ඉන්දීය ඡන්ද ඉතිහාසය අලුතින් ලියයි
අවසන් ප්රතිඵල නිකුත් වීමටත් පෙර සිය පක්ෂය ලැබූ පරාජය පිළිගත් රාහුල් ගාන්ධි අගමැති මෝදිට සුබ පැතීය. ජනතා තීන්දුවට ගරු කරන බව ඔහු කියා තිබිණි. එක දිගට දෙවන වතාවටත් ලැබූ පරාජයත් සමඟ ඔහුගේ නායකත්වය අර්බුදයකට ලක්වන ලකුණු දැනටමත් පහළ වී තිබේ. පක්ෂ නායකත්වය තරුණ පෙළ අතට ලැබෙමින් රාහුල් ඊට පත්වුවද මෝදි වැනි පරිණත නායකයකුට අභියෝග කිරීමට ඔහුට නොහැකි වී තිබේ. මේ තත්ත්වය තේරුම් ගනිමින් කොන්ග්රසය මෙවර ඔහුගේ සොයුරිය ප්රියංකා ගාන්ධි කරළියට රැගෙන ආ නමුදු ඇයගේ කැරිස්මාව පවා කොන්ග්රසයට මැතිවරණ ජය රැගෙන ඒමට ප්රමාණවත් නොවීය.
සති හයක් පුරා වට හතකින් යුතුව පැවැති ඉන්දීය මහ මැතිවරණයෙන් භාරතීය ජනතා පක්ෂය (බී. ජේ. පී.) ලැබූ විශිෂ්ට වාර්තාගත ජයග්රහණයත් සමග අගමැති නරේන්ද්ර මෝදිට තවත් වසර 5 ක කාලසීමාවක් සඳහා ජනතා වරම හිමිවිය. පාර්ලිමේන්තුවේ පහළ මන්ත්රී මණ්ඩලය හෙවත් ලෝක් සභාවේ බහුතර බලය හිමිකර ගැනීමට ආසන 272 ක් ලබාගත යුතුය. සමස්ත ආසන සංඛ්යාව 543 කි. එරට මැතිවරණ ඉතිහාසය අලුත් කරමින් නිදහසින් පසු ඉන්දීය ඉතිහාසයේ තනි දේශපාලන පක්ෂයක් ලබාගත් වැඩිම ආසන සංඛ්යාව ලෙස ආසන 300 කට වඩා දිනාගැනීමට හින්දු ජාතිකවාදී බී. ජේ. පී. ය සමත්ව සිටී. රාහුල් ගාන්ධිගේ නායකත්වයෙන් යුතු කොන්ග්රස් පක්ෂය ප්රමුඛ ප්රධාන විපක්ෂ සන්ධානයට ආසන 100 ක් ලබාගැනීමට ද අසීරු විය. කොන්ග්රසය ආසන 49 ට සීමා විය. රාහුල් මෙන්ම ගාන්ධි පරපුර එදා සිට නියෝජනය කළ අමෙති අසුන පවා රැකගැනීමට මෙවර ඉන්දිරා කොන්ග්රසය අපොහොසත් විය. මෙම මැතිවරණය අගමැති මෝදිගේ හින්දු ජාතිකවාදී දේශපාලනය පිළිබඳ ජනමත විමසුමක් ලෙස සැලැකිය හැකි බව විශ්ලේෂකයන්ගේ මතය වී තිබිණි.
පූර්ව මැතිවරණ මත විමසුම්වලදී ද අගමැති මෝදි ජයගනු ඇති බව පැහැදිලි විය. එහෙත් මෙපමණ ආසන සංඛ්යාවක් දිනාගනු ඇතැයි අපේක්ෂා නොකෙරිණි. අනුමානය වූයේ 2014 ට වඩා ආසන සංඛ්යාවක් දිනාගනු ඇති බව ය.
