අවුරුදු උත්සවයක ග්රීස් ගහේ ජය කොඩිය ගන්නා ජයග්රාහකයා කවුරුන්දැයි දැක ගැනීමට සියල්ලෝම ඒ දෙස අවධානයෙන් දෑස් දල්වාගෙන උඩ බලාගෙන සිටි තීරණාත්මක නිමේෂයේදී අවුරුදු උත්සවයේ සංවිධායක මණ්ඩලයේ භාණ්ඩාගාරික සන්තකයේ තිබූ රුපියල් පන්ලක්ෂ පනස් දහසක මුදලක් (550,000) සොරකම් කරගෙන ගිය පුද්ගලයකු අත්අඩංගුවට ගැනීම සඳහා පුළුල් විමර්ශනයක් ආරම්භ කර ඇතැයි රක්වාන පොලිසිය සඳහන් කළේය.
ඉකුත් 21 වැනිදා මාදම්පේ හන්දියේ දී සිංහල සහ හින්දු අලුත් අවුරුද්ද සමරා අවුරුදු උත්සවයක් පැවැත්විණි. ඒ මාදම්පේ හන්දියේ වෙළෙඳ ප්රජාවගේත්, අවට ගම්වාසීන්ගේත් නොමසුරු මුදල් පරිත්යාගයෙන්.
එදින උදේ කාලයේ සිට අවුරුදු උත්සවය පැවැත්විණි. ජාතික ජන ක්රීඩා රැසකින් සපිරුණු තරග රැසක් ද ඊට ඇතුළත් කර තිබිණි. ගම්වාසීන් සහ ඊට සහභාගි වී සිටි බොහෝ පිරිසක් වයස් භේදයක් නොතකා තරග සඳහා සහභාගි වී සතුටට පත් වූහ.
මේ අතර සවස් කාලයේ ලිස්සන ගහේ කොඩිය ගන්නා ජයග්රාහකයා කවුරුන්දැයි දැක බලා ගැනීමේ ආසාවෙන් කවුරුත් විමසිලිමත් වෙමින් ලිස්සන ගහ ආසන්නයට එක් රොක් වූහ. එම උද්වේගකර අවස්ථාව දැක ගැනීමට සංවිධායකයින් මෙන්ම ජනතාවද ප්රීති ඝෝෂා නංවමින් ඔල්වරසන් හඬ දෙමින් ජයග්රාහකයා දිරිමත් කරමින් සිටියහ.
එම උණුසුම් අවස්ථාව නිමා වීමෙන් පසු සංවිධායකයින් අතර යම් කසුකුසුවක් ඇති විය. තවදුරටත් ඒ පිළිබඳ සොයාබැලීමේදී හෙළිදරව් වී ඇත්තේ අවුරුදු උත්සවයේ ජයග්රාහී තරගකරුවන්ට බෙදා දීමට සූදානම් කර තිබූ මුදල් සහිත ත්යාග කවර සහ එදින රාත්රියේ පැවැත්වීමට නියමිතව තිබූ සංගීත රාත්රිය වෙනුවෙන් භාණ්ඩාගාරික භාරයේ තබා තිබූ මුදල් සහිත බෑගය තිබූ තැනින් කිසිවෙකු හෝ සොරකම් කරගෙන ගොස් ඇති බවයි. එම බෑගයේ රුපියල් පන්ලක්ෂ පනස් දහසක මුදලක් තිබූ බවද අනාවරණය වී ඇත.
පසුව මේ පිළිබඳව සංවිධායක මණ්ඩලය රක්වාන පොලිසියට පැමිණිලි කර තිබූ අතර, සිද්ධිය සම්බන්ධයෙන් රක්වාන පොලිසියේ අපරාධ අංශයේ කණ්ඩායමක් මූලික විමර්ශන ආරම්භ කළේය. එහිදී පොලිසියට අනාවරණය වී ඇත්තේ සැකකරුගේ දේහ ලක්ෂණවලට සමාන පෙනුමක් ඇති වයස අවුරුදු තිහක් පමණ වන පුද්ගලයෙකු එදින සවස ගොඩකවෙල නගරයේ රෙදිපිළි වෙළෙඳසලකට ගොස් අලුත් ඇඳුම් මිලදී ගෙන පිටෝන් කාමරයකදී ඇඳ ගැනීමෙන් පසු සැකකරු ඇඳ සිටි පරණ ඇඳුම් එම කාමරයේ තබා පිටවී ගොස් ඇති බවයි. එම සිදුවීම වෙළෙඳසලේ සවිකර තිබූ සී.සී.ටී.වී. කැමරා පද්ධතියේ සටහන්ව තිබූ බවද පොලිසිය සඳහන් කළේය.
සැකකරු ගලවා දමා ගොස් තිබූ දිග කලිසමක් සහ කමිසයක් පොලිසිය සිය භාරයට ගෙන ඇති අතර, එම මුදල් මංකොල්ලයේ සැකකරු අත්අඩංගුවට ගැනීම සඳහා රක්වාන පොලිසියේ අපරාධ අංශයේ ස්ථානාධිපති පොලිස් පරීක්ෂක පී.වී. වික්රමපාල, පො.සැ. (38838) නන්දන සහ (32292) විජේරත්න යන නිලධාරීන් පැති කිහිපයක් ඔස්සේ පරීක්ෂණ සිදු කරන බවද පොලිසිය සඳහන් කළේය.
රක්වාන - ඉන්දික සී. කුමාර