ඇතැම් රාජ්‍ය නිලධාරින්ගේ වැරැදි තීන්දු තීරණ නිසා රජයටත් ජනතාවටත් විශාල පාඩු සිදුවන බව නාගරික සංවර්ධන හා නිවාස ඇමැති ප්‍රසන්න රණතුංග මහතා පැවසීය.
ඔහු අවධාරණය කරන්නේ නිලධාරින් සිදු කරන එවැනි වැරදි නිසා අවසානයේ ජනතාවගෙන් චෝදනාවට ලක්වන්නේ දේශපාලනඥයන් බවයි.
අද වන විට ඇතැම් රාජ්‍ය ආයතනවල නිලධාරිවාදය නිසා සංවර්ධන වැඩසටහන් නතර වී ඇති බවද හෙතෙම පැවසීය. ගම්පහ මහ නගර සභාවේ පැන නැඟී ඇති ගැටලු විසඳීමට ගම්පහ මහ නගර සභාවේ පසුගියදා (24) පැවති සාකච්ඡාවකට සහභාගි වෙමින් ඇමැතිවරයා මේ බව සඳහන් කළේය. ගම්පහ මහ නගර සභාව විසින් සිදු කරන සංවර්ධන ව්‍යාපෘති සම්බන්ධයෙන් මෙහිදී සාකච්ඡා කෙරිණි.
2023 වසරේදී ආරම්භ කළ නඩත්තු ව්‍යාපෘතිවල තත්ත්වය මෙහිදී ඇමැතිවරයා විසින් ගම්පහ නාගරික කොමසාරිස්වරියගෙන් විමසා සිටියේය. එහිදී නාගරික කොමසාරිස්වරිය කියා සිටියේ 2023 වසරේදී ආරම්භ කළ නඩත්තු ව්‍යාපෘති 33න් 15ක වැඩ මේ වන විට අවසන් වී ඇති බවයි. 2023 වසරේදී ආරම්භ කළ නඩත්තු ව්‍යාපෘති මේ වසරේ මාස හතරක් ගත වන තුරු අවසන් කිරීමට නොහැකි වීම ගැන ඇමැතිවරයාගේ අප්‍රසාදයට ලක් විය.
ඉතිරි නඩත්තු ව්‍යාපෘති පටන් ගන්නා දිනය අවසන් කරන දිනය කවදාදා යන්න ගැන තමන්ට ලබන සඳුදා වන විට වාර්තාවක් දෙන ලෙසත් එම නඩත්තු ව්‍යාපෘති ජුනි මස අවසන් වීමට පෙර අවසන් කරන ලෙසත් ඇමැතිවරයා ගම්පහ නාගරික කොමසාරිස්වරියට උපදෙස් දුන්නේය.
මේ ව්‍යාපෘති පමා වීමට හේතුව නිලධාරින්ගේ දුර්වලතා බව කී ඇමැතිවරයා එවැනි නිලධාරින් ඉවත් කර වැඩ කළ හැකි නිලධාරින් සමඟ ඉදිරි වැඩ කටයුතු කරගෙන යෑමට තමන් සූදානම් බව ද සඳහන් කළේය. එහිදී වැඩිදුරටත් ඇමැතිවරයා මෙසේද පැවසීය.
2023 වසරේදී ආරම්භ කළ මේ නඩත්තු ව්‍යාපෘති අද වෙනකම් අවසන් කර නෑ. මේ ගැන ජනතාව වගේම නගර සභාවේ හිටපු මහජන නියෝජිතයන්ගෙනුත් මට පැමිණිලි ලැබී තිබෙනවා.
ට්‍රැක්ටර් පහක් නගර සභාවට තිබෙනවා. එයින් එක ට්‍රැක්ටරයයි අද වන විට වැඩ කරන්නේ කියනවා. ඇයි ඉතිරි ට්‍රැක්ටර් හතර හදා ගන්න මේ වෙනකම් බැරි වුණේ.