මෙවර මැතිවරණයේ ප්රකාශිත ඡන්ද සංඛ්යාව මිලියන 600 ඉක්මවීය. ලියාපදිංචි ඡන්දදායක සංඛ්යාව මිලියන 900 කි. සභාග ආණ්ඩුවක් වෙනුවට යළිත් තනි පක්ෂ ආණ්ඩුවක් පිහිටුවීමට හැකි පරිදි බී. ජේ. පී. යට බලය හිමිවීම විශේෂ කාරණයකි. කෙසේ වුවද බී. ජේ. පී. හවුල්කාර පක්ෂ ද සමඟ පාලක පක්ෂයේ ආසන සංඛ්යාව 350 ක් පමණ වේ. කලින් පාර්ලිමේන්තුවේ බී. ජේ. පී. ය සතුවූ ආසන සංඛ්යාව 282 කි. එය තිස් වසරක් තුළ කිසියම් පක්ෂයක් ලබාගත් ඉහළම ආසන සංඛ්යාව විය. මෙවර තමන්ගේම වාර්තාව බිඳදැමීමට බී. ජේ. පී. යට හැකි වී ඇත. කලින් පාර්ලිමේන්තුවේ පාලක සභාගය සතු වූ ආසන සංඛ්යාව 336 ක් විය. කොන්ග්රසයට එහි හිමිව තිබුණේ ආසන 44 ක් පමණි. හවුල්කාර පක්ෂ ද සමඟ එම සන්ධානය ආසන 60 කට හිමිකම් කීවේය. 2014 දී ලැබූ මැතිවරණ පරාජය කොන්ග්රසය සිය ඉතිහාසයේ ලැබූ දැවැන්තම පරාජයයි. මෙවර ද ඊට වැඩි වෙනසක් සිදු නොවීය. රාහුල්ගේ නායකත්වය යටතේ කොන්ග්රසය මහ මැතිවරණ 2 ක් පරාජයට පත්ව සිටී.
රාහුල්ගේ අර්බුදය
අවසන් ප්රතිඵල නිකුත් වීමටත් පෙරදීම සිය පක්ෂය ලැබූ පරාජය පිළිගත් රාහුල් ගාන්ධි අගමැති මෝදිට සුබ පැතීය. ජනතා තීන්දුවට ගරු කරන බව ඔහු කියා තිබිණි. එක දිගට දෙවන වතාවටත් ලැබූ පරාජයත් සමඟ ඔහුගේ නායකත්වය අර්බුදයකට ලක්වන ලකුණු දැනටමත් පහළ වී තිබේ. පක්ෂ නායකත්වය තරුණ පෙළ අතට ලැබෙමින් රාහුල් ඊට පත්වුවද මෝදි වැනි පරිණත නායකයකුට අභියෝග කිරීමට ඔහුට නොහැකි වී තිබේ. මේ තත්ත්වය තේරුම් ගනිමින් කොන්ග්රසය මෙවර ඔහුගේ සොයුරිය ප්රියංකා ගාන්ධි කරළියට රැගෙන ආ නමුදු ඇයගේ කැරිස්මාව පවා කොන්ග්රසයට මැතිවරණ ජය රැගෙන ඒමට ප්රමාණවත් නොවීය.
