දේශීය හෝ විදේශීය පාර්සල් ලැබීමක් දන්වා ශ්රී ලංකා තැපෑල කිසිදු SMS පණිවුඩයක් ගනුදෙනුකරුවන් වෙත යැවීමක් සිදු කර නොමැති බව තැපැල්පති එස්.ආර්.ඩබ්.එම්.ආර්.පී. සත්කුමාර මහතා අවධාරණය කරයි.
වංචනිකව සකස් කළ වෙබ් අඩවියක් සහ උපක්රමිකව සකස් කරගත් ව්යාජ ජංගම දුරකතන අංක යොදා ගනිමින් මහජනතාව රවටන වංචාවක් පිළිබඳ තොරතුරු අනාවරණය වී ඇති බව ඒ සම්බන්ධයෙන් නිවේදනයක් නිකුත් කරමින් ඒ මහතා සඳහන් කර සිටියි.
මහජනතාව වෙත ලැබෙන කෙටි පණිවුඩයක් සඳහා සිය ණය කාඩ්පත් දත්ත වෙබ් අඩවියකට හෝ කෙටි පණිවුඩයක් මඟින් හෝ වෙනත් කිසිදු ආකාරයකින් ලබාදීම සිදුනොකරන ලෙස ද තැපැල් දෙපාර්තමේන්තුව ජනතාවගෙන් ඉල්ලා සිටින අතර තැපැල් දෙපාර්තමේන්තු උපකාරක සේවාව – 1950 හෝ තොරතුරු තාක්ෂණ අංශය – 0112 542104 / 0112 334728 / 0112 335978 / 0112 687229 / 0112 330072 අමතා තොරතුරු දැනගන්නා ලෙසද ඉල්ලා සිටී.
ශ්රී ලංකා තැපෑල, ශ්රී ලංකා තැපැල් දෙපාර්තමේන්තුව, SL POST, Sri Lanka Post ආදි නම් භාවිත කරමින් ශ්රී ලංකා තැපැල් දෙපාර්තමේන්තුවේ නිල වෙබ් අඩවිය ද උපක්රමිකව අවභාවිත කරමින් මෙම ජාවාරම ක්රියාත්මක වන බව කියා සිටින තැපැල්පතිවරයා ශ්රී ලංකා තැපැල් දෙපාර්තමේන්තුවේ කෙටි පණිවුඩ මඟින් කාඩ්පත් තොරතුරු විමසීමක් කිසිසේත් සිදු නොකරන අතර ණය කාඩ්පත් මඟින් පාර්සල් සම්බන්ධ කිසිදු ගනුදෙනුවක් සිදු නොකරන බවද කියා සිටියේය.
සුභාෂිණී සේනානායක