රුපියල් ලක්ෂ 75ක වටිනාකමකින් යුත් ග්‍රෑම් 500කට අධික මත්ද්‍රව්‍ය තොගයක් සමඟ අත්අඩංගුවට ගනු ලැබූ නාවික හමුදා ලුතිනන් කමාන්ඩර්වරුන් දෙදෙනා ඇතුළු සිව් දෙනා ලබන 09 වැනිදා තෙක් රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් තරංගා මහවත්ත මහත්මිය ඊයේ (26) නියෝග කළාය.
මෙලෙස රක්ෂිත බන්ධනාගාරගත කරනු ලැබුවේ පන්සල්වත්ත පාර, අංගොඩ පදිංචි ජයමුනි ලක්මාල් සඳරුවන් සිල්වා (28), සිරිපැරකුම් මාවත, මුල්ලේරියාව, අංගොඩ පදිංචි මහවත්තගේ දොන් බුද්ධික ජයලත් (27), උල්පත්ගම, ගලෙන්බිඳුණුවැව පදිංචි නාවික හමුදා ලුතිනන් කමාන්ඩර්වරයකු වන විජේවීර රත්නායකලාගේ තිරිදු මධුෂාන් (33) සහ ඇඹිලිපිටියේ පදිංචි ලුතිනන් කමාන්ඩර්වරයකු වන ගමගේ දොන් අරෝෂ් මියුරු (33) යන අයවලුන්ය.
මෙම නඩුව අධිකරණය හමුවේ කැඳවූ අවස්ථාවේදී සැකකාර නාවික හමුදා ලුතිනන් කමාන්ඩර්වරයකු ඇමතූ මහේස්ත්‍රාත්වරිය “තමන් පියකු වශයෙන් තමන්ගේ දරුවන් මෙවැනි ආකාරයෙන් කටයුතු කළහොත් ඇතිවන හැඟීම කුමක්දැයි විමසා සිටියාය. මෙහිදී සැකකාර නාවික හමුදා නිලධාරියා සඳහන් කළේ තමන් වරදක් නොකළ බවය. මෙම සැකකරු සන්තකයේ අයිස් ග්‍රෑම් 05යි මිලිග්‍රෑම් 03ක ප්‍රමාණයක් තිබූ බවත් ඔහු අධිකරණ වෛද්‍යවරයා වෙත ද ඉදිරිපත් කර වාර්තා කැඳවූ බවත් මුල්ලේරියාව පොලිසිය අධිකරණයට දැනුම් දුන්නේය.
මෙහි පළමු සැකකරු සන්තකයේ තිබී අයිස් ග්‍රෑම් 434ක් දෙවැනි සැකකරු සන්තකයේ තිබී අයිස් ග්‍රෑම් 100ක් තෙවැනි සැකකරු සන්තකයේ තිබී අයිස් ග්‍රෑම් 05යි මිලිග්‍රෑම් 03ක් සහ සිව්වැනි සැකකරු සන්තකයේ තිබී අයිස් ග්‍රෑම් 06ක් අත්අඩංගුවට ගත් බව මුල්ලේරියාව පොලිසියේ අධිකරණ අංශයේ ඒ.ජී.එස්. අලුත්ගෙදර මහතා අධිකරණයට දැනුම් දුන්නේය.
මෙම සැකකරුවන් අධිකරණ වෛද්‍ය නිලධාරිවරයා වෙත ඉදිරිපත් කර වාර්තාවක් කැඳවූ අතර සැකකාර නාවික හමුදා ලුතිනන් කමාන්ඩර්වරුන් දෙදෙනා වසරක කාලයක පමණ සිට විෂ මත්ද්‍රව්‍යවලට ඇබ්බැහි වී ඇති බවට එම වාර්තාවල දක්වා ඇතැයි ද මුල්ලේරියාව පොලිසිය අධිකරණයට දැනුම් දුන්නේය.
ඉදිරිපත් වූ කරුණු සැලකිල්ලට ගත් අධිකරණය සැකකරුවන් ලබන 09 වැනිදා තෙක් රක්ෂිත බන්ධනාගාරගත කරන ලෙසට නියෝග කරමින් එදින තෙක් නඩුව කල් තැබීය.
නිමන්ති රණසිංහ