අගමැති මෝදිගේ පළමු පස් අවුරුදු ධුර කාලසීමාව තුළ ඉන්දියාවේ විරැකියාව වාර්තාගත ලෙස ඉහළ ගොස් තිබිණි. ගොවිපොළ ක්ෂේත්රයේ ආදායම් පහත බැස තිබූ අතර කාර්මික නිෂ්පාදන ද අඩු විය. විදේශ මුදල් තහනම වැනි පියවර බොහෝ ඉන්දියානුවන් පීඩාකාරී විණි. මෙවැනි බොහෝ අවාසිදායක කාරණා තිබියදී වුවද මෝදි විශිෂ්ට ජයක් ලැබුවේ ඇයි? ජාතික ආරක්ෂාවට ප්රමුඛත්වයක් ලබාදීමට මෝදි ක්රියාකිරීම මේ ප්රශ්නයට පිළිතුර බව විශ්ලේෂකයන්ගේ අදහසය. ඡන්දදායකයන් දැක්වූ අදහස් බී. බී. සී. ය වාර්තා කර තිබූ අතර, ඉන් පිළිබිඹු වූයේ ද එයයි. 'ලොකු සංවර්ධනයක් නම් වුණේ නෑ. ඒත් ජාතික ආරක්ෂාවට වැඩ කළා. ඉන්දියාවට හිස කෙළින් තබාගෙන සිටිය හැකි තත්ත්වයක් ඇතිකළා...' ඒ ඔවුන්ගේ අදහස්ය. බටහිර මාධ්ය ද වාර්තා කළේ, මෝදි යනු අයෝමය පාලකයකු බව ය. ජනතාව ඔහුට ආදරය කිරීමට එය ද බලපෑවේය. ජයග්රහණය සඳහා ලබාගත යුතු ආසන සංඛ්යාවෙන් අඩක් පමණ දිනා තිබියදීම මෝදි ජයග්රාහී කතාව සිදුකිරීම ද විශේෂයකි. ඔහුට මැතිවරණ ජය පිළිබඳ පැහැදිලි විශ්වාසයක් තිබිණි. ජයග්රහණය තහවුරු වූ පසුවද ඔහු කියා සිටියේ මෙම ප්රතිඵලයේ පණිවිඩය ලෝකය තේරුම්ගත යුතු බවයි. 'අපි අපේ පරමාදර්ශ අත්හරින්නේ නෑ. අපේ මනුස්සකම්, අපේ සංස්කෘතිය මේ කිසිවක් නැතිකර ගන්නේ නෑ...' යනුවෙන් ඔහු පැවසුවේ සිය පාලනයේ දැක්ම ආධ්යාත්මිකත්වය හා ප්රජාතන්ත්රවාදය විසින් ගොඩනඟනු ඇතැයි පෙන්වා දෙමිනි.
සිය ට්විටර් පණිවිඩය මඟින් ද මෝදි ජනතාවට ස්තූති කළේය. 'ස්තූතියි! ඉන්දියා - ජනතා අභිලාෂයන් ඉටුකිරීමට ඔබ අපට ශක්තිය ලබා දුන්නා...' යැයි ද එහි සඳහන් විය. සිය පක්ෂයේ සෑම ක්රියාධරයකුටම ඔහු ඉන් ස්තුතිය පුදකර තිබුණේ ගෙයින් ගෙට යමින් තම සංවර්ධන න්යාය පත්රය ගැන දැනුවත් කරමින් ඔවුන් කළ මෙහෙවර මෙන්ම ඔවුන්ගේ අධිෂ්ඨානය කැපවීම ආදී සියල්ල අගය කරන බව පවසමිනි. පක්ෂ සභාපතිවරයා සමග ජයග්රාහීව පක්ෂ මූලස්ථානයට පැමිණි අගමැති මෝදි පාක්ෂිකයන් විසින් පිළිගත්තේ රෝස මල් පෙති විසුරුවා හරිමිනි. මැතිවරණ ප්රතිඵල ප්රකාශයට පත්වෙද්දී බී. ජේ. පී. ආධාරකරුවන් ප්රීතිඝෝෂා පවත්වන අයුරු හා ජයග්රහණය සමරනු දැකිය හැකි විය. අගමැති මෝදි ලැබූ විශිෂ්ට ජයග්රහණය වෙනුවෙන් සුබ පතන බව පාකිස්තාන අගමැති ඉම්රාන් ඛාන් දන්වා සිටියේ සුබ පැතුම් එක්කළ මුල්ම නායකයන් අතරට එක්වෙමිනි. දකුණු ආසියාවේ සාමය, සමෘද්ධිය හා උන්නතිය වෙනුවෙන් ඔහු සමඟ එක්ව කටයුතු කිරීමට සූදානම් බව ද එම සුබ පැතුම් පණිවිඩයේ සඳහන් විය. අගමැති මෝදි ද ඉතා මිත්රශීලීව පාකිස්තාන සගයාට ස්තූති කර සිටියේ දෙරටේ එකමුතුව පිළිබඳ සුබවාදී අනාගත අපේක්ෂා දල්වමිනි. කලාපීය සාමය හා සංවර්ධනය සිය ප්රමුඛත්වයක් බව ද මෝදි පවසා ඇත.
