කැනඩාවේ ඔටාවා අගනුවරට ආසන්න බාර්හෙවන් ප්‍රදේශයේ පදිංචිව සිටි ශ්‍රී ලාංකිකයන් හය දෙනකු ඝාතනය කිරීමේ සිද්ධිය සම්බන්ධයෙන් සැකපිට අත්අඩංගුවට ගනු ලැබ සිටින ෆෙබ්‍රියෝ ද සොයිසා නමැති ශ්‍රී ලාංකික සිසුවා ඇප ඉල්ලීමට බලාපොරොත්තු නොවන බව ඔහුගේ නීතිඥයා ප්‍රකාශ කර තිබේ.
19 හැවිරිදි ෆෙබ්‍රියෝ ද සොයිසා නමැති මොහු පසුගිය මාර්තු මුලදී අත්අඩංගුවට ගත් අතර ඔහුට එරෙහිව මිනී මැරුම් චෝදනා 6ක් සහ මිනී මැරීමට තැත් කිරීමේ චෝදනාවක් එල්ල කර ඇත. මේ තරුණයා ලබන සතියේදී අධිකරණයට ඉදිරිපත් කිරීමට නියමිත අතර, එහිදී ඔහුට එරෙහි නඩුවේ මූලික විමර්ශන සඳහා දින වෙන් කිරීමට සැලසුම් කර ඇතැයි වාර්තා වෙයි.
එකම පවුලට අයත් කුඩා ළමයින් සිව් දෙනකු, ඔවුන්ගේ මව සහ තවත් ශ්‍රී ලාංකිකයකු මේ සැකකරු විසින් ඝාතනය කර තිබෙන අතර මියගිය දරුවන්ගේ පියාද තුවාල ලබා රෝහල්ගත කෙරිණි. සිද්ධිය සම්බන්ධයෙන් ඝාතනය සිදු වූ නිවෙසේම පදිංචිව සිටි 19 හැවිරිදි ශ්‍රී ලාංකික තරුණයා අත්අඩංගුවට ගනු ලැබූ අතර, මේ වන විට ඔහුට මිනීමැරීම් හයක සහ මිනීමැරීමට උත්සාහ කිරීමකට චෝදනා එල්ල වී තිබේ.
මහින්ද අලුත්ගෙදර