ශ්රී ලංකා ක්රිකට් ආයතනය සංවිධාන කරන නැෂනල් සුපර් ලීග් (එන්එස්එල්) සිව්දින ක්රිකට් තරගාවලියේ අවසන් මහ තරගය අද (30) ගාල්ල සහ මහනුවර කණ්ඩායම් අතර පල්ලෙකැලේ ජාත්යන්තර ක්රිකට් ක්රීඩාංගණයේදී ආරම්භ වෙයි.
රමේෂ් මෙන්ඩිස්ගේ නායකත්වයෙන් තරග වදින ගාල්ල කණ්ඩායම මූලික වටයේ ප්රසාද ලකුණු සටහනේ පෙරමුණ ගනිමින් අවසන් තරගයට පිවිසි අතර, නිරෝෂන් දික්වැල්ල නායකත්වය දෙන මහනුවර පිල දෙවැනි ස්ථානයෙන් මේ තරගයට එක් විය.
මූලික වටයේදී කණ්ඩායමක් තරග 8ක් ක්රීඩා කළ අතර, තරග 4ක් ජයගත් ගාලු පිල තරග 4ක් ජය පරාජයෙන් තොරව නිමා කර ගත්තේ ප්රසාද ලකුණු 112.215ක් සමඟිනි. ජය සහ පරාජයන් 3 බැගින් හිමි කර ගෙන ඇති මහනුවර ක්රීඩකයෝ තරග 2ක් ජය පරාජයෙන් තොරව නිමා කර ගෙන තිබිණි. ඔවුන්ට හිමිව ඇති ප්රසාද ලකුණු සංඛ්යාව 92.585කි.
තරගාවලියේ මූලික වටයේදී මේ දෙපිල දෙවරක් එකිනෙකා හමුවූ අතර, එහි පළමු තරගය ජය පරාජයෙන් තොරව නිමා වුවද දෙවැනි තරගයෙන් ගාල්ලට කඩුලු 10ක ජයක් අත්විය.
මෙවර තරගාවලියේ පිතිකරුවන් අතර ඉදිරියෙන් සිටින්නේ ගාල්ලේ ඕෂද ප්රනාන්දු (808) සහ පසිඳු සූරියබණ්ඩාර (807)යි. මහනුවර පිල වෙනුවෙන් අහන් වික්රමසිංහ (744) වැඩිම ලකුණු රැස් කරමින් සිව්වැනි තැන සිටින අතර, කමිල් මිෂාර ද එම කණ්ඩායමේ ලකුණුලාභීන් අතර ඉදිරියෙන් සිටී.
තරගාවලිය පුරා කඩුලු 34ක් බිඳ දමමින් වැඩිම කඩුලුලාභියා වන වනුජ සහන් මහනුවර කණ්ඩායම නියෝජනය කරන අතර, දෙවැනි තැන පසුවන නිෂාන් පීරිස් (30) මෙන්ම සිව්වැනියා වන නිමේෂ් විමුක්ති (23) ගාලු කණ්ඩායම සතුය. මහනුවර පිලේ අශේන් ඩැනියෙල් කඩුලු 23ක් සමඟ 5 වැනි ස්ථානයේ සිටී.
කෙසේ වෙතත් මේ තරගයේදී වැඩිම කඩුලුලාභියා වන වනුජ සහන්, අහන් වික්රමසිංහ, චාමික කරුණාරත්න, ළහිරු උදාර සහ කමිල් මිෂාර වැනි ප්රබල ක්රීඩකයන් සංචාරක ඇෆ්ගනිස්තාන ‘ඒ’ කණ්ඩායම සමඟ හම්බන්තොට පැවැත්වෙන එක්දින තරගාවලියට නම් කර තිබීම හේතුවෙන් සහභාගී නොවේ.
නිරෝෂාන් ප්රියංකර