කුරුණෑගල සමුපකාර ආරෝග්ය ශාලාවේ සේවක පිරිසක් සහ මාර්ග සංවර්ධන අධිකාරියේ කුරුණෑගල දිස්ත්රික් කාර්යාලයේ සේවක පිරිසක් අතර හටගත් ගැටුමකින් තුවාල ලැබූ දෙපාර්ශ්වයේම පස් දෙනකු රෝහල්ගතව ප්රතිකාර ලබමින් සිටින බව වාර්තා වේ.
කුරුණෑගල කොළඹ මහාමාර්ගය බෙදා වෙන් කරන මැද තීරුවේ සමුපකාර ආරෝග්ය ශාලාවේ කොඩි කණු සිටුවීමක් සම්බන්ධයෙන් මේ ගැටුම හටගෙන තිබේ. සමුපකාර ආරෝග්ය ශාලාවේ පැවැත්වෙන උත්සවයක් සඳහා මාර්ගයේ මැද තීරුවේ සිටුවා තිබූ කොඩි කණු උත්සවය පැවැත්වෙමින් තිබූ අවස්ථාවේදීම මාර්ග සංවර්ධන අධිකාරියේ සේවක පිරිසක් පැමිණ බලහත්කාරයෙන් ගලවා ඉවත් කිරීම සම්බන්ධයෙන් දෙපාර්ශ්වයේම සේවක පිරිසක් අතර ඇති වූ බහින්බස් වීමක් ගැටුමක් දක්වා දුරදිග ගොස් තිබූ බව සමුපකාර ආරෝග්ය ශාලාවේ ප්රකාශකයෙක් සඳහන් කළේය. මේ ගැටුමෙන් පහර කෑමට ලක් වූ තම කාර්ය මණ්ඩල සාමාජිකයන් දෙදෙනකු රෝහලේ ප්රතිකාර ලබමින් සිටින බවද ඔහු ප්රකාශ කළේය.
විශේෂ අවස්ථාවකදී පමණක් සමුපකාර ආරෝග්ය ශාලාවේ කොඩි ආයතන පරිශ්රය ඉදිරිපිට ඇති මාර්ග කොටසේ පමණක් දිගු කලක සිට සිටුවන බව පැවසූ හෙතෙම කිසිදු දැනුවත් කිරීමකින් තොරව ඒවා ගලවා ඉවත් කිරීම මේ ගැටුමට හේතුව බවද පැවසීය. කුරුණෑගල නගර මධ්යයේ විවිධ ආයතන සිටුවන කොඩි කණු සම්බන්ධයෙන් මාර්ග සංවර්ධන අධිකාරිය නිහඬ පිළිවෙතක් අනුගමනය කරන බවට ඔහු චෝදනා කළේය.
මේ චෝදනා සම්බන්ධයෙන් කළ විමසීමකදී මාර්ග සංවර්ධන අධිකාරියේ කුරුණෑගල දිස්ත්රික් ප්රධාන ඉංජිනේරු ඩබ්.ඒ.කේ. හුණුකුඹුර මහතා පැවසුවේ ප්රධාන මාර්ගය මැද කොඩි කණු සිටුවීම සම්පූර්ණයෙන්ම නීති විරෝධී ක්රියාවක් වන බවයි. එසේ කොඩි කණු සිටුවීම මාර්ගයේ ධාවනය කරවන රථවාහනවලට අනතුරුදායක තත්ත්වයක් බව පෙන්වා දුන් හුණුකුඹුර මහතා එම කොඩි කණු ගලවා ඉවත් කරන ලෙස කීප වරක්ම දන්වා සිටියද ඒවා ඉවත් නොකර තිබූ බවද කීය. ඒ අනුව එම කණු ඉවත් කිරීමට යෑමේදී තම ආයතනයේ සේවක පිරිසකට සමුපකාර ආරෝග්ය ශාලාවේ කාර්ය මණ්ඩලයේ සාමාජිකයන් එක්ව පහර දීමක් කර ඇති බවද රාජකාරියේ නිරතව සිටි රජයේ සේවකයන් පිරිසකට පහර දීම බරපතළ වරදක් බවද ඒ මහතා ප්රකාශ කළේය.
කුරුණෑගල අතිරේක - පුෂ්පකුමාර ජයරත්න