙස තීරණ ගත හැකි රාජ්ය සමාගමක් ලෙස මේ ආයතනය ක්රියාත්මක වනු ඇති. එලෙස කටයුතු කිරීම තුළින් රටට බරක් නොවන, රටට සම්පතක් වන අධිවේගී මාර්ග පද්ධතියක් පවත්වාගෙන යා හැකිවනු ඇත.
ප්රවාහන හා මහාමාර්ග අමාත්යාංශ ලේකම් රංජිත් ගංගානාත් රූබසිංහ, ප්රධාන මෙහෙයුම් නිලධාරී ජ්යෙෂ්ඨ ඉංජිනේරු කේ. ඩබ්ලිව්. කණ්ඩම්බි, ප්රධාන මූල්ය නිලධාරී පී. ආර්.බී. සුමංගලී, මාර්ග සංවර්ධන අධිකාරියේ සභාපති චමින්ද අතුලුවගේ, අධ්යක්ෂ ජනරාල් ප්රියන්ත සූරිය බණ්ඩාර මහත්ම මහත්මින් ඇතුළු, සහස්යා ඉන්වෙස්ට්මන්ට් සමාගමේ අධ්යක්ෂ මණ්ඩල සාමාජිකයන්, ප්රවාහන හා මහාමාර්ග අමාත්යාංශය යටතේ ක්රියාත්මක ආයතනවල ප්රධානීන් මෙම අවස්ථාවට එක්ව සිටියහ.