ඉතිහාසයේ නොතිබුණු විශාලම මැයි දින රැලිය මෙවර පැවැත්වීමට හැකියාව ලැබෙන බවත් මේ වසරේ මේ රටේ වැඩ කරන ජනතාවට කම්කරුවා කියන ආමන්ත්‍රණය නතර කරන බවත් කම්කරු හා විදේශ රැකියා ඇමැති මනූෂ නානායක්කාර මහතා පෙරේදා (27) ප්‍රකාශ කළේය.
ඒ මහතා මේ බව පැවසුවේ පෙරේදා (28) සිරිකොත පක්ෂ මූලස්ථානයේ පැවති මාධ්‍ය හමුවට එක්වෙමිනි.
එහිදී වැඩිදුරටත් ඇමැති මනූෂ නානායක්කාර මහතා මෙසේද පැවසීය.
යාපනයේ සිට මාතර හම්බන්තොට ආදී සියලුම දිස්ත්‍රික්කවලින් ජනතාව බස්වලින් කොළඹට එන්න සැලසුම් කර තිබෙනවා. ඒ වගේම පෞද්ගලිකවත් ජනතාව පස්වරු දෙකට එජාපයේ මැයි දිනයට සහභාගි වෙන්න තීරණය කර තිබෙනවා. ඉතිහාසයේ නොතිබුණු විශාලතම මැයි දින රැලිය පැවැත්වීමට අපට හැකියාව ලැබෙනවා. ඒ වගේම රටේ වැඩ කරන ජනතාවට කම්කරුවා කියා ආමන්ත්‍රණය කරන අවසන් වසර මෙය බව අපි සඳහන් කළ යුතුයි. දමිළ කම්කරුවන් මේ රටට පැමිණි දා සිටම විවිධ අණ පනත් කම්කරු නීතිරීති මේ රටේ සම්මත වුණා. පසුගිය මැයි දිනයේදී අපි ජනාධිපතිගේ අවසරයත් එක්ක අලුත් පනතක් ගෙන එන්න තීරණය කළා. ඒ පනත එන්නේ කම්කරු පනතක් ලෙස නොවෙයි, රැකීරක්ෂා පනතක් ලෙසයි. ඒ තුළදී වෙනස් ආකාරයක නීතිරීතිවලින් රැකී රක්ෂා කරන පිරිස ආරක්ෂා කරගන්න අපි පියවර ගන්නවා කියන එක මතක් කළ යුතුයි. ඒ අනුව ස්මාර්ට් ශ්‍රමිකයෙක් බිහිකරන වැඩපිළිවෙළක් ක්‍රියාත්මක වෙනවා. කම්කරු අමාත්‍යාංශයත් රැකීරක්ෂා අමාත්‍යාංශය බවට පත්වීමට නියමිතයි. ඒ වගේම මේ රැකීරක්ෂා පනතින් ව්‍යවසායකත්වයට මුල් තැන දෙන ආයෝජනය කිරීම පහසු කරන ආකාරයට නීති රීති අණ පනත්වලින් සමන්විතයි කියන එක මම මතක් කරන්න අවශ්‍යයි.
සමගි ජන බලවේගයේ ඉන්න බොහෝ පිරිසක් එජාපයේ මූලයන්ගෙන් පැවත එන කට්ටියක්. නම වෙනස් වුණා ඔවුන් යම්කිසි ආකාරයකට එජාපයෙන් වෙන්වෙලා යන වෙලාවේ. නමුත් ඔවුන්ගේ අදහස් ඒ ආර්ථික දර්ශනය සියල්ලක්ම එජාපයේම විදියට තමයි අපට හඳුන්වන්න පුළුවන්. නමුත් ඒක පසුකාලීනව වෙනස් වෙනවා. පොදුජන පෙරමුණේ සහ ගෝඨාභය රාජපක්ෂ ජනාධිපතිවරයා දිනවන්න ඉදිරිපත් වුණු වියත් මඟ වැනි සංවිධානවල පිරිසක් ඇවිත් සමගි ජන බලවේගයේ අදහස් වෙනස් කර, ඔවුන්ගේ මතවාද ආකල්ප වෙනස් කර, සමගි ජන බලවේගය එජාපයෙන් වෙනස් පක්ෂයක් බවට පත්කර තිබෙනවා. ඒ නිසා සමගි ජන බලවේගයේ ඉන්න එජා පාක්ෂිකයන් එක්සත් ජාතික පක්ෂයට එකතු වෙනවා. අපි රට වටේම යනවා. දිස්ත්‍රික්ක මට්ටමෙන් ප්‍රාදේශීයව සමගි ජන බලවේගයේ පිරිස් එක්සත් ජාතික පක්ෂයට නැවතත් එකතු වෙමින් ඉන්නවා. යථාර්ථය ඒක තමයි. ඒක පුදුමයක් නොවෙයි.
නෙත්මි පූජනී රත්නායක සහ මැද කොළඹ සමූහ ආරියරත්න ගනේගොඩ