මුලතිව් මාන්කුලම් මුරුකණ්ඩි ප්‍රදේශයේ දී යුද හමුදාවේ පිරිසක් ගමන් කළ කැබ් රථයක් ලොරියක ගැටීම නිසා යුද හමුදාවේ එක් සැරයන්වරයකු මියගොස් තවත් හමුදා සාමාජිකයන් 9 දෙනෙකු ඊයේ (26 ) තුවාල ලබා තිබේ.
තුවාලකරුවන් කිළිනොච්චිය රෝහලට ඇතුළත් කොට ඇති අතර, ඔවුන්ගෙන් දෙදෙනකුගේ තත්ත්වය තරමක් බරපතළ බව රෝහලේ වෛද්‍යවරු කියා සිටියහ.
මියගොස් ඇත්තේ 39 හැවිරිදි ඇහැටුවැව ගල්ගමුව ප්‍රදේශයේ පදිංචිව සිටි යුද හමුදා 07 වන සේවා බළකායට අනුයුක්ත මුරුක්කණ්ඩි කඳවුරේ සැරයන්වරයෙකි. අනතුරත් සමඟ කැබ් රථයේ පිටුපස ගමන් කළ එක් සෙබළකු රථයෙන් විසි වී ගොස් පිටුපසින් පැමිණි ලොරි රථයේ ගැටී සිදුවූ අනතුරෙන් මියගොස් තිබේ.
කැබ් රථයට පිටුපසින් පැමිණි ලොරි රථයක් කැබ් රථයේ ගැටීමෙන් අනතුර සිදුව ඇති අතර, අනතුරත් සමඟම ලොරිය පාරෙන් ඉවතට පැන පෙරැළී ගොස් තිබේ. කිළිනොච්චිය පොලිසිය සිද්ධිය සම්බන්ධයෙන් පරීක්ෂණ පවත්වාගෙන යයි.
උතුරු පළාත් විශේෂ - රසුල දිල්හාර ගමගේ