විද්‍යුත් මාධ්‍ය කලාවේ පෙරළියක් ඇති කරමින් මෙරට පළමුවරට සිංහල ප්‍රවෘත්ති විකාශයක් කෘත්‍රිම බුද්ධිය (AI තාක්ෂණය) භාවිත කරමින් ප්‍රේක්ෂකයන්ට ඉදිරිපත් කිරීමට ජාතික රූපවාහිනිය ඊයේ (05) පියවර ගත්තේය. ඊයේ (05) රාත්‍රී 8 ප්‍රවෘත්ති විකාශය රූපවාහිනියේ ප්‍රධානතම නිවේදකයන් යුවළක් වන නිශාදි බණ්ඩාරනායක සහ චමින්ද ගුණරත්න විසින් ඉදිරිපත් කළ නමුත් එහි දී ඒ සඳහා යොදා ගැනුණේ එම දෙදෙනාගේ අනුරුවකි. ඊයේ (05) ප්‍රවෘත්ති විකාශය වැඩි වේලාවක් ඉදිරිපත් කෙරුණේ මෙම අනුරූ මඟිනි. එමඟින් AI තාක්ෂණයේ නවතම අත්දැකීමක් ප්‍රේක්ෂකයන් අතරට ගෙන යාමට ජාතික රූපවාහිනිය ඊයේ (05) කටයුතු කරනු ලැබීය.
AI තාක්ෂණය මිනිසාගේ කටයුතු පහසු කර ගැනීම සඳහා වර්තමානයේ ලෝකය පුරා භාවිත කරන අති නවීනතම සහ ප්‍රමුඛතම තාක්ෂණික මෙහෙයුමක් වෙයි. ශ්‍රී ලංකා රූපවාහිනි සංස්ථාව මඟින් මින් පෙර අවුරුදු චාරිත්‍ර මෙම තාක්ෂණය භාවිත කරමින් ප්‍රේක්ෂක ජනතාව වෙත ලබා දුන් අතර ඊට රට පුරා මෙන්ම ලෝකය පුරා විසිරි සිටින ලක්ෂ සංඛ්‍යාත ප්‍රේක්ෂකයන්ගෙන් ඉහළ ප්‍රතිචාරයක් හිමි විය. එම ප්‍රතිචාර තව දුරටත් රඳවා තබා ගැනීමේ අභිලාෂයෙන් මෙසේ ඊයේ (05) ප්‍රවෘත්ති විකාශයට AI තාක්ෂණය භාවිත කිරීමට කටයුතු කෙරිණි. ජාතික රූපවාහිනි සංස්ථාවේ සභාපති ආචාර්ය ප්‍රසාද් සමරසිංහ මහතාගේ මඟ පෙන්වීම යටතේ ගාමිණි බණ්ඩාර මැණික්දිවෙල විසින් මෙම ප්‍රවෘත්ති විකාශය නිෂ්පාදනය කරනු ලැබීය. ගාමිණි බණ්ඩාර මැණික්දිවෙල මහතා AI තාක්ෂණය සම්බන්ධයෙන් පසුගිය කාල සීමාවේ ඩුබාහි පැවැති විශේෂ පුහුණුවකට එක්වෙමින් ඒ පිළිබඳ හසල දැනුමක් ලබා සිටින නිෂ්පාදකවරයකු වන අතර එම දැනුම මේ වනවිට මෙරට විද්‍යුත් මාධ්‍ය කලාවේ උන්නතිය වෙනුවෙන් ඔහු ලබා දෙමින් සිටියි. ඉදිරියේදී මෙම තාක්ෂණය උපයෝගී කර ගෙන තවත් නවමු අත්දැකීම් ජනතාවට ලබාදීමට ජාතික රූපවාහිනිය කටයුතු කරමින් සිටියි.
