මහනුවර ප්‍රධාන පෙළේ නිමි ඇඳුම් අලෙවිසලක දී කාන්තාවකගේ මුදල් පසුම්බිය සොරා ගැනීමේ සිද්ධියක් සම්බන්ධයෙන් සී.සී.ටී.වී දර්ශන ඔස්සේ සිදුකළ දීර්ඝ විමර්ශනයකින් පසු…මහනුවර පොලිසියේ අපරාධ විමර්ශන අංශය විසින් කාන්තා පොලිස් කොස්ාපල්වරියක පෙරේදා (04) සැකපිට අත්අඩංගුවට ගනු ලැබ තිබේ.
සිංහල අලුත් අවුරුද්ද නිමිත්තෙන් පසුගිය 09 වැනි දින අදාළ නිමි ඇඳුම් අලෙවිසල වෙත ගොස් තිබෙන පැමිණිලිකාරිය ඇඳුම් තෝරමින් සිට පසුව බෑගය පරික්ෂා කිරීමේ දී මුදල් පසුම්බිය එහි නොමැති බව දැක ඇත.
මුදලින් රුපියල් 35000 ක් ද රුපියල් 5000 ක වටිනාකමින් යුත් ත්‍යාග වවුචර හතරක් ද රුපියල් 40000 ක් වටිනා ජංගම දුරකතනය ද බෑගයේ තිබී සොරාගෙන තිබෙන බවට ඇය කළ පැමිණිල්ලක් මත විමර්ශන කළ පොලිසිය පැමිණිලිකාරියගේ අත්බෑගය විවෘත කර තවත් කාන්තාවක් විසින් මුදල්, ත්‍යාග වවුචර හා ජංගම දුරකතනය සොරා ගන්නා අයුරු සී.සී.ටී.වී කැමරා දර්ශන ඔස්සේ තහවුරු කරගෙන තිබේ.
එහි දර්ශන ඔස්සේ තවදුරටත් පරීක්ෂණ කළ පොලිසිය අදාළ සොරකම සිදුකර ඇත්තේ පූජාපිටිය පොලිසියට අනුයුක්තව සේවය කරන පොලිස් කොස්තාපල්වරියක බව තහවුරු කර ගැනීමෙන් පසු පෙරේදා (04) ඇයව අත්අඩංගුවට ගැනීමට පියවර ගෙන ඇත.
අසේල කුරුළුවංශ