නිවසේ මුළුතැන්ගෙයින් එකතු වන කසළ එකතු කර ගෑස් නිපදවීමට බළන්ගොඩ මිරිස්වත්ත ප්‍රදේශයේ පදිංචි නව නිපැයුම්කරුවෙකු සමත් වී තිබේ. මොහොම්ඩ් පිර්දවිස් රෂිඩ් නැමැති අයෙකු මෙලෙස නිවසේ මුළුතැන්ගෙයින් ඉවත දමන දිරන කසළ එකතු කර ඒවා බැරල්වලට එකතු කර ගෑස් නිෂ්පාදනය කර තිබේ. මේ කසළ පරිසරයට මුදා නොහැර පරිසරයත් ආරක්ෂා කරමින් මෙලෙස ගෑස් නිෂ්පාදනය කර එම ගෑස් මඟින් නිවසේ ආහාර පිසීම සිදු කරන අයුරු එහි ගිය අපට දක්නට ලැබුණි. ගෑස් නිපදවීමෙන් පසු අතුරු නිෂ්පාදනයක් ලෙස දියර පොහොර නිපදවන අතර එම දියර පොහොර භාවිත කර එළවළු වගා කිරීමට ද ඔහු කටයුතු කර තිබේ.
මේ සම්බන්ධයෙන් මොහොමඩ් පිර්දවිස් රෂිඩ් මහතා පැවසුවේ මගේ නිවසේ මුළුතැන්ගෙයින් එකතු වෙන දිරන කසළ එකතු කර ඒවා බැරල්වලට දමා දින කීපයක් ජීර්ණය වෙන්න හරිනවා. මේ සඳහා බැරල් පහක් පමණ භාවිත කරනවා. පසුව එම බැරල්වලට බට සවිකර එයින් ගෑස් නිපදවීම සිදු කරනවා. ඉතිරි කොටසින් අතුරු නිෂ්පාදනයක් ලෙස කාබනික දියර පොහොර නිපදවනවා.
මෙලෙස නිපදවන ගෑස් භාවිත කර තමයි නිවසේ ආහාර පිසීම කරන්නේ. කාබනික දියර පොහොර යොදා එළවළු වගාවක් ආරම්භ කළා. මේක පරිසරය ආරක්ෂා කරන නව සොයා ගැනීමක්. මේ නිෂ්පාදන වැඩි දියුණු කර හොඳ ව්‍යාපාරයක් ආරම්භ කර හොඳ ආදායමක් ලබා ගැනීම තමයි මගේ අරමුණ. ඒ සඳහා උදව් උපකාර කිරීමට කැමති ආයතනය මඟින් මෙම වැඩි දියුණු කිරීම සඳහා අවශ්‍ය උදව් ඉල්ලා සිටිනවා.
බළන්ගොඩ විශේෂ - සම්පත් ප්‍රියනන්දන