- සල්ලි නැතිනම් ෆොටෝ සමාජ මාධ්යයට දාන බවටත් තග දාලා
- සල්ලි වෙනුවට ලක්ෂ 9ක රන් බඩු අරන්
තමන් සතුව ඇති ඡායාරූප සමාජ මාධ්ය වෙත මුදා හරින බවට තම පෙම්වතිය බිය ගන්වා රුපියල් ලක්ෂ දහයක මුදලක් ඉල්ලා, ඇය සතුව මුදල් නොමැතිකම හේතුවෙන්, ලක්ෂ නවයක් වටිනා ඇගේ රන් භාණ්ඩ ලබාගෙන වංචා කළ පුද්ගලයකු අත්අඩංගුවට ගැනීම සඳහා විමර්ශනයක් ආරම්භ කළ බව ගල්කිරියාගම පොලිසිය පවසයි.
පැමිණිලිකාරිය සිය සැමියාගෙන් දික්කසාද වී ඇති කාන්තාවක් වන අතර, පවුලේ යෝජනාවකට අනුව අසල්වැසි ගමක පදිංචි, පෙර විවාහයෙන් දික්කසාද වී විදේශගතව සිටින තරුණයකු සමඟ ප්රේම සබඳතාවයක් පවත්වාගෙන ගොස් තිබිණ. පොලිසිය පැවසුවේ, එම පෙම්වතා විදේශගතව සිට ලංකාවට පැමිණ ටික කාලයක් ගත වන විට ඔහුට පෙර විවාහයේ දරුවන් දෙදෙනකු සිටින බව දැනගෙන මෙම ප්රේම සබඳතාවය නවතා දැමීමට තීරණය කර ඇති බවයි. ඊට අකමැති වූ සැකකාර පෙම්වතා, පැමිණිලිකාරිය වන තම පෙම්වතියට නිතර නිතර දුරකතනයෙන් කතා කර කරදර කරමින් තමන් සතුව තිබෙන ඇගේ ඡායාරූප සමාජ මාධ්යයට මුදා හරින බවත්, මෙසේ නොකිරීමට නම් රුපියල් ලක්ෂ දහයක මුදලක් දෙන ලෙසත් ඉල්ලා තිබේ. ඒ අනුව මෙසේ තම පෙම්වතාගෙන් දිගින් දිගටම වන තර්ජන හමුවේ තමන් සතුව මුදල් නැතිකම හේතුවෙන් තමාට අයත් රුපියල් අටලක්ෂ අනුදාහක් වටිනා රන්මාල තුනක් සහ රන්මුදුවක් ලබා දුන් බව ඇය සිදු කළ පැමිණිල්ලේ සඳහන් වේ.අනතුරුව සැකකරු විසින් ඇයගේ වට්ස්ඇප් අංක කිහිපයකට එවා තිබූ ඇයගේ ඡායාරූප ද මකා දමා තිබූ බවත්, එහෙත් ඇය සතුව තමාගේ ඡායාරූප තිබෙන නිසා, නීතිමය ක්රියා මාර්ගයක් ගැනීමට අවශ්ය බවත් පවසමින් මෙම පැමිණිල්ල ඉදිරිපත් කර ඇතැයි පොලිසිය සඳහන් කළේය.
අනුරාධපුර - සංචාරක සශිනි මධුෂානි