යුක්තිය මෙහෙයුමට සමගාමීව බස්නාහිර සහ දකුණ පළාත කේන්ද්ර කර ගනිමින් සිදුවන පාතාල අපරාධ මැඬ පැවැත්වීමේ අරමුණින් විශේෂ කාර්ය බළකා යතුරුපැදි කණ්ඩායම්වලට සමගාමීව ක්රියාත්මක වීමට විශේෂ කාර්ය බළකා විශේෂ පුහුණුව ලත් පොලිස් නිලධාරීන් 100කගෙන් සමන්විත යතුරුපැදි කණ්ඩායම් 50ක් පෙරේදා(25)කටුකුරුන්ද විශේෂ බළකා පුහුණු කඳවුරේ සති 2ක පුහුණුව සාර්ථකව අවසන් කර විසිර ගියහ. එම විසිර යෑමේ උත්සවය මහජන ආරක්ෂක ඇමැති ටිරාන් අලස් මහතාගේ ප්රධානත්වයෙන් සහ පොලිස්පති දේශබන්දු තෙන්නකොන් මහතාගේ උපදෙස් පරිදි පැවැත්විණි.
මේ විශේෂ පුහුණුව ලත් යතුරුපැදි කණ්ඩායම් පෙරේදා (25) සිට බස්නාහිර සහ දකුණ පළාතේ විශේෂයෙන් හඳුනාගත් පොලිස් වසම් ආවරණය වන පරිදි සංචාරය කිරීමට නියමිත අතර, අපරාධකරුවන් වෙත ක්ෂණිකව හඹා ගොස් අත්අඩංගුවට ගැනීමට ක්රියාත්මක වනු ඇත.
මහජන ආරක්ෂක ඇමැති ටිරාන් අලස් මහතා එහිදී මෙසේද පැවසීය.
මම අමාත්යාංශය භාර ගන්නකොට ඔබ සියලු දෙනාම දන්නවා ශ්රී ලංකා පොලිසිය වැටිලා තිබුණු තත්ත්වය. අරගලය කාලෙ පොලිස් නිලධාරීන්ට මුහුණ දෙන්න සිදුවී තිබුණු දේවල්. අපි රූපවාහිනියේ දැක්කා. මගේ වගකීම තිබුණේ ඒ වෙලාවේ ශ්රී ලංකා පොලිසිය නඟා සිටුවන්න. මම ඒ වෙලාවේ විශ්වාස කෙරුවා ඔබලා වෙනුවෙන් අපි කෙළින් පෙනී සිටිනවා නම් ඔබ සියලු දෙනාට විශාල වැඩ කොටසක් මේ රටේ කරන්න පුළුවන් කියලා. ඉතින් මම ඒ වෙලාවේ තීරණය කළේ මගේ පැත්තෙන් කළයුතු දේ ශ්රී ලංකා පොලිසියට කරනවා කියලා. දෙන්න තිබෙන දේවල් දෙන්න. අපි එකපාරක් බටා වැඩි කෙරුවා. ආහාර හා නවාතැන් දීමනාවක් දුන්නා. වාහන දුන්නා.
ඒ සියලු දේ දෙනකොට මට විශ්වාසයක් තිබුණා ශ්රී ලංකා පොලිසිය දැන් තිබෙන තත්ත්වයට නඟා සිටුවන්න පුළුවන් වෙයි කියලා. යුක්තිය මෙහෙයුම පටන් ගන්න හේතුව අපේ රට කුඩුවලින් හා පාතාලයෙන් බේරගන්න. අපේ දරු පරපුර බේරගන්න. යුක්තිය මෙහෙයුම පටන් ගන්න කලින් අපි මේක අධ්යයනය කළා. වැඩ බලන පොලිස්පති පොලිස්පති කරන්න යම් වෙහෙසක් ගන්න සිදුවුණා. මා දැනගෙන සිටියා එතුමාට කරන්න පුළුවන් මොකක්ද කියලා. ඒ අනුව අපි මෙහෙයුම පටන් ගත්තා.
මං අද මේ මෝටර් සයිකල් කණ්ඩායමේ සියලු දෙනාගෙන් ඉල්ලා සිටින්නේ කරුණා කරලා බය නැතිව අපට යා යුතු ඉලක්කයට යන්න. ඕනෑම හදිස්සි වෙලාවක තමන් අතේ තිබෙන වෙපන් එක පාවිච්චි කරන්න වෙනවානම් හරිදේට පාවිච්චි කරන්න. අපි ඔබලා වෙනුවෙන් හරි දේට පෙනී සිටිනවා. ඒ වගේම වැරදි දේවල් කරන අයට විරුද්ධව තදින් ක්රියාත්මක වෙනවා.
මේ මෝටර් සයිකල් කණ්ඩායමට තෝරගත් ඔබ සැම දන්නවා මේ මෝටර් සයිකල් කණ්ඩායමේ අවශ්යතාව මොකක්ද කියලා. මේ කණ්ඩායම මදි වුණොත් අපි තවත් මෝටර් සයිකල් කණ්ඩායමක් පිහිටුවනවා. අපේ එක ඉලක්කයක් තිබෙනවා. ඒ ඉලක්කය මේ වන විට සියලු පොලිස් නිලධාරීන් දන්නවා. මට අවශ්ය ඒ ඉලක්කයට යෑම පමණයි.
ඒ නිසා අද ඉඳන් මේ වැඩ කොටස කරන්න කැප වෙන්න. අපි සියලු දෙනා එකතු වෙලා මේ රටේ ජනතාව බේරගන්න ක්රියාදාමයකට යන්නේ. දෙපාරක් හිතන්න ඕනෑ නෑ මේ රටට කුඩු ගේන, කුඩු විකුණන, පාතාල ක්රියාකාරකම් කරන පුද්ගලයන් මේ රටෙන් තුරන් කිරීම පවක් නෙමෙයි. ඒක හොඳට හිතට අරගෙන අද ඉඳන් පොලිස්පතිගේ නායකත්වයෙන් එතුමා දෙන උපදෙස් පරිදි වැඩ කරගෙන ගිහින් අපේ මේ රට හොඳ තැනකට ගෙනයමු.
රක්ෂණ ශ්රියන්ත