අගමැති මෝදිට සුබ පැතුම් එක්කළ සෙසු ලෝක නායකයන් අතර අමෙරිකා ජනාධිපති ට්රම්ප්, රුසියා ජනාධිපති පුටින්, චීන ජනාධිපති ෂී ජිංග් පිංග් ද වූහ.
අනාගමිකත්වය ගැන 2014 - 2019 කාලසීමාවේදී කතා කළ දේශපාලන පක්ෂවලට ඉන්දීය ජනතාව මේ මැතිවරණයේදී පිළිතුරු දුන් බව අගමැති මෝදි ජයග්රහණයෙන් පසුව පැවසීය. ඔහු මේ ටොක්ක ඇන්නේ කොන්ග්රසයට බව පැහැදිලිය. ඉන්දියාවේ සිටින මිලියන 200 ක් පමණ වන මුස්ලිම් ජනයාගේ සහාය ලැබුණේ අනාගමික කොන්ග්රස් පක්ෂයටය.
ජයග්රහණයෙන් පසුව භාරත ජනයා අමතමින් මෝදි රටේ පොදු ජනයා වෙනුවෙන් දීප්තිමත් අනාගතයක් උදාකිරීමේ කාර්යය සපුරාලන බවට ප්රතිඥා දුන්නේය. බිලියන 1.3 ක් වන ඉන්දියානුවන් අබියස හිසනමා ආචාර කරන බව පැවසූ ඔහු විශාල ප්රතිශතයක් ඡන්දය ප්රකාශ කරමින් ඉන්දියාවේ ප්රජාතන්ත්රවාදය ලොවට පෙන්වා ඇතැයි ද කීවේය. ප්රජාතන්ත්රවාදය තේරුම් ගැනීමට නම් ඉන්දියාව දෙස බලන්නැයි ඔහු ලෝකයෙන් ඉල්ලීමක් ද කළේය.
'මේ මැතිවරණයේදී කවුරුන් හෝ දිනුවා නම් ඒ ජයග්රාහකයා ඉන්දියාවයි. මේ ජය ඉන්දීය ජනයා ලැබූ ජයක් බව අපි ප්රකාශ කර සිටිනවා...' යනුවෙන් බී. ජේ. පී. මූලස්ථානයේ සිට මෝදි ජනතාව ඇමතුවේ ප්රීතිඝෝෂා මධ්යයේය. 'මේ 21 වැනි සියවසේ නව ඉන්දියාවක් බිහිකරන බවට' ද ඔහු මෙහිදී ප්රතිඥා දුන්නේය. මෙය මෝදි ලැබූ ජයක් නෙවෙයි, මේ රටේ අරගල කරන මිනිසුන්ගේ බලාපොරොත්තු සහ සිහින ලැබූ ජයක්. සනීපාරක්ෂක පහසුකම් අපේක්ෂාවෙන් සිටින කාන්තාවන් ලැබූ ජයක්. මේ රටේ මිනිසුන්ගේ කුස පුරවන ගොවිජනයා ලැබූ ජයක්. මේ සාමාන්ය මිනිසුන් වෙනුවෙන් දීප්තිමත් අනාගතයක් උදාකිරීම මගේ වගකීම...' යනුවෙන් ඔහු පැවසුවේ මේ මැතිවරණය ආදරය ද සමඟ බාරගන්න යන ඉල්ලීමද ජනතාවගෙන් කරමිනි.
