හාලිඇළ ප්රාදේශීය ලේකම් කොට්ඨාසය තුළ ගම්මිරිස් වගා කරන ගම්මාන රැසක ගම්මිරිස් පත්ර කහ වීමේ රෝගය ව්යාප්ත වීම හේතුවෙන් මෙවර අස්වනු විශාල ලෙස අඩුවී ගොවි පවුල් සිය ගණනක් දැඩි අසීරුතාවයට පත්ව සිටින බව ප්රදේශයේ ගම්මිරිස් ගොවීහු පවසති.
දැනට මාස කිහිපයකට පෙර ඇතැම් ප්රදේශවල ගම්මිරිස් වැල් සීමිත සංඛ්යාවකට වැලඳුණු මෙම රෝගය පසුව කෙමෙන් ව්යාප්ත වූ අතර රෝගයට ගොදුරු වූ ගම්මිරිස් වැල්වල පත්ර කහ පැහැ ගැන්වී වැලෙහි කරටි ගැලවෙමින් ක්රමයෙන් වැල වියළී මැරීයන බවද ගම්මිරිස් වගාවන්හි කරල් හටගෙන තිබියදී මෙම රෝගය ව්යාප්ත වීම නිසා මෝරමින් තිබූ කරල් හැලීගොස් අස්වැන්න විශාල ලෙස අහිමිව ගිය බව ද ඔවුහු පෙන්වා දෙති.
මේ හේතුවෙන් තම ප්රධාන ආදායම් මාර්ගය අහිමිවී යාමෙන් තමන් පත්ව ඇති අසීරුතාවය පිළිබඳව අදහස් දැක්වූ ගොවීහු මෙසේ පැවසූහ.
ආර්.එම්. ජයතිලක මහතා:
හාලිඇළ, පනාකන්නිය, බෝගොඩ, කැටවල, දීගල්ල වගේ මේ ප්රදේශයේ ගම්මාන රැසක ප්රධානම වගාව ගම්මිරිස්. ඒ ප්රදේශවලත් ඊට ආසන්න ඌව පරණගම හා කන්දකැටිය කොට්ඨාසවලට අයත් ගම්මානවලත් ගොවීන් විශාල පිරිසක් ගම්මිරිස් වගාකර තිබෙනවා. මෙතෙක් කල් කිසිදු කරදරයක් නැතිව එයින් හොඳ ආදායමක් ගත්තා. ඒත් මෙවර කරල් හැදීගෙන එද්දිම කහවීමේ රෝගය හැදිලා ගොඩක් වගා විනාශ වුණා. ඒ රෝගය හැදුනම පත්ර කහපාට වී මැරී ගිහින් කරටිත්, කරලුත් වියළිලා හැලී යනවා. සමහර තැන්වල ගස් සීය දෙසීය මැරිල ගියා. ගොවීන් විශාල පිරිසක් මේ නිසා අසරණව සිටිනවා.
ඩී.එම්. සෝමාවතී මහත්මිය:
අපේ ගම් ප්රදේශවල බොහෝ පවුල්වල ප්රධාන ආදායම් මාර්ගය වන්නේ මේ ගම්මිරිස් වගාව. ඒත් මෙවර ගම්මිරිස්වලට වැලඳුණු කහවීමේ රෝගය නිසා වැල් මැරිලා විශාල හානියක් වුණා. කරල් හැදෙන කාලයේ මේ රෝගය ඇතිවුණු නිසා හටගත් කරලුත් වැටිලා ගොවීන්ට ලොකු අලාභයක් සිදු වුණා. මේක තවදුරටත් ව්යාප්ත වුණොත් බොහෝ පවුල්වලට ජීවත් වෙන්න විදිහක් නැති වෙනවා. මේ සඳහා අපනයන කෘෂිකර්ම දෙපාර්තමේන්තුව මඟින් දුන් උපදෙස් අනුව බොහෝ ගොවීන් තමන්ගේ වගාවන් යම් ප්රමාණයකට බේරා ගත්තා. ඒත් විශාල ප්රදේශයක් පුරා හා උස්ව පැතිරුණු ගම්මිරිස් වැල් සඳහා ප්රතිකාර සිදු කිරීමට අමාරුයි. ඒ නිසා බොහෝ වගාවන් බේරා ගැනීමට නොහැකි වුණා. ඒ නිසා මේ රෝගයට ස්ථිර පිළියමක් ලබාදෙන්න කියලයි අපි අදාළ නිලධාරීන්ගෙන් ඉල්ලන්නේ.
එම්.එම්.රෝහිත මහතා:
මේ ප්රදේශය පුරාම බොහෝ වගාවන්ට ගම්මිරිස් පත්ර කහවීමේ රෝගය වැලඳුණා. එකම වගාවේ අතරින් පතර ඇතැම් වැල් පමණක් රෝගයට ගොදුරු වූ අවස්ථා ද තිබෙනවා. මෙය පෑවිල්ලට සිදුවන දෙයක් ලෙසයි ගොවීන් මුලින්ම හිතුවේ. ඒ නිසා මේක පැතිරීම ගැන ගොවීන්ට අවබෝධයක් තිබුණේ නෑ. ගොවීන් මේ සඳහා අපනයන කෘෂිකර්ම නිලධාරීන් විසින් නිර්දේශ කරන ලද ප්රතිකර්ම සිදුකරත් මේ වන විටත් ප්රදේශය පුරා වගාවන්හි ගම්මිරිස් වැල් රාශියක් මෙම රෝගය වැලඳී මැරීගොස් තිබෙනවා. ඒ නිසා අපි අදාළ නිලධාරීන්ගෙන් ඉල්ලා සිටින්නේ මේ සඳහා පහසුවෙන් යෙදිය හැකි සාර්ථක ප්රතිකර්මයක් හඳුන්වා දෙන ලෙසයි.
හාලිඇළ සමූහ - ආර්.එම්. විජේරත්න