මාරි කැරොලයින් රොක්, නර්තනයෙන් සහ රංගනයෙන් මතු නොව ඔපෙරා ගායනයෙන් ද යුරෝපා ප්‍රේක්ෂකාගාරය මනමත් කළාය. 1913දී ඊජිප්තුවේ කයිරෝහි උපත ලැබූ ඇය, ජර්මනිය වඩාත්ම ආදරය කරන නිළිය බවට පත්වූවාය. යුරෝපයේ සිනමාශාලා, මෙම කාලයේ ආශක්ත කර ගනු ලැබුවේ හොලිවුඩ් රංගනය විසිනි. එක්සත් ජනපදය දෙසට සිය සිනමාව නැමී යනවාට ජර්මනිය එරෙහි විය. මේ සඳහා විසඳුම වූයේ මාරි රොක්ය. ඇය ජර්මනියෙන් උපන් රංගනයක් ලෙස විරුදාවලි නංවා ජර්මන් සිනමාවේ තරුව බවට පත් කරලීම සඳහා නාසින් සංස්කෘතික මෙහෙයුමක් දියත් කළ බව ද සඳහන්ය. හිට්ලර් කාන්තා ලෝලියෙක් නොවූ මුත් ඇඩොල්ෆ් හිට්ලර් ද ඇයගේ රසිකයෙක් විය. ඇය සහ හිට්ලර් ලිපි හුවමාරු කරගත් බවද සඳහන් වේ. ජර්මනියේ ප්‍රචාරක අමාත්‍ය ජෝසප් ගොබල්ස් සමඟ ඇය සමීප සබඳතා තිබුණේ යැයි කටකතා පළ වන්නට විය.
දෙවැනි ලෝක යුද්ධය නිම වී, කාලයකට පසු සමහරක් ලියකියවිලි මඟින් හෙළි වී ඇත්තේ ඇය සෝවියට් කඳවුරේ ඔත්තුකාරියක්ව සිටි බවය. මෙය ලෝකය පුරා සිදුවන මෙහෙයුමකි. ඉත්ථිධුත්තෝ ගණයට යමෙක් වැටුණු කල්හි එය ඔහුගේ අනෙක් පාර්ශ්වය භාවිතයට ගන්නේ අදාළ පුද්ගල තෙමේ පමණක් නොව, ඔහු නියෝජනය කරනු ලබන සංස්ථාවම බා ගැනීම සඳහාය. පුරාණයේ සිට ඔත්තු සේවා මේ සඳහා ‘ස්ත්‍රිය’ යොදා ගත්හ. හනි ට්‍රැප් හෙවත් පැණි උගුල ලෙස හඳුන්වන මෙම උපාය, යුද්ධය සහ දේශපාලනය ඉක්මවා දැන් බැස ඇත්තේ මාර්කටිං වැඩේ සඳහාය.
මේ තීරුවේ අද මාතෘකාව සඳහා ප්‍රවේශය වන්නේ, කැරොලයින් රොක් වුවත් එහි ගලා යෑම සඳහා පාදක වන්නේ වත්මන් අපේ නිළි පරපුරය. මේ රටේ ඕනෑම අර්බුදයක් අස්සේ නිළියක් සැඟව සිටින්නේය. මෑත කාලයේ නිළියක් නොගෑවුණු වැඩ ඇත්තේ කිහිපයකි. පාස්කු ප්‍රහාරය සඳහා නිළියන් ගැන කතාවක් ඈදී ආවේ නැත. අන් හැම තැනකම, නම දන්නා නිළියන් කිහිප දෙනෙක් ‘ඒ අල ගොඩ මත්තේ’ සිටියහ.
රුසියානු හමුදාවට කුලී හේවායන් ලෙස මෙරට විශ්‍රාමික හමුදා සාමාජිකයන් රැගෙන යෑමේ සංවිධානාත්මක ජාවාරමක් දැන් දින දෙකකට පෙර අල්ලා ගැනීමට අපරාධ පරීක්ෂණ දෙපාර්තමේන්තුවේ වෙළෙඳාම, ජාවාරම් සහ සමුද්‍ර අපරාධ විමර්ශන කොට්ඨාසයේ නිලධාරීහු සමත් වූහ. හොඳට ගෙවනවා නම්, අපේ උන් අනුන්ගේ රටක වෙඩි වුණත් කන්නේය.
මේ සඳහා වන ඒජන්සිය පවත්වාගෙන ගොස් ඇත්තේ, මහනුවර කටුගස්තොට පාරේය. මේ ඒජන්සියේ ප්‍රවර්ධකයන් ලෙස සේවය කර ඇත්තේ සුරූපී තරුණියෝය. මෑතක ජනප්‍රිය වූ ටෙලි නාට්‍ය රැසක රඟපාන තරුණ ජනප්‍රිය නිළියන් කිහිප දෙනෙක් ද ඒ අතර ඇති බව ‘දිනමිණ’ දැන ගන්නේ අදාළ පුවත ගවේෂණයේදී ලැබුණු ඡායාරූප සමඟය.
