ටී 56 ගිනි අවි, රිවෝල්වර, ගිනි අවි, ජීව උණ්ඩ සහ හොරොයින් මත්කුඩු තොගයක් සමඟ සංවිධානාත්මක අපරාධකරුවකු සහ මත්ද්‍රව්‍ය ජාවාරම්කරුවකුගේ සමීපතම ගෝලයින් සිව් දෙනකු අත්අඩංගුවට ගත් බව මෝදර පොලිසිය කියයි.
එම සැකකරුවන් අතර එකම පවුලේ සහෝදරයන් දෙදෙනෙකු ද වන බව පොලිසිය කියයි.
සැකකරුවන් සමඟ ටී 56 ගිනි අවියක්, විදේශ රටක නිෂ්පාදිත රිවෝල්වර වර්ගයේ ගිනි අවියක්, ටී 56 මැගසින් 2ක්, ටී 56 ජීව උණ්ඩ 265ක්, නයින් එම් එම් උණ්ඩ 23ක්, යතුරුපැදි 2ක්, හොරොයින් ග්‍රෑම් 67 මිලිග්‍රෑම් 400ක් කේරළ ගංජා කිලෝ ග්‍රෑම් 1ක් හා ත්‍රිරෝද රථයක් පොලිසිය භාරයට ගෙන ඇත.
මත්ද්‍රව්‍ය තොගයක් රැගෙන පුද්ගලයන් දෙදෙනෙකු ත්‍රිරෝද රථයකින් මෝදර වෙරළ තීරයේ විදුහලක් පිටුපස මුහුදට අපද්‍රව්‍ය ගලා යන බටයක් අසල ලඳු කැලෑවකට පැමිණෙන බවට මෝදර පොලිසියේ ස්ථානාධිපති ප්‍රධාන පොලිස් පරීක්ෂක නලින් දර්ශන මහතාට ලද තොරතුරකට අනුව ඒ මහතා ඇතුළු පොලිස් කණ්ඩායමක් පැය කීපයක් තිස්සේ එම කැලෑව ආසන්නයේ සැඟවී සිට ත්‍රිරෝද රථයක පැමිණි සැකකරුවන් දෙදෙනකු අත්අඩංගුවට ගෙන සිදු කළ ප්‍රශ්න කිරීමේදී මෙම ගිනි අවි සහ ජීව උණ්ඩ තොගය ඇතුළු සෙසු සැකකරුවන් අත්අඩංගුවට ගැනීමට හැකි වූ බව පොලිසිය කියයි.
ත්‍රිරෝද රථයේ පැමිණි එක් පුද්ගලයකු සන්තකයේ හෙරොයින් මත්කුඩු ග්‍රෑම් 25 මිලිග්‍රෑම් 300ක් සහ අනෙක් සැකකරු සන්තකයේ හොරොයින් මත්කුඩු ග්‍රෑම් 15 මිලිග්‍රෑම් 700ක් තිබී හමුවීමෙන් අනතුරුව සිදු කළ වැඩිදුර ප්‍රශ්න කිරීමේදී රාගම තේවත්ත ගැමුණු මාවතේ අතුරු මාර්ගයක නි‍ෙවසක සඟවා තිබෙන ගිනි අවි සහ ජීව උණ්ඩ තොගය සම්බන්ධයෙන් තොරතුරු අනාවරණය වූ බව පොලිසිය කියයි.
එම සැකකරුවන් දෙදෙනාගෙන් වැඩිදුරටත් ප්‍රශ්න කිරීමේදී මෙම මත්ද්‍රව්‍ය සහ ගිනි අවි මේ වන විට ඩුබායි රාජ්‍යයට පලා ගොස් සැඟව සිට මත්ද්‍රව්‍ය ජාවාරම් සහ සංවිධානාත්මක අපරාධවල නියැළෙන බ්ලුමැන්ඩල් රවී නමැත්තාගේ හා ඔහුගේ ප්‍රධාන ගෝලයා වන මෙරට ජාලය මෙහෙයවන සමීර සංඛ නමැත්තාගේ බව අනාවරණය වූ බව පොලිස් නිලධාරියකු පැවසීය.
සැකකරුවන්ගේ මඟ පෙන්වීම ඔස්සේ එම නි‍ෙවස සොයා යාමේදී නි‍ෙවස ආසන්නයේ රැඳී සිටි පුද්ගලයකු හෙරොයින් මත්කුඩු මිලිග්‍රෑම් 16200ක් හා කේරළ ගංජා කිලෝ එකක් සමඟ අත්අඩංගුවට ගත් බවත් අනතුරුව එම නි‍ෙවස වටලා නි‍ෙවස තුළ සිටි පුද්ගලයකුද හෙරොයින් මත්කුඩු මිලිග්‍රෑම් 10200ක් අත්අඩංගුවට ගත් බව පොලිසිය කියයි.
අනතුරුව සිදු කළ සෝදිසි මෙහෙයුමේදී නි‍ෙවස තුළ සඟවා තිබූ ටී 56 ගිනි අවිය සහ සෙසු ජීව උණ්ඩ මෙන්ම රිවොල්වර වර්ගයේ ගිනි අවිය සේදවත්ත නි‍ෙවසක් තුළ වළ දමා තිබියදී රාගම නි‍ෙවස තුළ සිටි පුද්ගලයාගේ ප්‍රකාශ මත සොයාගත් බව පොලිසිය කියයි.
අත්අඩංගුවට ගත් සියලුම සැකකරුවන් කොළඹ ප්‍රදේශයේ පදිංචිකරුවන්ය.
අත්අඩංගුවට ගත් සැකකරුවන් සිව් දෙනා අධිකරණය වෙත ඉදිරිපත් කර රැඳවුම් නියෝග ලබාගෙන මෙම ගිනි අවි අපරාධ සඳහා යොදාගෙන ඇත්ද ? තවත් ගිනි අවි සහ මත්ද්‍රව්‍ය තිබේද? යන්න සොයා දීර්ඝ විමර්ශනයක් සිදු කරන බව පොලිසිය කියයි.
මෝදර පොලිසියේ ස්ථානාධිපති ප්‍රධාන පොලිස් පරීක්ෂක නලින් දර්ශන මහතාගේ උපදෙස් මත ප්‍රධාන පොලිස් පරීක්ෂක පාලිත කරුණානායක පොලිස් සැරයන්වරුන් වන (14929) ජයතිලක (75734) අබේරත්න පොලිස් කොස්තාපල්වරුන් වන (87008) දිසානායක (24108) රොෂාන් (61335) ඉන්දික (24120) තාරක (75593) ජයතිලක (2265) විජිත (97554) තුසිත මහත්වරුන් පරීක්ෂණ පවත්වයි.
බණ්ඩාරගම - බිමල් ජයසිංහ