මෝදිගේ අභියෝග
ජයග්රහණය තමන් ලැබූවක් නොවන බව මෝදි පැවසුවද ඔහුගේ නායකත්වය පිළිබඳ ඉන්දියානුවන් තැබූ විශ්වාසය මෙම ප්රතිඵලයෙන් පිළිබිඹු වේ. ඔහු සිය ආසනය වන 'වරනාසි' ජය ගත්තේ 63.63% ක ඡන්ද ප්රතිශතයකිනි. දෙවැනි තැනට ආ සමාජවාදී පක්ෂයේ අපේක්ෂිකා ෂලිනි යාදව්ට වඩා ඔහු ඡන්ද 674664 ක් ඉදිරියෙන් සිටී. කොන්ග්රස් පක්ෂ අපේක්ෂක අජේ ගායි ලබාගත්තේ ඡන්ද 152548 ක් පමණි. මෝදි 2014 දී සිය අසුන ජයගත්තේ ඡන්ද 371,000 කිනි. වරණාසි ආසනය සඳහා ඡන්ද විමසීම පැවැත්වුණේ මැතිවරණයේ අවසන් වටයේදී ඉකුත් 19 වැනිදාය.
මැතිවරණයේදී පරාජයට පත් කොන්ග්රස් පක්ෂ සභාපති රාහුල් ගාන්ධි පරාජය පිළිගනිමින් කියා සිටියේ මෙය මතවාද අතර සටනක් වූ බවය. එම සටනෙන් මෝදි හා බී. ජේ. පී. ය ජය ලැබූ බව අප කවුරුත් පිළිගත යුතු යැයි ඔහු පැවසීය. ජයග්රහණයට හදවතින්ම සුබ පතන බව පැවසූ ඔහු සිය පක්ෂය හා සාමාජිකයන් හදවතින්ම හා මුළු ශක්තිය යොදවමින් මැතිවරණ ව්යාපාරය ගෙන ගිය බව පැවසුවේ ඔවුන්ට තුති පුදමිනි. ඔවුන් පරාජය නොවූ බව පැවසූ රාහුල් ඔවුන් ජයග්රාහකයන් බව ද පැවසීය. සිය මතවාදය ජයග්රහණය කරවීමට ඔවුන් කැපවූ බව ද කනගාටු වීම අනවශ්ය බව ද පාක්ෂිකයන් අස්වසමින් කොන්ග්රස් පක්ෂ සභාපතිවරයා පවසා තිබේ.
ගාන්ධි - නේරු දේශපාලන පෙළපතටම අයත් උරුමයක් බඳු වූ අමෙති අසුන රාහුල් ගියවර ජයගත්තේ ඡන්ද 100,000 ක් වැනි අවම පරතරයකිනි. මෙවර රාහුල් අභිබවමින් බී. ජේ. පී. අපේක්ෂිකා ස්ප්රිති ඉරානි කොන්ග්රස් බලකොටුව බිඳ දැමුවාය. එය ප්රජාතන්ත්රවාදය බව පැවසූ රාහුල් ඇයට සුබ පැතුවේ ආදරය ද සමඟ අමෙති ජනයාට ඇය සේවය කරනු ඇතැයි තමන් අපේක්ෂා කරන බව කියමිනි.
ජයග්රාහීව ජනතාව ඇමතූ මෝදි ඉන්දියාවේ ඇත්තේ කුල 2 ක් පමණක් බව කීවේය. ඒ දිළින්දන් හා ඔවුන් එතැනින් ගොඩගැනීමට වෑයම් කරන්නන් බව පැවසූ ඔහු මේ දෙපිරිසම සවිබල ගැන්විය යුතු බව පෙන්වා දුන්නේය. එය ඔහු ඉදිරිපිට ඇති අභියෝගයකි. විරැකියාව අවම කිරීම, සිය පළමු ධුර කාලය තුළ ලොව 6 වැනි විශාලම ආර්ථිකය බවට පත් ඉන්දියාව එතැනින් ඉහළට ගැනීම, කෘෂිකර්මාන්තය නඟාසිටුවීම, සුළුජන කොටස්වලට රැකවරණ සැලසීම වැනි කාරණා සෙසු අභියෝග ලෙස මෝදිගේ දෙවන ධුර කාලය ඉදිරිපිට තිබේ.
නව අදහස දක්වන්න