නායක නිශාන් මධුෂ්ක රැස් කළ ශතකය යට කරමින් රියාස් හසන් රැස් කළ ශතකය හේතුවෙන් ශ්‍රී ලංකා ‘ඒ’ කණ්ඩායම සමඟ පැවති සිව්වැනි නිල නොවන එක්දින තරගයෙන් කඩුලු 4ක ජයක් හිමි කර ගැනීමට සංචාරක ඇෆ්ගනිස්තාන ‘ඒ’ කණ්ඩායම සමත් විය.
හම්බන්තොට මහින්ද රාජපක්ෂ ක්‍රීඩාංගණයේ පැවති තරගයේ පළමුව පන්දුවට පහරදුන් ශ්‍රී ලංකා ‘ඒ’ ක්‍රීඩකයෝ කඩුලු 7ක් දැවී ලකුණු 276ක් රැස් කළ අතර, එම ඉලක්කය හඹාගිය ඇෆ්ගන් පිල පන්දු 2ක් ඉතිරිව තිබියදී ජය තහවුරු කර ගත්තේ කඩුල 6ක් පමණක් අහිමි කර ගනිමිනි.
කෙසේ වෙතත් තරගාවලියේ මුල් තරග 3 ජය ගැනීම හේතුවෙන් ශ්‍රී ලංකාව මේ වන විටත් 3-1ක් ලෙස තරගාවලිය ජය ගෙන තිබේ.
ඇෆ්ගන් ඉනිමට සාර්ථක ආරම්භයක් දුන් රියාස් හසන් මේ තරගාවලියේ දෙවැනි ශතකය ලෙස ලකුණු 106ක් රැස් කළේය. පන්දු 128කදී හතරේ පහර 11කින් ඉනිම ගොඩනැඟූ ඔහුට අනගි සහායක් දුන් සුබයිඩ් අක්බාරි පළමු කඩුල්ලට ලකුණු 133ක සබඳතාවක් ගොඩනැඟූ අතර, ඔහු ලකුණු 68කට දැවී ගියේය. කෙසේ වෙතත් ශ්‍රී ලංකා පන්දු යවන්නන් තරගය ඇද බැඳ ගැනීම නිසා දෙපිලට දෝලනය වූ තරගය අංක 6 පිතිකරු ලෙස පිටියට නන්ගෙයලියා කරෝටි තම කණ්ඩායම දෙසට හරවා ගත්තේ පන්දු 29කින් ලකුණු 40ක් රැස් කරමිනි. පන්දු යැවීමේදී දුෂාන් හේමන්ත කඩුලු 2ක් දවා ගත්තේය.
ශ්‍රී ලංකා ඉනිම වෙනුවෙන් නායකත්වයේ ඉනිමක් ක්‍රීඩා කළ නිශාන් මධුෂ්ක පන්දු 127කදී හතරේ පහර 9ක් සහ හයේ පහර 2ක් සමඟින් ලකුණු 115ක් රැස් කළේය. මුල් පෙළ පිතිකරුවන් අඩු ලකුණු ගණනකට දැවී යද්දී 5 වැනි කඩුල්ලට මධුෂ්ක සමඟ එක් වූ සොනාල් දිනූෂ පන්දු 78කින් ලකුණු 78ක් රැස් කරමින් ලකුණු 137ක සබඳතාවක් ගොඩනැඟුවේය.
පන්දු යැවීමේදී බිලාල් සාමි සහ ක්වයිස් අහමඩ් කඩුලු 3 බැගින් දවා ගත්හ.
දෙපිල අතර අවසන් එක්දින තරගය හෙට (7) හම්බන්තොටදීම පැවැත්වේ.
ශ්‍රී ලංකා ‘ඒ’ – 275/7 (ඕවර 50) නිශාන් මධුෂ්ක 115, සොනාල් දිනූෂ 78 (බිලාල් සාමි 54/3, ක්වයිස් අහමඩ් 62/3)
ඇෆ්ගන් ‘ඒ’ – 276/6 (ඕවර 49.4) රියාස් හසන් 106, සුබයිඩ් අක්බාරි 68, නන්ගෙයලියා කරෝටි 40 (දුෂාන් හේමන්ත 39/2)
නිරෝෂාන් ප්‍රියංකර