ශ්‍රී ලංකා ග්‍රාම නිලධාරී සේවය ස්ථාපිත නොකිරීම, ඊට අනන්‍ය වැටුප් තලයක් නොදීම ඇතුළු කරුණු කිහිපයකට විසඳුම් ඉල්ලා ග්‍රාම නිලධාරීන් අද (06) සහ හෙට (07) නිවාඩු දැමීමේ වෘත්තීය ක්‍රියාමාර්ගයක නිරත වීමට තීරණය කර තිබේ.
ශ්‍රී ලංකා ග්‍රාම නිලධාරීන්ගේ සංගමය ඊයේ (05) මාධ්‍ය හමුවක් කැඳවමින් එහි සභාපති සංජීව අතුකෝරල මහතා මේ බව සඳහන් කළේය.
එහිදී වැඩිදුරටත් අදහස් දැක්වූ සභාපතිවරයා මෙලෙස ද කීවේය.
“දිවයින පුරා සිටින ග්‍රාම නිලධාරීන් මේ වෘත්තීය ක්‍රියාමාර්ගයේ නියැළෙනවා. වසර හැටකට අධික දීර්ඝ කාලයක් පුරා දිගින් දිගටම ග්‍රාම නිලධාරීන් විසින් ඉල්ලීම් ඉදිරිපත් කර තිබුණත් මේ දක්වා සාධනීය මැදිහත්වීමක් සිදු කර නෑ. අන් කවර සේවාවකටත් වඩා බරපතළ පසුබෑමකට ග්‍රාම නිලධාරී සේවය ලක් කර තිබෙනවා.
වඩාත් කාර්යක්ෂම සහ ඵලදායී මහජන සේවාවක් පවත්වාගෙන යෑමට දිය යුතු ග්‍රාම නිලධාරී දීමනා නොදීමෙන් ගන්නා සොච්චම් වැටුප රාජකාරි ඉටු කිරීම සඳහා යෙදවීමට සිදුවී තිබෙනවා.
2025 අය-වැය යෝජනා ඉදිරිපත් කරන තෙක් යෝජනාවී ඇති ඉන්ධන සහ නිල ඇඳුම් දීමනාව නොලැබී යෑම, රටේ මූලික නීතිය සහ ප්‍රජාතන්ත්‍රවාදී අයිතීන් උල්ලංඝනය කරමින් කැඳවා ඇති වෘත්තීය ක්‍රියාමාර්ගවලට ප්‍රාදේශීය පරිපාලනයෙන් බලහත්කාරය හා බලපෑම් කරමින් වෙනත් නිලධාරීන්ගේ රාජකාරි කටයුතු පැවරීම් යන කරුණුත් මේ වෘත්තීය ක්‍රියාමාර්ගයට බලපා තිබෙනවා.”
නුවන් කොඩිකාර සහ මීගොඩ - බී. කේ. කත්‍රිආරච්චි