පාකිස්තානයේ පන්ජාබ් ප්‍රාන්තයේ පුද්ගලයකු පසුගියදා සිය බිරිය හා දරුවන් 7 දෙනා ඝාතනය කිරීමට හේතුව විරැකියාව බව වාර්තා වේ. එම ඝාතන සිදු වූ පන්ජාබ් ප්‍රාන්තයේ අලිපූර් දිස්ත්‍රික්කයේ පොලිසිය හමුවේ පාපොච්චාරණය කරමින් සැකකරු ඒ බව ප්‍රකාශ කර ඇතැයි ප්‍රාදේශීය මාධ්‍ය වාර්තා උපුටා දක්වමින් විදෙස් මාධ්‍ය සඳහන් කළේය.
පසුගිය රමලාන් මාසයේදී සැකකරු විසින් එම ඝාතන සිදු කර ඇත්තේ තණකොළ කපන යන්ත්‍රයකින් බවත්, පසුව ඔහු පොලිසියට භාර වී ඇති බවත් වැඩිදුරටත් වාර්තා වේ. මියගිය දරුවන් මාස 8 සිට අවුරුදු 10 දක්වා වයස් කාණ්ඩයේ පසු වූ බවත් වාර්තා වේ.
විරැකියාව හේතුවෙන් පාකිස්තානයේ ප්‍රාන්ත රැසක සිය දිවි හානි කර ගැනීම් සහ ඝාතන ඉහළ ගොස් ඇතැයි ද, ආර්ථික දුෂ්කරතා හේතුවෙන් මේ තත්ත්වය උද්ගතවී ඇතැයි ද විදෙස් මාධ්‍ය වැඩිදුරටත් වාර්තා කළේය. එරට අවුරුදු 20 සහ 30 අතර වයස් කාණ්ඩයේ පසුවන තරුණයන් වැඩි වශයෙන් සිය දිවි හානි කර ගැනීමට උත්සාහ දරන බව පාකිස්තාන සංඛ්‍යාලේඛන මඟින් හෙළි වී ඇති අතර, තරුණ කොටස් නීතිවිරෝධී ක්‍රියාකාරකම් සඳහා පෙලඹීම ද විරැකියාවේ ප්‍රතිඵලයක් බව වාර්තා වේ.
ජාත්‍යන්තර මූල්‍ය අරමුදල පසුගිය වසරේදී පාකිස්තානයේ විරැකියා අනුපාතය 8.5%ක් බව ප්‍රකාශ කර තිබූ අතර, එය වසර 2022 ට වඩා 5.6% ක වර්ධනයක් බව ද විදෙස් මාධ්‍ය වාර්තා කළේය.