දැන් වෙනදා මෙන් නොව නිළියක් කියන්නේ වැඩ අධික අයෙකි. වෙනදා නිළියකට ඇත්තේ රංගනය, නිරූපිකා ආදී සේවා පමණය. එසේ වූවාට අද නම හදාගන්නා තෙක් ටෙලි නාට්‍ය හෝ චිත්‍රපට රංගනයේ යෙදෙන නිළියෝ ඉන් පසු රංගනයේ යෙදෙන්නේ අතරින් පතරය. ඒ තරමට වැඩ වැඩිය. එක්කෝ තම තමන්ගේ යූටියුබ් නාළිකා සඳහා උදේ ඇ‍ඳෙන් බසින එකේ පටන් වීඩියෝ කරගත යුත්තේය. දැන් සමහර නාළිකා හි ප්‍රවෘත්ති නිවේදනය කරනුයේ ද නළු නිළියෝය. ප්‍රමෝෂන් ආදී ප්‍රචාරක සේවා සඳහා ද සමහරෙක් යන්නාහ. මේ ආකාරයට ‘රංගනය මඳ පමණට’ යොදා දැන් ‘නිළිය’ නම් චරිතය නිමවා ඇත්තේය.
ඒජන්සිය සිය අලෙවි ප්‍රවර්ධනය සඳහා නිළියන් යොදා ගන්නේ ආකර්ෂණය අරමුණු කරගෙනය. අද සිටිනා නිළියන් හැටහුටාහමාර අතරේ අප නම් දන්නේ කිහිප දෙනෙක්ගේ පමණය. ඒ වුණාට සමහර අලුත් නිළියෝ මුහුණින් අප හඳුනන්නේය. නැතිනම් රංගනයේ යෙදෙන චරිතයක නමින් දන්නේය. පාරේ හෝ අන් තැනක ඒ රූමතිය දුටු කල්හි, මේ ‘දැකලා පුරුදු කෙනෙක්’ සිට ‘අර නාට්‍යයේ අහවල් චරිතේ’ කියනා දුර දක්වා නිළියන්ගේ පරාසය අපේ මනසේ ඇත්තේය. සමහරු දන්නේ, යූටියුබ් වැඩසටහන් නිසාය. සිනමාවේ හෝ රූපවාහිනියේ දැක්ක කලක් මතක නැති වුවද, වයිරල් වී යන යූටියුබ් ‘ෂෝට්’ කෑලිහි ඒ චරිත ඇත්තේ හෙයින් ජනප්‍රිය ය.
මේ නිළියන්ගේ ආකර්ෂණය මතු කරගෙන බොහෝ ව්‍යාපාර ඔවුන්ව සිය වැඩ කටයුතු ප්‍රවර්ධනය සඳහා ගන්නේය. වෙලේ සුදා සමඟ ද නිළියන්ගේ නම් ගෑවි ගෑවී තිබිණි. පාතාලය සමඟ එක්ව මොනවා ප්‍රවර්ධනය කළා දැයි නොදන්නේ නමුත් වෙලේ සුදාගේ ගෙවන ලිස්ට් එකේ දේශපාලන, පොලිස් චරිතවලට සම සමව නිළියෝ ද වූහ. සමහර විට වෙලේ සුදා ලියන පිටපතකට රංගනයෙන් දායක වීමට කැමැත්ත දී ඩුබායි ගොස් ඒ ගැන කතා කළා විය හැකිය. අප එහෙම නරක තාලයට හැමදෙයක්ම ගත යුතු නැත. වැඩේ කර මුලට පත්තු වූ විට “අපි දන්නා කියන අයියා කෙනෙක්” කියන ගානට සාක්ෂි රංගනයේ යෙදීමට තරම් ඔය නිළියෝ චරිතාංග වන්නාහ.
දමිතා නම් වැඩේ ප්‍රමෝට් කර ගත්තේ, ගෝල්ෆේස් රංගනයේ යෙදීමෙනි. ‘ලක් අම්මා’ බේරා ගැනීමේ අවසන් හෝරාව සඳහා සටන් වැදුණු ඇය දැන් කූරු ගනින්නීය. ඒ ලක් අම්මාගේ තුරුලෙන් පිටව යෑම සඳහා රැකියා සොයා දෙන බවට කියා මුදල් ගත් චෝදනා පිටය. ඒ නිළි රංගනයක් ද කියා එක විට පිළිතුරු දිය නොහේ. ඒත් මේ රංගනය සඳහා සියල්ල කර ඇත්තේ සැබෑ ලෝකයේ බැවින් කලාවක් එහි ඇත්තේ වුවද, අධිකරණයේදී රංගනයක් ලෙස තහවුරු කරන තෙක් දමිතාගේ රංගනය හාන්සිය.
නිළියක් යනු මාර චරිත බවට පත්වූ මාලනී, ගීතා, අනෝජා, නීතා ආදී කාල සිහි ගන්වන විට, මේ හිංචි පිංචියෝ ළඟ නවා වළ දමන්නේ, ඒ හා මහා විසල් පෞරුෂ ගොඩනැඟි ලෝකය නොවේදැයි සිහියට එන්නේය.
නිළියක් ලෙස නම කියන්නට සම්මතයක් අවශ්‍ය වන්නේ, පොඩි කෑලි දෙකක සිටි පමණ, ඇය ද නිළියක් ලෙස මාධ්‍ය හඳුන්වා දෙන්නේ බැවිනි. අපේ රංග කලාවේ අසහාය නිළියන්ගේ ගෞරවය උදෙසා මේ වැනි ‘සූපින්’ කෑලි සඳහා මෙතැන් සිට මොඩල් හෙවත් නිරූපිකාව කියා නම් කරමු යැයි මේ තීරුව යෝජනා කරන්නේය.
