පියෙන් පිය නැඟ ඉහළටම ගිය මිනිස්සු ජීවිතය දකිති. ලෝකය දිනති. අප මෙහි සඳහන් කරන්නේ ජීවිත පියගැට පෙළ නැඟ ඉහළට යෑමක් ගැන නොව, ස්වභාවික පරිසරයේ ඇති අරුම පුදුම පියගැට පෙළ දහයක් නඟින්නට තිබෙන අමාරුව ගැන ය. මේ පඩි පෙළ බොහොමයක් ඉඳිකර තිබෙන්නේ ඉතාමත් පටුවට ය. එපමණක් නොව, ඒ පඩි පෙළවලින් සමහර ඒවා ඒ මේ අතට කරකැවී ගිය ඒවා ය. ඇතැම් පියගැට පෙළක් තද බෑවුම් සහිත වීම තවත් විශේෂත්වයකි.
1. අමෙරිකා එක්සත්
ජනපදයේ හාෆ් ඩෝම්
අමෙරිකා එක්සත් ජනපදයේ කැලිෆෝර්නියාහි යොසෙමිට් ජාතික උද්‍යානයෙහි පිහිටි හාෆ් ඩෝම්, හැඩයෙන් අර්ධ ශිඛරයක් බඳු ය. මෙකී හාෆ් ඩෝම් වෙත නැඟීම අභියෝගාත්මක කර්තව්‍යකි. ඒ සඳහා හාෆ් ඩෝම්හි ම පඩිපෙළක් ඇත. මේ පඩි පෙළ මීටර 120ක් ඉහළට විහිදේ. පඩි පෙළ තිබෙන්නේ තද බෑවුමක ය. ඒ නිසා, හාෆ් ඩෝම් තරණයට සූදානම් වන අය, එහි පවත්නා කාලගුණ තත්ත්වය ගැන අනිවාර්යයෙන්ම සැලකිමත් වියයුතු බවට අවවාද කෙරේ. වැසි සහිත කාලගුණ තත්ත්වයක් යටතේ හාෆ් ඩෝම් පියගැට පෙළ නඟින්නට හැකියාවක් නැත. කෙනකු පියගැට පෙළ මතින් ඇද වැටුණොත්, ඔහුගේ හෝ ඇයගේ හෝ ඉදිරිය මරණයෙන් විසැඳෙනු ඇත. මේ පඩි පෙළ නඟින්නන්ට විශේෂ පාවහන් භාවිත කිරීමටත් අවවාද කෙරේ.
2. චීන මහා ප්‍රාකාරය
කිලෝමීටර 21,196ක් දිගැති චීන මහා ප්‍රාකාරයේ කොටසක, එක දිගටම තිබෙන්නේ පියගැට පෙළකි. මේ විධියට පියගැට තිබෙන කොටස කිලෝමීටර 42ක් තරම් දුරට විහිදෙන බව වාර්තාවල දැක්වේ. එහි ඇති පඩි සංඛ්‍යාව 5,164ක් පමණ වේ. මේ පඩි සියල්ලක්ම ගලින් කරන ලද ඒවා ය.
චීන මහා ප්‍රාකාර මැරතන් තරගාවලිය වාර්ෂිකව සංවිධානය කෙරෙන්නකි. එම මැරතන් තරගාවලියේදී ක්‍රීඩකයන්ට දිව යන්නට සිදු වන්නේත් පළමුව කී පියගැට සහිත පෙදෙස හරහා ය.
