කැබිතිගොල්ලෑව, රඹකැපුවැව ගම්මානයේ පැවැති බණ පොළේ වෙන්දේසියේ ගීතයක් ගායනා කිරීමට ඉල්ලා දෙපිරිසක් අතර ඇති වූ බහින් බස් වීමක් දුර දිග ගොස් පොලු පහරක් වැදී දෙදරු පියෙකු ඉකුත් 26 වැනිදා මියගොස් ඇති බව කැබිතිගොල්ලෑව මූලස්ථාන පොලිසිය පවසයි.
මෙලෙස මියගොස් ඇත්තේ බද්ධරාලගේ සමන් ජානක කුමාර නමැති තිත්තගෝණෑව, කැබිතිගොල්ලෑව ලිපිනයේ පදිංචි 45 හැවිරිදි, තැපැල් දෙපාර්තමේන්තුවේ රාජකාරි කළ දෙදෙරු පියෙකි.
පසුගිය මාර්තු මස 28 වැනිදා කැබිතිගොල්ලෑව, රඹකැපුවැව ගම්මානයේ බණ පින්කම් මාලාවක් පැවැත්විණි. එයට සහභාගි වීම සඳහා අයිතිගේවැව ගම්මානයේ තරුණයින් පස් දෙනෙකු සහ තිත්තගෝණෑව ගම්මානයේ තරුණයින් රැසක්ද පැමිණ තිබිණි. එම බණ පොළේ රාත්‍රී 9.00ට පමණ ගීත වෙන්දේසිය ආරම්භ කර ඇත. අනතුරුව එම ගීත ඉල්ලා අයිතිගේවැව ගම්මානයේ තරුණයින් හා තිත්තගෝණෑව ගම්මානයේ තරුණයින් අතර බහින්බස් වීමක් සිදුව ආරවුල් තත්ත්වයක් හටගෙන ඇත. අනතුරුව එය සමතයට පත් කිරීමට සංවිධායක මණ්ඩලය කටයුතු කර තිබිණි.
ඉන් පසු රාත්‍රී 12.30ට පමණ මෙම දෙපිරිසම බණ පොළින් පිටත්වී නිවෙස් කරා පැමිණ ඇත. එසේ ගමන් කරමින් සිටියදී සියඹලාගස්වැව හන්දියේදී නැවතත් මෙම දෙපිරිස මුහුණට මුහුණ හමු වී ඇත. එහිදී දෙපිරිස අතර ගුටි බැට හුවමාරුවක්ද සිදු වී ඇති බව පොලිසිය පවසයි. අනතුරුව එම ගුටි බැට හුවමාරුවද නතර වී ඇත.
ඊට පසු සමන් ජානක කුමාර නමැති මියගිය පුද්ගලයා ඒ අසල තිබුණු බෝකකු කණුවක් මත වාඩි වී සිට ඇත. එක්වරම පිටුපසින් පැමිණි පුද්ගලයෙකු මෙම මියගිය පුද්ගලයාගේ හිසට පොල්ලකින් පහර දී පලා ගොස් තිබිණි. පහර දීමෙන් බරපතළ තුවාල ලැබූ එම පුද්ගලයා කැබිතිගොල්ලෑව මූලික රෝහලට ඇතුළත් කිරීමෙන් අනතුරුව අනුරාධපුර ශික්ෂණ රෝහල වෙත වැඩිදුර ප්‍රතිකාර සඳහා මාරු කර යැවූ බවත් ඒ වන විටත් පහර කෑමට ලක් වූ පුද්ගලයාගේ සුෂුම්නාව දැඩි ලෙස හානියට පත්වී තිබූ බවත් රෝහල් බලධාරීහු පවසති.
අනතුරුව මසකට ආසන්න කාලයක් අනුරාධපුර රෝහලේ නේවාසික ප්‍රතිකාර ලබමින් සිටි පසුගිය 26 වැනිදා සවස රෝහලේදීම මිය ගොස් තිබිණි.
කැබිතිගොල්ලෑව ජ්‍යෙෂ්ඨ පොලිස් අධිකාරි එම්.එස්.කේ. වික්‍රමනායක මහතාගේ උපදෙස් පරිදි කැබිතිගොල්ලෑව මූලස්ථාන පොලිස් ස්ථානාධිපති චමිල රත්නායක මහතා ප්‍රමුඛ විශේෂ පොලිස් කණ්ඩායමක් මේ පිළිබඳ විමර්ශනය ආරම්භ කර අප්‍රේල් මස 07 වැනි දින මරණය සිදු කළා යැයි සැක කරන අයිතිගේවැව, කැබිතිගොල්ලෑව ලිපිනයේ පදිංචි කෝවිල් ආරච්චිගේ සෙව්වන්ද ලක්මාල් නමැති 22 හැවිරිදි තරුණයා සහ පහර දුන් පොල්ල කැබිතිගොල්ලෑව මහේස්ත්‍රාත් අධිකරණයට ඉදිරිපත් කර ඇත. අනතුරුව සැකකරු රක්ෂිත බන්ධනාගාරගත කර ඇති බව පොලිසිය පවසයි.
කැබිතිගොල්ලෑව සමූහ එස්.ජී. උබේපාල