මෙරට තරුණ තරුණියන් අපේක්ෂා කරන ශ්රී ලංකාව නිර්මාණය කළ හැකි බවට දැඩි විශ්වාසයක් තමා තුළ පවතින බව ජනාධිපති රනිල් වික්රමසිංහ මහතා පැවසීය.
ජනාධිපති රනිල් වික්රමසිංහ මහතා මේ බව සඳහන් කර සිටියේ නුවරඑළිය දිස්ත්රික්කයේ යොවුන් පාර්ලිමේන්තු මන්ත්රීවරුන් සහ තරුණ දේශපාලන නියෝජිතයන් සමඟ පෙරේදා (18) නුවරඑළිය ජනාධිපති මන්දිරයේ පැවති හමුවේදීය.
තවදුරටත් ජනාධිපතිවරයා මෙසේද පැවසීය.
බිඳවැටුණු ශ්රී ලංකා ආර්ථිකය යළි ගොඩනැඟීමේ අභියෝගය මා භාර ගත්තා. වසර දෙකක් තුළදී රටේ ආර්ථිකය ස්ථාවර මට්ටමකට ගෙන ආවා. රට ඉදිරියට ගෙන යෑමට අවශ්යව ඇත්තේ සාමුහිකත්වය පමණයි.
නුවරඑළිය, හඟුරන්කෙත, මස්කෙළිය, කොත්මලේ සහ වලපනේ ආසන නියෝජනය කරමින් යොවුන් පාර්ලිමේන්තු මන්ත්රීවරු සහ එක්සත් ජාතික පක්ෂය, සමගි ජන බලවේගය සහ ජාතික ජන බලවේගය ඇතුළු පක්ෂ කිහිපයක තරුණ දේශපලන නියෝජිතයන් පිරිසක් මෙම අවස්ථාවට එක්ව සිටියහ. නුවරඑළිය දිස්ත්රික් සංවර්ධන කටයුතු ඇතුළු කරුණු කිහිපයක් පිළිබඳව මෙහිදී පුළුල් ලෙස සාකච්ඡාවට ලක් කෙරිණි.
නුවරඑළිය දිස්ත්රික්කය ඉහළ සංචාරක ආකර්ෂණයක් දිනාගත් ප්රදේශයක් ලෙස සංවර්ධනය කිරීමට ආණ්ඩුව ගෙන යන වැඩපිළිවෙළට අද ඇතැමුන් අකුල් හෙළමින් සිටිනවා. එම සංවර්ධන වැඩපිළිවෙළට සියලු දෙනාගේ සහාය හිමි වන්නේ නම්, එය මෙරට ආර්ථිකයේ හැරවුම් ලක්ෂ්යයක් බවට පත් කළ හැකියි. පැරණි දේශපාලනයේ නිරතව රට සංවර්ධනය කළ නොහැකියි. රටට අවශ්ය ආයෝජන ආකර්ෂණය කර ගනිමින් රට සංවර්ධනය කිරීමට නම් සියලු දෙනා එකඟතාවයකින් කටයුතු කළ යුතුයි.
ආණ්ඩුවේ නිවැරදි ආර්ථික වැඩපිළිවෙළ සමඟ රට තුළ ඇති වී තිබෙන ආර්ථික ස්ථාවරත්වය නිසා ජනතාව මෙවර සිංහල හා දෙමළ අලුත් අවුරුද්ද චාරිත්රවලට මුල් තැන දෙමින් සතුටින් සැමරුවා. අද සියලු ක්ෂේත්රවල සිදුව තිබෙන පිබිදීම සමඟ ජනතාවගේ ආදායම් මාර්ග ද ඉහළ යමින් තිබෙනවා. රටේ සියලු ජනතාවට මෙම ප්රතිලාභය හිමි කර දීම මගේ අරමුණයි.
තරුණ ප්රජාව සවිබල ගැන්වීම වෙනුවෙන් සෑම ප්රාදේශීය ලේකම් කොට්ඨාසයකම ප්රාදේශීය තරුණ කේන්ද්ර පිහිටුවීමට සැලසුම් කර තිබෙනවා. එම ප්රාදේශීය තරුණ කේන්ද්ර හරහා තරුණ ව්යවසායකයන් නඟාසිටුවීමට කටයුතු කරනවා. බැංකු ශාඛාවල ප්රධාන නිලධාරීන් සහ වාණිජ මණ්ඩල සාමාජිකයන් ද ඊට සම්බන්ධ කර ගැනීමට සැලසුම් කර තිබෙනවා.
සමගි ජන බලවේගයේ නුවරඑළිය දිස්ත්රික් පාර්ලිමේන්තු මන්ත්රී ධුර අපේක්ෂක අශෝක හේරත් මහතා සඳහන් කළේ තමන් වෙනත් පක්ෂයක් නියෝජනය කළද ජනාධිපතිවරයාගේ වැඩපිළිවෙළ පිළිගන්නා බැවින් එම වැඩපිළිවෙළට සහාය පළ කරන බවයි. රනිල් වික්රමසිංහ මහතා අගමැතිවරයා ලෙස 2001 වසරේ ආරම්භ කර 2025 වසරේ දී අවසන් වීමට නියමිතව තිබූ “යළි පුබුදමු ශ්රී ලංකා” වැඩසටහන සාර්ථක කර ගැනීමට සියලුදෙනා සහාය ලබා දුන්නා නම්, මේ වන විට ශ්රී ලංකාව සංවර්ධිත රටක් බව පෙන්වා දුන් ඒ මහතා, එදා ඊට අකුල් හෙළූ පාර්ශ්ව වර්තමානයේ ජනාධිපතිවරයා දියත් කර ඇති 2048 සංවර්ධිත රටක් වැඩපිළිවෙළට ද අකුල් හෙළමින් සිටින බවද පැවසීය.
ඉදිරි වසර 02 තුළ රටේ විප්ලවීය පරිවර්තනයක් සිදු කරමින් තවත් වසර 10ක් රටේ නායකත්වය සඳහා රනිල් වික්රමසිංහ මහතා පත් කර ගැනීමට අවශ්ය සහාය ලබා දෙන බවද අශෝක හේරත් මහතා වැඩිදුරටත් සඳහන් කළේය. හිටපු පාර්ලිමේන්තු මන්ත්රී කේ.කේ. පියදාස මහතා සහ නුවරඑළිය මහා නගර සභාවේ හිටපු නගරාධිපති චන්දන ලාල් කරුණාරත්න මහතා ඇතුළු හිටපු නාගරික මන්ත්රීවරු සහ ප්රාදේශීය තරුණ දේශපාලනඥයෝ පිරිසක් මෙම අවස්ථාවට එක්ව සිටියහ.