ශ්රී ලංකා නිදහස් පක්ෂය තුළ මතුව ඇති අර්බුදකාරි ත්ත්ත්වය සම්බන්ධයෙන් ඉදිරියේදී සාකච්ඡා කිරීමට මැතිවරණ කොමිසම තීරණය කර ඇති නමුත් පක්ෂයේ අභ්යන්තර ගැටලු විසඳීමට කොමිසමට නෛතික බලයක් නැති බව එම කොමිසමේ ප්රකාශකයෙක් දිනමිණට පැවසීය.
ශ්රී ලංකා නිදහස් පක්ෂයේ කණ්ඩායම් දෙකක් විසින් වෙන වෙනම මැතිවරණ කොමිසම වෙත ඉදිරිපත් කර ඇති ලිපි ලේඛන කොමිසමේ සාමාජිකයන් විසින් සාකච්ඡාවට ලක් කළ නමුත් ඒ සම්බන්ධයෙන් අවසන් විසඳුමක් නොගත් බවද ඒ ප්රකාශකයා සඳහන් කළේය.
පසුගියදා (8) පක්ෂ ජ්යෙෂ්ඨ උප සභාපති ඇමැති නිමල් සිරිපාල ද සිල්වා මහතාගේ ප්රධානත්වයෙන් එහි දේශපාලන මණ්ඩලය රැස් වූ අතර, පක්ෂයේ නව සභාපති ලෙස නිමල් සිරිපාල ද සිල්වා මහතාත් මහලේකම් ධුරයේ ක්රියා කිරීමට දුමින්ද දිසානායක මහතාත් පත් කරනු ලැබූහ. මේ පත් කිරීම් සම්බන්ධයෙන් ලිපි ලේඛන හා තොරතුරු දුමින්ද දිසානායක මහතා මැතිවරණ කොමිසමට භාර දී ඇති අතර, පසුව පක්ෂයේ වැඩ බලන මහලේකම් සාරතී දුශ්මන්ත මිත්රපාල මහතා නව පත් කිරීම් සම්බන්ධයෙන් කොමිසමට විරෝධතා ගොනු කර තිබිණි. ඒ අනුව මැතිවරණ කොමිසම පෙරේදා (18) රැස් වූ අවස්ථාවේ මේ සම්බන්ධයෙන් දීර්ඝ ලෙස සාකච්ඡා කර තිබේ.
සාමාන්ය නෛතික වපසරිය සහ ක්රියාපටිපාටිය තුළ නිදහස් පක්ෂය තුළ හට ගෙන ඇති අභ්යන්තර ගැටලු විසඳීමට මැතිවරණ කොමිෂන් සභාවට නෛතික බලයක් නැති බැවින් පවතින ගැටලු පක්ෂයේ ක්රියාකාරීන් විසින් අධිකරණය හරහා විසඳාගත යුතු බව එම කොමිසමේ මතය වී ඇත. මේ වන විටත් නිදහස් පක්ෂයේ තනතුරු සහ පාර්ශ්ව සම්බන්ධයෙන් පවතින අර්බුදය අධිකරණය හමුවේ විභාග වන බැවින් ඉන් දෙන නියෝග හෝ නිර්දේශ පිළිගැනීමට පමණක් මැතිවරණ කොමිෂන් සභාවට හැකියාව පවතී.
කෙසේ වෙතත් යම් හෙයකින් ඉදිරියේදී මැතිවරණයක් ප්රකාශයට පත් කිරීමෙන් අනතුරුවත් නිදහස් පක්ෂයේ අභ්යන්තර අර්බුද පැවතුණ හොත් ඔවුන්ට නාමයෝජනා දෙන්නේද යන්න සම්බන්ධයෙන් සලකා බලා මැතිවරණ ක්රියාවලිය යටතේ පමණක් යම් තීන්දුවක් ගැනීමට සිදු වන බව එම ප්රකාශකයා වැඩිදුරටත් සඳහන් කළේය.
සුභාෂිණී සේනානායක