3. කාම්බෝජයේ ඇන්ග්කෝර් වට් ආරාමයෙහි පියගැට පෙළ
කාම්බෝජයේ ඇන්ග්කෝර් වට් විහාරය ලෝක ප්‍රකට විහාරයකි. ලොව භයානකම පඩි පෙළවලින් එකක් සේ සැලකෙන පඩි පෙළක් නැඟ, වන්දනාමාන කටයුතුවල යෙදෙන්නට එහි පිවිසෙන බැතිමතුන්ට සිදුව තිබේ. විහාරයේ පියගැට පෙළ ඉතාමත් බෑවුම් සහිත ස්වභාවයකින් යුක්ත බැවින්, එය නගින්නන්ට සිදුව තිබෙන්නේ ඉදිරි පඩි අල්ලාගෙන දණගාමින් මෙනි. මේ නිසා, පඩිපෙළ නගින අය අත් ආවරණයක් පැළඳිය යුතු ය. කොට සහ තද කලිසම්වලින් සැරසිය යුතු ය. මේ පිය ගැටපෙළ නගින්නන් වෙනුවෙන් සකස් කළ නීති පද්ධතියක් ද නිකුත් කර තිබේ.
4. අමෙරිකා එක්සත් ජනපදයේ හයිකු පියගැට පෙළ
හයිකු පියගැට පෙළ තිබෙන්නේ අමෙරිකා එක්සත් ජනපදයේ හවායි දූපත් සමූහයට අයත් ඔවාහු දූපතෙහි ය. එහි කෝලවු කඳුකරය ආශ්‍රය කරගෙන මේ හයිකු පඩි පෙළ යොදා ඇත. පඩි 3,922කින් සමන්විත මේ පඩි පෙළ ඉඳි කළේ, අමෙරිකා එක්සත් ජනපද නාවුක හමුදාව විසින් 1942 වසරේදී ය. අද වනවිට මේ පියගැට පෙළ භාවිතයට ගැනීම සපුරා තහනම් බවට මේ තහනම පනවා ඇත. ඒ, පඩි පෙළ අතිශයින්ම අන්තරාකාරී පරිසරයක ඇති නිසා ය. ඒ අන්තරාකාරීත්වයට ඔරොත්තු දිය හැකි තරමේ ශක්තියක් පඩි පෙළට දැන් නැති බව සනාථව ඇත.
5. ඉක්වදෝරයේ පයිලොන් ඩෙල් ඩියාබ්ලෝ ඇල්ල ආශ්‍රිත පියගැට
පයිලොන් ඩෙල් ඩියාබ්ලෝ යනු "යක්ෂයාගේ කටාරම" යන අරුත දෙන වදන් සමූහයකි. මෙනමින් හැඳින්වෙන ඉක්වදෝර දියඇල්ල නැරැඹීමට ඇති පහසුම මඟ, ඒ ආසන්නයේ තිබෙන සර්පිලාකාර පඩි පෙළ ය. මේ පඩි පෙළහි ඇතැම් කොටස්, විටින් විට මීදුමෙන් වැසී පවතින බව වාර්තා වේ. දිය ඇල්ලෙන් වාතයට නිකුත් වන ජල බිඳිති නිසා, පඩිපෙළ නිතරම තෙත් ගතියකින් ද යුක්ත ය. එනිසා එය බෙහෙවින්ම ලිස්සන සුළු ය. ගලින් නිම කළ ඉතා අලංකාරවත් පඩි දෙස වරක් බැලූ විට, මේ අන්තරාකාරී තත්ත්වය කෙනකුට කොහෙත්ම අවබෝධ වන්නේ නැත. පඩි පෙළට යොදා ඇති ලෝහ අත්වැට පවා අනාරක්ෂිත බව සඳහන් වේ.
6. පේරු රාජ්‍යයේ ඉන්කා
පියගැට පෙළ
පේරු රාජ්‍යයේ මාචු පික්චු කඳුකර ප්‍රදේශයට යෑම සඳහා යොදා ඇති පියගැට පෙළ මෙනමින් හැඳින් වේ. මේ පියගැට පෙළෙහි භයානක ම කොටස ලෝහ දම්වැල් සහිත කොටසකි. පියගැට පෙළ නැගීමට පේරු බලධාරීන්ගෙන් අවසරය ලබා ගත යුතු ය. දිනකට මේ පියගැට පෙළ නගින්නට අවසරය ලැබෙන්නේ පුද්ගලයන් කිහිප දෙනෙකුට පමණි. ඉන්කා පියගැට පෙළ නගින කෙනකුට උරුබම්බා ගංඟාව දැක බලාගන්නටත් අවස්ථාව ලැබේ. එය දර්ශනය වන ස්ථානය අධික බෑවුමක් සහිත අන්තරාදායකම ස්ථානයක් සේ සැලකේ.
