දකුණු පාකිස්තානයේ කරච්චි නුවර ජපන් මෝටර් රථ සේවකයන් රැගත් වෑන් රථයක් ඉලක්ක කරමින් සිදුවූ මරාගෙන මැරෙන බෝම්බ ප්‍රහාරයක් සිදු වී ඇතැයි විදෙස් මාධ්‍ය වාර්තා කළේය. බෝම්බකරු විසින් ඔහු හැඳ සිටි පුපුරණ ද්‍රව්‍ය අඩංගු කබාය පුපුරුවා හැර ඇති අතර, වෑන් රථයේ සිටි ජපාන ජාතිකයන් පස්දෙනා දිවි බේරා ගැනීමට සමත් වූ බවත් වැඩිදුරටත් වාර්තා වේ. කරච්චි නුවර සුසුකි මෝටර්ස් සමාගමේ සේවයේ නිරතව සිටින එම ජපාන ජාතිකයන්ට කිසිදු තුවාලයක් සිදු නොවූ බව කරච්චි පොලිසිය තහවුරු කර ඇති අතර, තුවාල ලැබූ තිදෙනා රෝහල්ගත කර ඇතැයි වාර්තා වේ.
පාකිස්තානයේ විවිධ චීන අරමුදල් යටතේ සහ වෙනත් ව්‍යාපෘතිවල සේවය කරන විදේශිකයන්ට ප්‍රහාර එල්ල වන බවට වාර්තා වීමෙන් පසු ආරක්ෂක නිලධාරීන් දෙදෙනකු එම වෙඩි නොවදින වෑන් රථයේ ගමන් කර ඇතැයි ද වාර්තා වේ. පොලිසිය සඳහන් කර ඇත්තේ යතුරුපැදියකින් පැමිණි බෝම්බකරු සිය කබාය ගලවා පුපුරුවා හැර ඇති බවය. යතුරුපැදියේ පැමිණි තවත් පුද්ගලයකු පලා යමින් සිටියදි පොලිසිය තැබූ වෙඩි පහරකින් ජීවිතක්ෂයට පත් වී ඇතැයි ද වාර්තා වේ.
