වසර 7කට පසු ශ්‍රී ලංකාවේ පැවැත්වෙන පළමු ආසියාතික රග්බි ශූරතාවලිය අද (30) රටවල් 4ක සහභාගිත්වයෙන් කොළඹ තුරඟ තරග පිටියේදී ආරම්භ වේ. ආසියානු 15 සාමාජික රග්බි පළමු කොටසේ ශූරතාවලිය ලෙස පැවැත්වෙන මේ තරගාවලියේ ජයග්‍රහණය අත්කර ගන්නා කණ්ඩායම ලබන වසරේ ආසියානු 15 සාමාජික ප්‍රධාන ශූරතාවලියට සුදුසුකම් ලබන අතර, සත්කාරක ශ්‍රී ලංකාව සමඟ ඉන්දියාව, කසකස්තානය සහ කටාර් රාජ්‍ය කණ්ඩායම් එක් වී සිටී.
පිළිමලුන් පිටුදැකීමේ තරගාවලියක් ලෙස පැවැත්වෙන ආසියානු 15 සාමාජික පළමු කොටසේ රග්බි තරගාවලියේ අවසන් පූර්ව වටයේ තරග අද පැවැත්වෙන අතර, අවසන් මහා තරගය සහ තුන්වැනි ස්ථානය සඳහා තරගය ලබන මැයි මස 4 වැනිදා කොළඹ තුරඟ තරග පිටියේදීම පැවැත්වීමට කටයුතු යොදා ඇත. කසකස්තානය සහ කටාර් රාජ්‍යය අතර පළමු අවසන් පූර්ව තරගය අද පස්වරු 4.00ට පැවැත්වෙන අතර, පස්වරු 7.00ට ශ්‍රී ලංකාව සහ ඉන්දියාව අතර තරගය පැවැත්වේ. අවසන් මහා තරගය මැයි 4 වැනිදා පස්වරු 7.00ටත්, තුන්වැනි ස්ථානය සඳහා තරගය එදිනම පස්වරු 4.00ටත් පැවැත්වීමට නියමිතය.
සුහිරූ ඇන්තනීගේ නායකත්වයෙන් තරග වදින ශ්‍රී ලංකා කණ්ඩායමේ උපනායකයා ලෙස තරින්ද රත්වත්ත කටයුතු කරන අතර, සනත් මාටිස් ප්‍රධාන පුහුණුකරු ලෙසත්, දුෂ්‍යන්ත් ලෙව්කේ ඉදිරිපෙළ ක්‍රීඩකයන්ගේ පුහුණුකරු ලෙසත්, නිල්ෆර් ඉබ්‍රාහිම් පසුපෙළ ක්‍රීඩකයන්ගේ පුහුණුකරු ලෙසත් කටයුතු කරති.
ශ්‍රී ලංකා රග්බි කණ්ඩායම
සුහිරු ඇන්තනී (නායක), තරින්ද රත්වත්ත (උපනායක), තෙනුක නානායක්කාර, සුබේර් දොරේ, වෙනුර කෝදාගොඩ, අදීෂ වීරතුංග, ලසිඳු කරුණාතිලක, රවීන් ද සිල්වා, මනිල්ක රුබේරු, ජනිඳු ප්‍රනාන්දු, ෆායිස් අබ්දුල්ලා, අස්මීර් ෆාජුඩීන්, මොහොමඩ් රිෆාන්, ලහිරු තිලකරත්න, ආකාෂ් මධුශංඛ, හිරන්ත පෙරේරා, සචිත් සිල්වා, චරිත් සිල්වා, දුෂ්මන්ත ප්‍රියදර්ශන, පුලස්ති දිසානායක, ජනිත් ලක්සර, හිරූෂ සම්පත්, තරිඳු චතුරංග, හේෂාන් ජන්සෙන්, කවිඳු ද කොස්තා, දිනාල් ඒකනායක, නාලක මධුරංග, සුදාරක දික්කුඹුර, ස්ටෙෆාන් ග්‍රෙගරි, සෂික ප්‍රනාන්දු.
ෆවුස් මොහොමඩ්