7. චීනයේ හුවාෂැන් කඳුකර පියගැට පෙළ
චීනයේ හුවාෂැන් කඳුකරයට පිවිසෙන්නට ඉඳිකර ඇති පියගැට පෙළ, ලොව භයානකම පියගැට පෙළක් ලෙස සැලකේ. මේ පියගැට පෙළට අයත් පියගැට සංඛ්‍යාව කොපමණදැයි කියා කිසිවෙක් නොදනිති. පියගැට පෙළ නගින්නට තිබෙන්නේ එක අත් වාරු දම්වැලක් පමණි.
චීනයේ හුවාෂැන් කඳුකරය , කඳු මුදුන් පහකින් සමන්විත ය. එහි උස ම ස්ථානය මුහුදු මට්ටමේ සිට මීටර 2154ක් උසැති බව සඳහන් වේ.
8. මැලේසියාවේ බටු ගල් ලෙන්
මැලේසියාවේ බටු ගල් ලෙන් හින්දු භක්තිකයන්ගේ ආගමික ස්ථානයක් සේ සැලකේ. මේ ලෙන් පිහිටා තිබෙන්නේ කඳුකර පෙදෙසකට වන්නට ය. එනිසා ලෙන්වලට පිවිසිය හැකි වන්නේ පඩි 272කින් පමණ සමන්විත පඩි පෙළක් නැගීමෙන් අනතුරුව ය. කෙනකු එම පඩි පෙළ නැඟ සම්පූර්ණ කළවිට, ඔහු හෝ ඇය හෝ සිටින්නේ මුහුදු මට්ටමේ සිට අඩි 330ක් ඉහළිනි. මේ පඩි පෙළ නැඟීම දුෂ්කර සහ අන්තරාකාරී බව සඳහන් වේ. පඩි පෙළ නඟින අතර මඟදී මැකව් වර්ගයේ වඳුරු රංචු මුණගැසීම සුලභ දෙයකි. මේ වඳුරෝ බැතිමතුන් වෙත කඩා පැන, ඔවුන් අත ඇති දේ උදුරා ගනිති. මේ නිසා අනතුරු සිදුවීම් බහුල ය.
9. නෝර්වේ ෆ්ලෝර්ලි පියගැට පෙළ
නෝර්වේහි ෆ්ලෝර්ලි බලාගාරය ආශ්‍රිතව ඉඳිකර ඇති මේ පියගැට පෙළ, ලීයෙන් නිම කළ එකකි. ලොව ඇති දිගම ලී පඩි පෙළ ලෙස සැලකෙන්නේ ද මෙය ය. මේ පියගැට පෙළ පිය 4,444 කින්සමන්විත ය. එම පඩි ප්‍රමාණය නැඟ අවසන් වූ කෙනකු, අඩි 2,427ක උසකට ළඟා වේ.
10 . ස්පාඤ්ඤයේ සැන් ජුවාන් ඩෙ ගෙස්ටෙලුගාට්සේ
මුහුදට ඉහළින් වැටුණු පඩි සහිත පටු පාරක් මෙනමින් හැඳින්වේ. පිය ගැට සහිත මේ මඟ ඉතාමත් රමණීය වටපිටාවක් හරහා වැටී තිබේ. පියගැට පෙළ නිම වෙන්නේ මුහුදෙන් වටවුණු ගොඩබිම් පෙදෙසකිනි. මේ ගොඩබිම් පෙදෙසේ දේවස්ථානයක් ඇත. දුෂ්කර පියගැට පෙළ දිගේ දූපතට පැමිණෙන කෙනකු, දේවස්ථානයට පිවිස ඝාණ්ඨාරය තෙවරක් නාද කළයුතු බව සම්ප්‍රදායේ දැක්වේ.
අන්තර්ජාලය ඇසුරෙනි
මංජුලා විජයරත්න
නව අදහස දක්වන්න