කොට්ටාව රුක්මලේ ප්‍රදේශයේදී පිරිසක් මුදල් ඔට්ටුවට කැට සෙල්ලම් කරමින් සිටි එම ස්ථානයට පොලිසිය කඩාපැනීම නිසා කලබල වී දිවගිය පුද්ගලයකු ජලය පිරි ගල්වළකට වැටී මියගොස් ඇති අතර, එලෙස මිය ගිය පුද්ගලයාගේ සිරුර අද (19) දහවල් සොයාගැනීමට හැකි වූ බව හෝමාගම මූලස්ථාන පොලිසිය පවසයි.
මෙලෙස මිය ගොස් ඇත්තේ හෝමාගම නගර සීමා මාවත ප්‍රදේශයේ පදිංචිකරුවකු වන කුරුප්පු ආරච්චිගේ චමින්ද පුෂ්ප කුමාර නමැති 42 හැවිරිදි කුලී වැඩවල නිරතව සිටි දෙදරු පියෙකි.
ඔහු ඇතුළු පිරිසක් මුදල් ඔට්ටුවට කැට සෙල්ලමේ යෙදී සිටියදී මෙලෙස එක්වරම පොලිසිය එම ස්ථානයට පැමිණීමත් සමඟ මිය ගිය පුද්ගලයා සහ තවත් තිදෙනකු දිව ගොස් ජලය පිරී තිබූ ගල්වළෙහි අඩි 30ක පමණ උඩ සිට ගල්වළට පැන තිබූ බවත් ඒ අතුරින් තිදෙනකු පිහිනා ගල්වළින් ගොඩ වී නිවෙස් වෙත ගොස් ඇතත් එක් අයකු නිවෙසට ගොස් නොතිබූ බවත් පොලිසිය පවසයි. ඒ අනුව ප්‍රදේශවාසීන් එක්ව ගල්වළෙහි පිරී තිබූ ජලය පොම්පයක් ආධාරයෙන් ඉවත් කිරීමේදී මිය ගිය පුද්ගලයාගේ දේහය ගල්වළේ සිර වී තිබෙනු දැක පොලිසිය දැනුවත් කර තිබූ බවත්, ඒ අනුව හෝමාගම මූලස්ථාන පොලිසියේ නිලධාරීන් පිරිසක් ගොස් විමර්ශන කටයුතු ආරම්භ කළ බවත් පොලිසිය පවසයි. මේ අතර මිතුරන් කිහිප දෙනකු ඒ අවට සොයා බැලීමේදී ජලය පිරී තිබූ ගල්වළෙහි ජලය මත පාවහන් යුගලක් සහ මුදල් කොළ කිහිපයක් පා වෙමින් තිබෙනු දැක ගල්වළෙහි මෝටරයක් ගෙන වළෙහි පිරී තිබූ ජලය ඉවත් කිරීමේදී වළෙහි ගැඹුරෙහි සිරවී තිබූ පුද්ගලයාගේ හිස මතුවී ඇති බව පොලිසිය පවසයි.
ඒ අනුව සිද්ධිය සම්බන්ධයෙන් 119 හදිසි ඇමතුම් අංකයට කළ දැනුම් දීමකට අනුව පොලිසියේ නිලධාරී කණ්ඩායමක් එම ස්ථානයට පැමිණ පරීක්ෂණ ආරම්භ කොට හෝමාගම වැඩබලන මහේස්ත්‍රාත්වරයා එම ස්ථානයට කැඳවා මහේස්ත්‍රාත් පරීක්ෂණයක් සිදු කොට පශ්චාත් මරණ පරීක්ෂණය සඳහා දේහය හෝමාගම මූලික රෝහලට රැගෙන ගිය බව පොලිසිය පවසයි.
මියගිය පුද්ගලයාගේ හිසට බරපතළ තුවාල සිදුව ඇති අතර දේහය පිළිබඳ පශ්චාත් මරණ පරීක්ෂණය හෝමාගම මූලික රෝහලේ දී ඊයේ (19) සිදු කිරීමට නියමිතව තිබිණි. සිද්ධිය සම්බන්ධයෙන් හෝමාගම වැඩබලන මූලස්ථාන පොලිස් පරීක්ෂක කාරියවසම් මහතාගේ උපදෙස් මත අපරාධ විමර්ශන අංශයේ ස්ථානාධිපති (උ.පො.ප) වික්‍රමසිංහ මහතා ඇතුළු නිලධාරීහු පරීක්ෂණ පවත්වති.
එම ස්ථානයට පැමිණි නුගේගොඩ පොලිස් කොට්ඨාසයේ අපරාධ ස්ථාන පරීක්ෂණ නිලධාරීන් විසින් මූලික පරීක්ෂණ කටයුතු සිදු කිරීමෙන් පසු දේහය ඥාතීන් වෙත භාර දීමට කටයුතු කරන ලදි. හෝමාගම මූලස්ථාන පොලිසිය වැඩිදුරටත් පරීක්ෂණ පවත්වයි.
මීගොඩ - බී.කේ. කත්‍රිආරච්චි, කොට්ටාව - ප්‍රදීප් කුමාර