ගම්පහ අනෙක් පළාත් පාලන ආයතනවලින් මෙවැනි ගැටලු එන්නේ නෑ. ගම්පහ ප්‍රාදේශීය සභාව, මිනුවන්ගොඩ නගර සභාව, ප්‍රාදේශීය සභාවේ වැඩ කටයුතු නිසියාකාරව සිදු වෙනවා. සංවර්ධන ව්‍යාපෘති හරියාකාරව සිදු වෙනවා. ඒත් ගම්පහ නගර සභාවේ වැඩ හැමදාම ප්‍රමාදයි. ඒ නිලධාරින්ගේ දුර්වලකම් නිසයි. නිලධාරින් හිතාමතාම මෙය පරක්කු කරනවා.
නගර සභාව ගන්න තීන්දු තීරණ නිසි පරිදි ක්‍රියාත්මක වෙන්න ඕනෑ. නිලධාරින් වැඩ කරන්නේ නැති වුණාම මිනිස්සු බණින්නේ අපට.
නිලධාරින්ගේ ප්‍රමාදය නිසා අද රජයට කොච්චර පාඩු සිදු වෙනවාද? සම්බන්ධීකරණ කමිටුවේ ගන්න තීන්දු තීරණ ගැන නිලධාරින් අහගෙන ඉන්නේ නෑ. ගන්න තීන්දු නිකම් කතා කර ගන්න තීන්දු නොවෙයි. තීන්දු ගත් ලේඛන තිබෙනවා. දිස්ත්‍රික් සම්බන්ධීකරණ කමිටුවේ අනුමැතිය හිමි වූ වහාම ක්‍රියාත්මක කිරීමට අවශ්‍ය ව්‍යාපෘති අපි පළාත් පාලනවලට එවනවා. නිලධාරින්ගේ වගකීම තමයි ඇස්තමේන්තු හදලා සූදානම් වෙලා ඉන්න එක. මෙතැන ලොකුම වැරැද්ද වැඩ කරනකොට සම්බන්ධීකරණයේදී සිදුව ඇති ගැටලුවක්. ඒවා හදාගන්න ඕනෑ.
නිලධාරින් හිතාගෙන ඉන්නවා නම් ආණ්ඩුව වෙනස් වෙනවා කියලා. නෑ ආණ්ඩුව තිබෙනවා, මේ අවුරුද්දේ තිබෙන්නේ ජනාධිපතිවරණය විතරයි.
ලංකාවේ හැම දිසාපති කෙනකුටම යවලා තිබෙන චක්‍රලේඛයේ තිබෙනවා ගම්පහ දිස්ත්‍රික්කයේ ක්‍රියාත්මක වැඩපිළිවෙළ හැම දිස්ත්‍රික්කයකටම අනුගත කරගන්න කියලා. නිලධාරින් මහන්සි වෙලා වැඩ කරපු නිසයි අද ඒ දේ වෙලා තිබෙන්නේ. ඇතැම් නිලධාරින් හිතාමතාම මේක ප්‍රමාද කරනවා. මම කියන්නේ බැරි අය අයින් කර වැඩ කරන්න පුළුවන් පිරිසක් තියාගන්න කියලා. අපි ගමනක් යනකොට වැඩ කරන්න පුළුවන් පිරිසක් ඉන්න ඕනෑ.
ගම්පහ මහ නගර සභාවේ හිටපු නගරාධිපති එරංග සේනානායක, බස්නාහිර පළාත් පාලන සහකාර කොමසාරිස් එන්.බී.ආර්.වී. ප්‍රනාන්දු, ගම්පහ නාගරික කොමසාරිස් සුලෝචනා බාලසූරිය, හිටපු පළාත් සභා මන්ත්‍රී ලක්ෂ්මන් ගුණවර්ධන මහත්වරුන් ද හිටපු නාගරික මන්ත්‍රීවරුන්, රාජ්‍ය නිලධාරින් ඇතුළු පිරිසක් මේ අවස්ථාවට සහභාගි වූහ.
උපාලි කරුණාරත්න