ඉන්දීය ප්‍රීමියර් ලීග් ක්‍රිකට් තරගාවලියේ නිල විකාශන සමාගමේ අනුමැතියකින් තොරව නීති විරෝධී ලෙස තරග විකාශනය කිරීමෙන් හා ඔන්ලයින් ඔට්ටු ඇල්ලීමේ යෙදුමක් ප්‍රවර්ධනය කිරීම සම්බන්ධයෙන් ඊයේ මහාරාෂ්ට්‍ර සයිබර් පොලිසියට කැඳවූ ජනප්‍රිය චිත්‍රපට නිළි තමන්නා භාටියා ප්‍රකාශයක් ලබාදීමට වෙනත් දිනයක් ඉල්ලයි.
මේ පිළිබඳව චිත්‍රපට නිළිය තවමත් මාධ්‍ය වෙත ප්‍රකාශයක් නිකුත් කර නැතත්, පොලිසිය හමුවේ පෙනී සිටීමට ඉදිරි දිනයක් ලබා දෙන ලෙස ඉල්ලා තිබේ. මෙම ඔට්ටු ඇල්ලීමේ සිද්ධිය සම්බන්ධයෙන් ප්‍රශ්න කිරීම සඳහා පෙනී සිටින ලෙස තමන්නා භාටියාට මහාරාෂ්ට්‍ර සයිබර් පොලිසිය කල් ඇතිව දැනුම් දුන්නේය. මහාරාෂ්ට්‍ර සයිබර් පොලිසිය මීට පෙර සංජේ දත්ට ද පසුගිය සතියේ පෙනී සිටින ලෙස දන්වා තිබූ නමුත් ඔහුගේ රූගත කිරීම් කාලසටහන හේතුවෙන් යැයි පවසා පසුව දිනයක් ඉල්ලා සිටියේය.
මෙම ඔට්ටු ඇල්ලීමේ සිද්ධිය කිරීම සම්බන්ධයෙන් චිත්‍රපට නළු සාහිල් ඛාන් පෙරේදා මුම්බායි පොලිසිය අත්අඩංගුවට ගත් අතර, අත්අඩංගුවට නොගන්නා ලෙස ඔහු විසින් කරන ලද ඉල්ලීමක් මුම්බායි මහාධිකරණය ප්‍රතික්ෂේප කළේය.
අයිපීඑල් තරගවලදී මහාදේව් ඔන්ලයින් ඔට්ටු ඇල්ලීමේ යෙදුම ඩුබායි සිට ක්‍රියාත්මක කොට ඇති බවත්, එමඟින් ඉන්දීය රුපියල් කෝටි ගණනක පාඩුවක් සිදුව ඇතැයි කියන පැමිණිල්ලට අදාලව පොලිස් විමර්ශන ආරම්භ කොට ඇත. චෝදනා ලැබ සිටින නළු නිළියන් වන සංජේ දත්, ජැකලින් ෆර්නැන්ඩස් සහ රැප් ගායක බාද්ෂා සමඟ සම්බන්ධ පුද්ගලයින්ගේ ප්‍රකාශ ද පොලිසිය විසින් සටහන් කර ගෙන ඇත. එම ඔට්ටු ඇල්ලීමේ යෙදුම ප්‍රවර්ධනය කිරීම සඳහා අනුබල දුන් ප්‍රසිද්ධ පුද්ගලයින් 40කට වැඩි පිරිසක් විමර්ශනයට ලක්ව ඇති බව පොලිසිය ප්‍රකාශ කර ඇත.
ප්රින්ස් ගුණසේකර