මැද කොළඹ වෙළෙඳ සංකීර්ණය සාන්ත ජෝන් පැරණි මාළු වෙළෙඳ ගොඩනැඟිල්ල වෙනස්කොට ඉදිකරන ලද මහල් ගොඩනැඟිල්ලේ වෙළෙඳසල්වල හිමිකරුවන් තමන් මුහුණදී සිටින ගැටලු සම්බන්ධයෙන් සහනයක් ලබාදෙන ලෙස ඉල්ලා ජනාධිපති රනිල් වික්‍රමසිංහ මහතා වෙත මැද කොළඹ වෙළෙඳ සංකීර්ණයේ වෙළෙඳ සංගමය විසින් ඉල්ලීමක් ඉදිරිපත් කර තිබේ. එම වෙළෙඳසල් හිමි මැද කොළඹ වෙළෙඳ සංකීර්ණයේ වෙළෙඳ සංගමයේ සභාපති එම්. ෂිහාඩ් රහීම්, ප්‍රධාන ලේකම් පී. දේවලෙන්ම සහ භාණ්ඩාගාරික එස්.රාමචන්ද්‍රන් යන අයගේ අත්සනින් යුතුව මෙම ලිපිය ජනාධිපතිවරයා වෙත යොමුකර තිබේ.
අදාළ වෙළෙඳ සංකීර්ණය බිම් මහලේ ගෝල්ඩ් සෙන්ටර් නමින් වෙළෙඳ ව්‍යාපෘතියක් ක්‍රියාත්මක වන අතර ඒ තුළින් නාගරික සංවර්ධන අධිකාරියට රුපියල් ලක්ෂ ගණනින් පාඩු සිදු වී ඇති බව එම ලිපියේ සඳහන් වේ. එසේම අදාළ වෙළෙඳ සංකීර්ණයේ වෙළෙඳසල් 100ක් පමණ සීල් තැබීම සහ පවරා ගැනීම හේතුවෙන් මේ වන විට වසා දමා ඇති අතර ඒ තුළින් රජයට අය විය යුතු විශාල ආදායමක් අහිමි වී ගොස් ඇත. අදාළ වෙළෙඳ සංකීර්ණයේ විදුලි සෝපාන දෙකෙන් එකක් කැඩී ගොස් බොහෝ කලක් ගත වී ඇතත් එය අලුත්වැඩියා කොට පරිහරණයට මේ දක්වා ලබාගෙන නොමැත. දැනට ක්‍රියාත්මක වෙමින් තිබෙන අනෙක් සෝපානය ද සතියකට දෙතුන් වතාවක් දෝෂ මතුවීම නිසා පැමිණෙන පාරිභෝගික ජනතාවට සහ වෙළෙඳසල් පවත්වාගෙන යනු ලබන සේවකයන්ට ද බලවත් අපහසුතාවට මුහුණදීමට සිදුවන බව ද පැවසේ. මෙම වෙළෙඳ සංකීර්ණයේ පිරිසුදු කිරීමේ කටයුතු ද ඉතා පහළ මට්ටමක පවතින අතර පාරිභෝගිකයන්ට සිය වාහන ගාල් කිරීම සඳහා ප්‍රමාණවත් ඉඩපහසුකම් නැති වීම තවත් ගැටලුවක් බව යවන ලද ලිපියේ සඳහන් වේ.
මැද කොළඹ සමූහ - ආරියරත්න ගනේගොඩ