ගම්පහ ප්‍රසිද්ධ ව්‍යාපාරිකයකු වන ඔස්මන් ගුණසේකර ඝාතනය කිරීමට සැලසුම් කළැයි කියන සිද්ධියට අදාළව අත්අඩංගුවට ගත් වැඩ තහනමට ලක්වූ පොලිස් කොස්තාපල්වරයාගේ මරණය සම්බන්ධයෙන් පශ්චාත් මරණ පරීක්ෂණයේදී විවෘත තීන්දුවක් දී ඇතැයි පෑලියගොඩ කොට්ඨාස අපරාධ විමර්ශන අංශය පවසයි.
කොළඹ අතිරේක මහේස්ත්‍රාත් පවිත්‍රා සංජීවනී පතිරණ මහත්මියගේ නියෝගයට අනුව මියගිය කොස්තාපල්වරයාගේ පශ්චාත් මරණ පරීක්ෂණය කොළඹ අධිකරණ වෛද්‍ය නිලධාරීවරයා විසින් ඊයේ (26) පෙරවරුවේදී සිදුකරනු ලැබූ අවස්ථාවේදී මේ තීන්දුව දුන් බවද පොලීසිය සඳහන් කරයි.
මරණයට පත්වු පොලිස් කොස්තාපල්වරයා නිරීක්ෂණය කිරීමට කොළඹ අතිරේක මහේස්ත්‍රාත්වරිය කොළඹ ජාතික රෝහලට ගොස් පශ්චාත් මරණ පරීක්ෂණය කිරීම සඳහා කොළඹ අධිකරණ වෛද්‍ය නිලධාරිවරයාට නියෝග නිකුත් කළේ පෙරේදා (25)ය.
ඒ අනුව මියගිය අයගේ සිරුරේ කොටස් රජයේ රස පරීක්ෂකවරයා වෙත යවා වාර්තා කැඳවීමට ද කොළඹ අධිකරණ වෛද්‍ය නිලධාරිවරයා කටයුතු කළ බව පොලීසිය පැවසීය.
ගම්පහ ව්‍යාපාරිකයකු වන ඔස්මන් ගුණසේකර යන අය ඝාතනය කිරීමට සැලසුම් කිරීමේ සිද්ධියක් සම්බන්ධයෙන් මේ මියගිය අය දිවුලපිටිය උළුකඩය හන්දියේදී අත්අඩංගුවට ගෙන සිටියදී අසනීප වීම හේතුවෙන් ජාතික රෝහලට ඇතුළත් කළ පසු පෙරේදා (25) මරණයට පත්වූ බව බස්නාහිර පළාත් උතුරු දිසා අපරාධ කොට්ඨාසය අධිකරණයට කරුණු ඉදිරිපත් කළේය. ඒ අනුව කොළඹ ජාතික රෝහල වෙත ගොස් මියගිය අය නිරීක්ෂණය කර පශ්චාත් මරණ පරීක්ෂණය සඳහා නියෝගයක් නිකුත් කරන ලෙස පොලීසිය අධිකරණයෙන් ඉල්ලා තිබිණී.
සැකකරු සන්තකයේ තිබී අයිස් මත්ද්‍රව්‍ය ග්‍රෑම් 11යි මිලිග්‍රෑම් 110ක් අත්අඩංගුවට ගත් බවත්, ඔහු පිටකොටුව පොලීසියේ සේවය නිරතව සිටියදී වැඩ තහනමට ලක්වූ පොලිස් කොස්තාපල්වරයකු බවත් බස්නාහිර පළාත් උතුරු දිසා අපරාධ කොට්ඨාසය අධිකරණයට කරුණු වාර්තා කර ඇත. මොහු තදින්ම මත්ද්‍රව්‍ය භාවිතයට ඇබ්බැහි වී සිටි අයකු බවද පොලීසිය අධිකරණයට කරුණු ඉදිරිපත් කර තිබිණි.
නිමන්ති රණසිංහ