ගාසා තීරයේ ජනතාවට බාධාවකින් තොරව මානුෂීය ආධාර සැපයීමට අවස්ථාව සලසන මෙන් එක්සත් ජාතීන්ගේ සංවිධානයේ ජාත්‍යන්තර අධිකරණය නියෝග කර ඇතැයි විදෙස් මාධ්‍ය වාර්තා කළේය. ගාසා තීරයේ ජනතාවගේ මූලික සහ හදිසි අවශ්‍යතා ඇතුළු මානුෂීය ආධාර සඳහා ඊශ්‍රායලය කිසිදු ප්‍රමාදයකින් තොරව ඉඩ දිය යුතු බවට එක්සත් ජාතීන්ගේ සංවිධානයේ යුක්තිය සඳහා වන ජාත්‍යන්තර අධිකරණය ඒකමතිකව තීරණය කර ඇතැයි විදෙස් මාධ්‍ය වැඩිදුරටත් වාර්තා කළේය. එක්සත් ජාතීන්ගේ සංවිධානය මේ නියෝගය නිකුත් කර ඇත්තේ ඉදිරි සති කිහිපය ඇතුළත ගාසා තීරයේ දැඩි සාගත තත්ත්වයක් උදාවීමේ අනතුරු ඇඟවීම් සිදු කර ඇති අවස්ථාවකදීය.
ගාසා තීරයට මානුෂීය ආධාර සැපයීමට දැනට ඇති මාර්ග පුළුල් කිරීමට සහ නව ප්‍රවේශ මාර්ග සැලැසීමට තවදුරටත් කටයුතු කරන බව ජාත්‍යන්තර අධිකරණයේ නියෝගයට ප්‍රතිචාර දක්වමින් ඊශ්‍රායලයේ විදේශ අමාත්‍යාංශය ප්‍රකාශ කර ඇතැයි ද වාර්තා වේ. එක්සත් ජාතීන්ගේ සංවිධානය සහ සෙසු සංවිධාන සමඟ එක්වී මුහුදෙන්, ගොඩබිමෙන් සහ ගුවනින් අවශ්‍ය ආධාර ලබා දීමට කටයුතු කරන බව ද ප්‍රකාශ කර ඇතැයි වාර්තා වේ. ගාසා තීරයේ උදා වී ඇති තත්ත්වයට වගකිව යුතුවන්නේ හමාස් සංවිධානය බවත් ඊශ්‍රායල විදේශ අමාත්‍යාංශය සඳහන් කර ඇතැයි විදෙස් මාධ්‍ය වාර්තා කළේය.
ෆවුස් මොහොමඩ්