විසි දෙහැවිරිදි අවිවාහක පුද්ගලයකු මිය ගොස් ඇති රිය අනතුරකට සම්බන්ධ සැකකාර ලොරි රථ රියැදුරෙකු මේ මස 22 වනදා දක්වා රිමාන්ඩ් භාරයේ රඳවා තැබීමට අත්තනගල්ල අංක 02 මහේස්ත්‍රාත් මංජුල කරුණාරත්න මහතා ඊයේ (19) දහවල් නියෝග කළේය.
පැපිලිවල ප්‍රදේශයේ පදිංචි ධනුෂ්ක සංජීව නමැත්තෙකු එසේ රිමාන්ඩ් ෙකරිණි. සැකකරු පෙරේදා (18) රාත්‍රී පස්යාල අත්තනගල්ල මාර්ගයේ පස්යාල දෙස සිට අත්තනගල්ල දෙසට ලොරියක් පදවාගෙන යද්දී එල්ලක්කල ප්‍රදේශයේ දී පස්යාල දෙසට ධාවනය වෙමින් තිබූ යතුරුපැදියක හැපී අනතුර සිදු වී තිබිණ.
එම අනතුරින් යතුරුපැදිය පදවාගෙන පැමිණි ඌරාපොළ බෝපැත්ත ප්‍රදේශයේ පදිංචිව සිටි ඩී. දිනෙත් හෙට්ටිආරච්චි (22) නමැති අවිවාහකයෙකු බරපතළ තුවාල ලබා වතුපිටිවල මූලික රෝහලට ඇතුළත් කර සිටියදී මිය ගොස් තිබිණ. මේ පිළිබඳව නිට්ටඹුව පොලිසියේ රථ වාහන අංශය පරීක්ෂණ පවත්වා සැකකාර ලොරි රථ රියැදුරා අත්අඩංගුවට ගෙන තිබිණ.
නිට්ටඹුව පොලිසියේ නඩු මෙහෙයුම් අංශයේ පොලිස් සැරයන් සමන් තිලක මහතා කරුණු දක්වමින් සැකකරු අධික වේගයකින් ලොරිය වැරදි මංතීරුවේ පදවාගෙන යද්දී යතුරුපැදියේ හැපී අනතුර සිදු වී ඇති බව කියා සිටියේය.
අනතුරත් සමඟ යතුරුපැදිය අඩි පහළොවක් දුරකට විසි වී ඇති බවත්, සැකකාර රියැදුරාගේ නොසැලකිල්ල නිසාම අවාසනාවන්ත ලෙස අනතුර සිදු වී ඇති බවත්, යතුරුපැදිකරු බරපතළ තුවාල ලබා වතුපිටිවල මූලික රෝහලට ඇතුළත් කර සිටියදී මිය ගොස් ඇති බවත් පොලිස් සැරයන්වරයා කීය. පොලිසියේ කරුණු දැක්වීම්වලින් අනතුරුව එසේ සැකකාර රියැදුරා රිමාන්ඩ් භාරයේ රඳවා තැබීමට නියෝග කෙරිණි.
නැවත කැඳවීම මේ මස 22 වනදාට කල් තැබිණ. නිට්ටඹුව පොලිසියේ නඩු මෙහෙයුම් අංශයේ පොලිස් සැරයන් සමන් තිලක මහතා පැමිණිල්ල මෙහෙයවිය.
වේයන්ගොඩ - විශේෂ වාර්තාකරු