පොලොන්නරුව කන්දකාඩු ගොවිපොළේ ඉඩම් උපයෝගි කර ගනිමින් බඩඉරිඟු වගාව වහාම ආරම්භ කරන බව කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා ප්‍රකාශ කළේය.
ඒ මහතා මේ බව පැවසුවේ පසුගියදා (17) කෘෂිකර්ම අමාත්‍යාංශයේදී පැවැති සාකච්ඡාවට එක් වෙමිනි. එහිදී අදහස් දැක්වූ කෘෂිකර්ම ඇමැති මහින්ද අමරවීර මහතා මෙසේ ද පැවසීය.
පැවැති සියලු ගැටලු දැන් අවසානයි. පාරිසරික ඇගයුම් වාර්තාව දී ඇති උපදෙස් අනුව වගා කටයුතු ආරම්භ කරන්න පියවර ගත යුතුයි. මේ බඩඉරිඟු වගාවේ අස්වැන්න අපි යොදා ගන්නේ සත්ත්ව ආහාර සඳහායි. පසුගිය කාලයේ කිරි, බිත්තර හා කුකුළු මස් මිල ඉහළ යෑමට එක් හේතුවක් වූයේ සත්ත්ව ආහාර හිඟකම හා මිල ඉහළ යෑමයි. නමුත් අපට අවශ්‍ය බඩඉරිඟු ප්‍රමාණය අපිම වගා කර ගත්තොත් ගැටලුවක් නැහැ. ඒ නිසා ප්‍රමාදයකින් තොරව යල කන්නයේ බඩඉරිඟු වගාව ආරම්භ කරන්නැයි ද ඇමැතිවරයා පැවසීය.
ජාතික පශු සම්පත් සංවර්ධන මණ්ඩලයට අයත් පොලොන්නරුව කන්දකාඩු ගොවිපොළේ ඉඩම් උපයෝගි කර ගනිමින් සත්ත්ව ආහාර සඳහා බඩඉරිඟු වගා කිරීමේ ව්‍යාපෘතියක් කෘෂිකර්ම හා වැවිලි කර්මාන්ත අමාත්‍යාංශය විසින් ක්‍රියාත්මක කරයි. ජාතික පශු සම්පත් සංවර්ධන මණ්ඩලයට අයත් පොලොන්නරුව කන්දකාඩු ගොවිපොළේ වගා කටයුතු ඇරඹීමට පරිසර ඇගයුම් වාර්තාවේ අනුමැතිය ලැබුණු අතර, මේ සඳහා පරිසර ඇගයීම් වාර්තාව ලබාදීමට මෙන්ම දැනට එම ගොවිපොළට අයත් කොටසක අලිමංකඩක් පවතින නිසාත්, ඇතැම් ස්ථානවල පුරාවිද්‍යාත්මක වටිනාකම් සහිත ස්ථාන පවතින නිසාත් බඩඉරිඟු වගා කිරීම සම්බන්ධව ගැටලු කිහිපයක් පැන නැඟී තිබිණි.
ඉඩම්, මහවැලි, අමාත්‍යාංශවල නිලධාරීන් මෙන්ම ජාතික පශු සම්පත් සංවර්ධන මණ්ඩලයේ නිලධාරීන් සහ කන්දකාඩු ගොවිපොළේ බඩඉරිඟු වගාව සඳහා ඉදිරිපත්ව සිටින ගොවි ජනතාවද මේ අවස්ථාවට සහභාගි වූහ.
නෙත්මි පූජනී රත්නායක