ශ්රී ලංකාවේ ප්රංශ තානාපති ජීන් ෆ්රැන්කොයිස් පැක්ටර් (Jean-Francois Pactet) මහතා හම්බන්තොට ජාත්යන්තර වරායේ (HIP) සංචාරයකට එක්ව තිබේ.
මෙහිදී ප්රංශ සමාගම්වලට නිරත විය හැකි ව්යාපාරික අවස්ථා පිළිබඳ ඒ මහතා උනන්දුව පළ කර ඇති බව හම්බන්තොට ජාත්යන්තර වරාය සමූහය පවසයි.
හම්බන්තොට ජාත්යන්තර වරාය සමූහයේ (HIPG) ප්රධාන මෙහෙයුම් නිලධාරි තිස්ස වික්රමසිංහ මහතා තානාපති කාර්යාලයේ නියෝජිතයන් හමු වූ අතර, තානාපතිවරයා සමඟ සාකච්ඡාවක ද නිරතව ඇත. ඔහු වරායේ ප්රධාන ව්යාපාරික ක්ෂේත්ර 5 පිළිබඳ සවිස්තරාත්මක වාර්තාවක් තනාපතිවරයාට දුන් අතර, RORO, තෙල් සහ ගෑස් අංශයන්හි වරාය ලබා ඇති විශේෂ වර්ධනය ද ඔවුනට පෙන්වා දී තිබේ.
හම්බන්තොට ජාත්යන්තර වරාය විසින් ක්රියාත්මක කර ඇති නවතම බහාලුම් මෙහෙයුම් සේවාව පිළිබඳව කරුණු පැහැදිලි කර, වසර අවසන් වන විට තොග හැසිරවීම් ප්රමාණය ද වැඩි කිරීමට අපේක්ෂා කරන බව තිස්ස වික්රමසිංහ මහතා වැඩිදුරටත් පැවසීය. හම්බන්තොට ජාත්යන්තර වරායේ සමාජ සහ පාරිසරික ව්යාපෘති සහ අනාගත සැලසුම් ද සාකච්ඡාවට ඇතුළත් විය.
තානාපති කාර්යාලයේ නියෝජ්ය ආර්ථික උපදේශක හේමා රාමචන්ද්රන් මෙනවිය සහ මාධ්ය පරිවාරක නිලධාරි දිනුෂා ඉලේපෙරුම මෙනවිය ද තානාපතිවරයා සමඟ මේ සංචාරයට සහභාගි වූහ. හම්බන්තොට ජාත්යන්තර වරායේ ප්රධාන මෙහෙයුම් නිලධාරි තිස්ස වික්රමසිංහ මහතා විසින් තානාපතිවරයාට සමරු තිළිණයක් පිළිගන්වා තිබේ.
මහින්ද අලුත්ගෙදර