ශ්‍රී ලංකා ස්පෝට්ස් ගෘෘප් පුද්ගලික සමාගම සංවිධානය කරන ‘ලංකා පාපන්දු කුසලාන‘ තරගාවලිය මැයි මස 4 වැනිදා කොළඹ සිටිලීග් පිටියේදී ආරම්භ වෙයි. යාපනය, කොළඹ, කලුතර, මීගමුව, මහනුවර, මධ්‍යම, නැඟෙනහිර හා ගාල්ල යන පාපන්දු ක්‍රීඩා සමාජ 8ක් මෙම තරගාවලියට එක්වෙති. මෙම කණ්ඩායම්වලට ජාතික පිල නියෝජනය කළ හෝ නොකළ ඕනෑම ක්‍රීඩකයෙකුට සහභාගීවිය හැකිවීම විශේෂත්වයකි.
ජයග්‍රාහී කණ්ඩායමට රුපියල් මිලියනයක් හා අනුශූර කණ්ඩායමට රුපියල් ලක්ෂ 5ක් පිරිනමන මෙම තරගාවලිය කොළඹ පාපන්දු සමාජයේ නිර්මාතෘ හා එක්ස්පෝ ලංකා කළමනාකාර අධ්‍යක්ෂ සායිෆ් යූසුප් මහතාගේ සංකල්පයක් අනුව සංවිධානය වේ. පාපන්දු තරග මේ කාලයේදී ශ්‍රී ලංකාවේ ඉතාම අවම තත්ත්වයක පවතින බැවින් ක්‍රීඩාව ප්‍රවර්ධනය උදෙසා මෙම තරගාවලිය සංවිධානය කරන බව සායිෆ් යූසුප් මහතා ඊයේ කොළඹදී පැවැති මාධ්‍ය හමුවකදී පැවැසීය.
මැයි 4 දා සිට සෑම සති අන්ත දින දෙකකදීම කොළඹ සිටිලීග් පිටියේදී තරග දෙක බැගින් පැවැත්වෙන අතර, අවසන් මහා තරගය මැයි මස 18 වැනිදා පැවැත්වීමට කටයුතු සංවිධානය කොට තිබේ.
අන්තර්ජාතික පාපන්දු සම්මේලනයේ නීතිරීති අනුව මෙම තරගාවලිය පැවැත්වීමට කටයුතු යොදා ඇති අතර, තරග කමිටු ලේකම් ලෙස ප්‍රේමදාස මහතා කටයුතු කරයි.
ප්රින්ස් ගුණසේකර
